Musi Nebukadanetsara a tshi isa vhakololo vha Yuda ngei Babele, o vhea muḓinḓa wawe muhulwane ane a pfi Asipenasi uri a vha ṱhogomele. Nebukadanetsara a vhudza Asipenasi uri vhukati havho a khethe vhatukana vha re na mutakalo wavhuḓi na vho ṱalifhesaho. Vhenevha vhatukana vha ḓo funzwa lwa miṅwaha miraru. Yeneyo pfunzo yo vha i tshi ḓo vha lugiselela uri vha vhe vhaḓinḓa vha nṱha kha ḽa Babele. Vhenevha vhatukana vho vha vho tea u guda u vhala, u ṅwala na u amba luambo lwa Vhakaladea vha Babele. Nahone vho vha vha tshi lavhelelwa u ḽa zwiḽiwa zwi fanaho na zwa khosi na muṱa wayo. Vhatukana vhaṋa vho vha vhe Daniele, Henania, Misaele na Asaria. Asipenasi a vha ira madzina maswa a Babele: Beḽetsatsara, Shadaraka,  Mishaka na Abedenego. Naa yeneyo pfunzo yo vha i tshi ḓo ita uri vha litshe u shumela Yehova?

Havha vhatukana vhaṋa vho vha vho ḓiimisela u thetshelesa Yehova. Vho vha vha tshi zwi ḓivha uri a vho ngo fanela u ḽa zwiḽiwa zwa khosi ngauri Mulayo wa Yehova wo vha u tshi amba uri zwiṅwe zwazwo zwo vha zwi songo kuna. Ngauralo, vha ri kha Asipenasi: ‘Ri humbela uri ni songo ri fha zwiḽiwa zwa khosi.’ Asipenasi a ri: ‘Arali na sa ḽa zwone nahone khosi ya vhona u nga ni khou lwala, i ḓo mbulaya!’

Daniele a ḓelwa nga muṅwe muhumbulo. A vhudza muṱhogomeli wawe a ri: ‘Ri humbela uri ni ri fhe miroho na maḓi fhedzi lwa maḓuvha a fumi. Nga murahu ni ri vhambedze na vhatukana vhane vha ḽa zwiḽiwa zwa khosi.’ Muṱhogomeli wavho a tenda.

Nga murahu ha mulingo wa maḓuvha a fumi, Daniele na khonani dzawe tharu vha vhonala vhe na mutakalo wavhuḓisa u fhira wa vhaṅwe vhatukana. Yehova o vha o takala ngauri vho mu thetshelesa. O ita na u fha Daniele vhuṱali ha u pfesesa mabono na miḽoro.

Musi pfunzo yo no fhela, Asipenasi a isa vhatukana ha Nebukadanetsara. Khosi ya amba navho nahone ya ṱhogomela uri Daniele, Henania, Misaele na Asaria vho vha vho ṱalifhesa nahone vho fhaṱuwa u fhira vhaṅwe vhatukana. A khetha vhenevha vhaṋa uri vha shume nḓuni yawe. Tshifhinga tshinzhi khosi yo vha i tshi vha humbela nyeletshedzo kha mafhungo a ndeme. Yehova o vha ita uri vha ṱalifhe vhukuma u fhira vhanna vha vhuṱali vha khosi na vhamanditi.

Naho vho vha vhe shangoni ḽi si ḽa havho, Daniele, Henania, Misaele na Asaria a vho ngo hangwa uri vha vhathu vha Yehova. Naa na inwi ni ḓo dzula ni tshi humbula Yehova, na musi vhabebi vhaṋu vha siho tsini?