Yehova a vhudza Mushe a ri: ‘Iḓani kha nṋe ngeno thavhani. Ndi ḓo ṅwala milayo yanga kha mbaba nda ni fha yone.’ Mushe a gonya thavhani a dzula henengei maḓuvha a 40 na vhusiku hao. Musi e henengei, Yehova a ṅwala Milayo ya Fumi kha mbaba mbili a dzi fha Mushe.

Nga murahu ha tshifhinga, Vhaisiraele vha humbula uri Mushe ha tsha ḓo vhuya. Vha ri kha Aroni: ‘Ri ṱoḓa muthu ane a nga ri ranga phanḓa. Ri iteleni mudzimu!’ Aroni a ri: ‘Mpheni musuku une na vha nawo.’ A ṋokisa wonoyo musuku, a u ita tshifanyiso tsha ṋamana. Vhathu vha ri: ‘Heyi ṋamana ndi Mudzimu washu we a ri bvisa Egipita!’ Vha thoma u rabela ṋamana ya musuku nahone vha vha na tshimima. Naa zwenezwo zwo vha zwo khakhea? Ee, ngauri vhathu vho vha vho fhulufhedzisa u rabela Yehova fhedzi. Fhedzi zwino a vha tsha ita zwe vha fhulufhedzisa.

 Yehova a tshi vhona zwe zwa vha zwi tshi khou bvelela a vhudza Mushe a ri: ‘Itsani ni humele vhathuni. A vha tsha nthetshelesa nahone vha khou rabela mudzimu wa mazwifhi.’ Mushe a tsa thavhani, o hwala mbaba mbili.

Musi e tsini na madenndeni, Mushe a pfa vhathu vha tshi khou imba. Nga murahu a vhona vha tshi khou tshina vha tshi khou rabela ṋamana. Mushe a sinyuwa zwihulu. A laṱa fhasi mbaba mbili nahone dza pwashekana. Nga u ṱavhanya a pwasha tshifanyiso. A vhudzisa Aroni a ri: ‘A vha vhathu vho zwi kona hani u ni sudzulusela u ita zwenezwi zwithu zwo vhifhaho?’ Aroni a ri: ‘Ni songo sinyuwa. Ni a zwi ḓivha uri havha vhathu vha hani. Vho ri vha khou ṱoḓa mudzimu, nga zwenezwo nda dzhenisa musuku wavho muliloni nahone nda ita heyi ṋamana!’ Aroni o vha a songo fanela u ita zwenezwo. Mushe a vhuyelela thavhani a humbela Yehova uri a vha hangwele.

Yehova o hangwela vhe vha mu thetshelesa. Naa ni a kona u vhona uri zwo vha zwi zwa ndeme lungafhani uri Vhaisiraele vha tevhele vhurangaphanḓa ha Mushe?