Nga murahu ha tshifhinga musi Yesu o no ḓivhonadza kha vhaapostola, Petro o ya u rea khovhe lwanzheni lwa Galilea. Thomasi, Yakobo, Yohane na vhaṅwe vhafunziwa vho ṱuwa nae. Vha rea vhusiku hoṱhe, fhedzi vha si fashe tshithu.

Nga matsheloni-tsheloni a ḓuvha ḽi tevhelaho, vha vhona munna o ima khunzi-khunzini. A vha vhidzelela e maḓini a ri: ‘No fasha khovhe?’ Vhone vha ri: “Hai!” Munna a ri: ‘Poselani mambule kha tshanḓa tsha u ḽa tsha tshikepe ni ḓo fasha.’ Musi vha tshi ita zwenezwo, vha si tsha kona u kokodzela mambule tshikepeni ngauri o vha a tshi khou lemela nga khovhe nnzhi dze vha fasha. Yohane o ṱavhanya a zwi ṱhogomela uri onoyo munna o vha e Yesu, a ri: “Ndi Murena!” Nga u ṱavhanya, Petro a fhufhela maḓini a bambela a ya khunzi-khunzini. Vhaṅwe vhafunziwa vha tevhela nga tshikepe.

 Musi vha tshi swika khunzi-khunzini, vha vhona hu tshi khou gotshiwa khovhe na vhurotho muliloni. Yesu o vha vhudza uri vha engedze zwiḽiwa nga dziṅwe dza khovhe dze vha fasha. A ri khavho: “Iḓani ni ḽe.”

Musi vha tshi fhedza u ḽa, Yesu o vhudzisa Petro a ri: ‘Naa ni a mpfuna u fhira u rea khovhe?’ Petro a ri: ‘Ee, Murena, ni a zwi ḓivha uri ndi a ni funa.’ Yesu a ri: ‘Kanzwani ngwana dzanga.’ Yesu a dovha a vhudzisa Petro a ri: ‘Petro, naa ni a mpfuna?’ Petro a ri: ‘Murena, ni a zwi ḓivha uri ndi a ni funa.’ Yesu a ri: ‘Lisani ngwana dzanga.’ Yesu a vhudzisa lwa vhuraru. Petro a ṱungufhala vhukuma. A ri: ‘Murena, ni ḓivha zwithu zwoṱhe; ni a zwi ḓivha uri ndi a ni funa.’ Yesu a ri: ‘Kanzwani ngwana dzanga.’ A vhudza Petro a ri: ‘Bvelani phanḓa ni tshi ntevhela.’