Khosi ya Siria, Benihadada, o vha a tshi dzulela u lwa na Isiraele. Fhedzi tshifhinga tshoṱhe muporofita Elisha o vha a tshi vhudza khosi ya Isiraele nga ha khombo, zwa ita uri i kone u shavha. Benihadada a phetha nga uri u ḓo ya u fara Elisha. A wanulusa uri Elisha o vha e muḓini wa Dothani, nahone a rumela mmbi ya Vhasiria henefho uri i mu fare.

Vhasiria vha ḓa ha Dothani vhusiku. Nga matsheloni, mushumeli wa Elisha a bvela nnḓa nahone a vhona muḓi wo tangiwa nga mmbi khulwane. A dzhenwa nga nyofho nahone a vhidzelela Elisha a ri: ‘Elisha, ri ḓo ita mini?’ Elisha a mu vhudza a ri: ‘Vhane vha vha na riṋe ndi vhanzhi u fhira vhane vha vha navho.’ Nga tshenetsho tshifhinga, Yehova a ita uri mushumeli wa Elisha a vhone uri thavha dzo tangaho muḓi dzo vha dzo ḓala dzibere na gariki dza nndwa dza mulilo.

Musi maswole a Vhasiria a tshi lingedza u fara Elisha, a rabela a ri: ‘Yehova, ndi humbela uri u ite uri vha si tsha vhona.’ Nga u ṱavhanya, naho vho vha vha kha ḓi kona u vhona, maswole o vha a si tsha ḓivha uri a ngafhi. Elisha a vhudza maswole a ri: ‘Ni muḓini u si wone.  Ntevheleni, ndi ḓo ni isa kha munna ane na khou mu ṱoḓa.’ Vha tevhela Elisha u vhuya u swika Samaria, hune khosi ya Isiraele ya dzula hone.

Zwo vha zwi si tsha thusa kha Vhasiria musi vha tshi thoma u vhona uri vha ngafhi. Khosi ya Isiraele ya vhudzisa Elisha ya ri: ‘Naa ndi vha vhulaye?’ Naa Elisha o shumisa tshenetshi tshibuli u itela u lifhedza vhathu vhe vha vha tshi khou ṱoḓa u mu vhulaya? Hai. Elisha o ri: ‘Ni songo vha vhulaya. Vha ṋeeni zwiḽiwa, nahone ni vha litshe vha ṱuwe.’ Nga zwenezwo khosi ya vha itela tshimima tshihulu nahone nga murahu ya vha litsha vha ya hayani.