Zwe zwa bvelela Yeriko zwo mbo ḓi swika na kha dziṅwe tshaka dza Kanana. Mahosi adzo a kuvhangana u itela u lwa na Vhaisiraele. Fhedzi Vhagibeoni vha ḓa na maitele o fhambanaho. Vho ambara zwiambaro zwo ṱahalaho, vha ya ha Yoshua nahone vha ri: ‘Ri bva shangoni ḽa kule. Ro pfa nga ha Yehova na zwoṱhe zwe a ni itela zwone ngei Egipita na Moaba. Ri fhulufhedziseni uri a ni nga lwi na rine nahone ri ḓo vha vhashumeli vha vhoiwe.’

Yoshua a tenda zwe vha amba nahone a vha fhulufhedzisa uri ha nga ḓo lwa navho. Nga murahu ha maḓuvha mararu, a wanulusa uri a vha bvi shangoni ḽa kule. Vho vha vha tshi bva shangoni ḽa Kanana. Yoshua a vhudzisa Vhagibeoni a ri: ‘Ndi ngani no ri zwifhela?’ Vha fhindula vha ri: ‘Ro dzhenwa nga nyofho! Ri a zwi ḓivha uri Yehova u khou ni lwela. Ri humbela uri ni songo ri vhulaya.’ Yoshua a ita zwe a fhulufhedzisa nahone a si vha vhulaye.

Nga murahu ha tshifhinganyana, mahosi maṱanu a Vhakanana na mmbi dzavho vha shushedza Vhagibeoni. Yoshua na mmbi yawe vha  tshimbila vhusiku hoṱhe u ya u vha lamulela. Nndwa ya thoma nga matsheloni a ḓuvha ḽi tevhelaho. Vhakanana vha thoma u shavhela thungo dzoṱhe. Hoṱhe hune vha shavhela hone Yehova a vha rwa nga matombo mahulu a tshifhango. Nga murahu Yoshua a humbela uri ḓuvha ḽi ime fhethu huthihi. Ndi ngani a tshi nga humbela Yehova uri a ite zwenezwo ngeno zwo vha zwi sa athu vhuya zwa itea uri ḓuvha ḽi ime? Ndi ngauri Yoshua o vha a tshi fhulufhela Yehova. Ḓuvha a ḽo ngo kovhela u vhuya u swika Vhaisiraele vha tshi kunda mahosi a Vhakanana na mmbi dzavho.