VHASWA
10: U Fhulufhelea
ZWINE ZWA AMBA ZWONE
Vhathu vhane vha fhulufhedzea vha a funwa nga vhabebi vhavho, dzikhonani na vhatholi vhavho. Vha tevhedza milayo, u ita zwe vha zwi fhulufhedzisa na u dzula vha tshi amba ngoho.
NDI NGANI ZWI ZWA NDEME
Arali ni muthu ane a fhulufhedzea, kanzhi ni ṋewa mbofholowo yo engedzeaho.
Sarahi o amba uri: “Nḓila yavhuḓi ine ya nga ita uri vhabebi vhaṋu vha ni fhulufhele, ndi nga u sumbedza uri no no aluwa lune na nga hwala vhuḓifhinduleli na musi vha siho tsini.”
ZWINE BIVHILI YA AMBA: “Ni dzule ni tshi sumbedza zwine na vha zwone.”—2 Vhakorinta 13:5.
ZWINE NA NGA ITA
Zwithu zwi tevhelaho zwi ḓo ni thusa arali ni tshi khou ṱoḓa u ita uri muthu a ni fhulufhele nga ho engedzeaho kana uri muṅwe muthu a dovhe a ni fhulufhele.
Ambani ngoho. U zwifha zwi ḓo ita uri vhathu vha si tsha ni fhulufhela. U amba ngoho na u sa dzumba vhukhakhi haṋu, zwi ḓo ita uri vhaṅwe vha ni fhulufhele.
Caiman o amba uri: “Zwo leluwa u amba ngoho musi zwithu zwi tshi khou tshimbila zwavhuḓi, fhedzi u amba ngoho na kha zwithu zwine zwa nga ita uri vhaṅwe vhathu vha ni dzhie nga iṅwe nḓila, zwi ḓo ita uri vha ni fhulufhele na u fhirisisa.”
ZWINE BIVHILI YA AMBA: “Ri . . . tama u fhulufhedzea kha zwithu zwoṱhe.”—Vhahevheru 13:18.
Ivhani muthu ane vhaṅwe vha nga ḓitika ngae. Kha ṱhoḓisiso yo itwaho Amerika, ho wanuluswa uri khamphani dza phesenthe dza 78 dzi thola muthu dzo sedza uri vhathu vha nga ḓitika nga onoyo muthu naa. U guda u vha muthu ane vhaṅwe vha nga ḓitika ngae zwino, zwi ḓo ni thusa na musi no no aluwa.
Sarah o amba uri: “Vhabebi vhanga vha a zwi ṱhogomela musi ndi tshi sumbedza uri ndi nga kona u hwala vhuḓifhinduleli na u ita mishumo ya hayani vha songo thoma vha nkhumbudza. Musi ndi tshi ita zwenezwi, zwi ita uri vha mpfulufhele na u fhirisisa.”
ZWINE BIVHILI YA AMBA: ‘Ndi fhulufhela uri u ḓo ita zwe nda u humbela, na zwi fhiraho zwenezwo.’—Filemoni 21.
Ni songo fhela mbilu. Zwi a leluwa u vhona uri ṅwana u khou lapfa na uri u khou aluwa, fhedzi zwi nga dzhia tshifhinga u vhona uri o no aluwa lune a nga kona u hwala vhuḓifhinduleli.
Brandon o amba uri: “Ni nga si ite uri vhabebi vhaṋu na vhaṅwe vha ni fhulufhele nga luthihi fhedzi, zwi dzhia tshifhinga nahone zwi ṱoḓa uri ni ḓidine vhukuma. Ni nga kona u ita uri vha ni fhulufhele arali na bvela phanḓa na u sumbedza uri ni nga kona u hwala vhuḓifhinduleli.”
ZWINE BIVHILI YA AMBA: “Ambarani . . . u sa fhela mbilu.”—Vhakolosa 3:12.
