Ni ḓivha Ṱhanzi dza Yehova nngana? Vhaṅwe vhashu ri nga vha ri vhahura vhaṋu, vhashumisani na inwi kana ri tshi dzhena kilasini nthihi na inwi. Kana ri nga kha ḓi vha ro no haseledza na inwi nga ha Bivhili. Ri vhonnyi zwa vhukuma nahone ndi ngani ri tshi vhudza vhathu vhoṱhe zwine ra zwi tenda?

Ri vhathu vho ḓoweleaho. Ri bva kha vhubvo na vhuimo ho fhamba-fhambanaho. Vhaṅwe vhashu ro vha ri tshi dzhena kereke dzo fhamba-fhambanaho, ngeno vhaṅwe vhashu ro vha ri sa tendi kha Mudzimu. Naho zwo ralo, musi ri sa athu vha Dziṱhanzi roṱhe ro ḓiṋea tshifhinga tsha u ṱolisisa nga vhuronwane pfunzo dza Bivhili. (Mishumo 17:11) Ro tendelana na zwe ra zwi guda nahone ra ita phetho ya u gwadamela Yehova Mudzimu.

Ri a vhuyelwa nga u guda Bivhili. U fana na vhaṅwe vhathu, ri na thaidzo na vhushayanungo zwine ra kombetshedzea u sedzana nazwo. Fhedzi vhutshilo hashu ho shanduka vhukuma nge ra lingedza u shumisa maitele a Bivhili vhutshiloni hashu ha ḓuvha ḽiṅwe na ḽiṅwe. (Psalme ya 128:1, 2) Ndi ngazwo ri tshi vhudza vhaṅwe zwithu zwavhuḓi zwe ra zwi guda Bivhilini.

Ri tshila nga milayo ya Mudzimu. Yeneyo milayo ine ya funzwa Bivhilini, i ri thusa uri ri tshile nga nḓila yavhuḓi, ri ṱhonifhe vhaṅwe nahone ri vhe na pfaneleo dzi ngaho u fulufhedzea na vhuthu. I ita uri vhathu vhane vha tshila ngayo vha vhe na mutakalo wavhuḓi, vha vhuyedze tshitshavha nahone i ṱuṱuwedza vhuthihi muṱani na matshilele avhuḓi. Samusi ri na vhungoho ha uri “Mudzimu ha ṱaluli muthu,” ri vharathu na vhakomana vha muya vha shango ḽoṱhe vha re na vhuthihi, vha si na vengo ḽine ḽa bveledzwa nga tsinde na politiki. Naho ri vhathu vho ḓoweleaho, ro fhambana na vhaṅwe vhathu.—Mishumo 4:13; 10:34, 35.

• Ṱhanzi dza Yehova vha fana na vhaṅwe vhathu nga mini?

• Ndi milayo ifhio ye Ṱhanzi dza i guda musi dzi tshi vhala Bivhili?