1, 2. (a) Ndi tshifhio tshipiḓa tsho khetheaho tshine tsha tea u vhetshelwa thungo? (Sedzani tshifanyiso tshi re kha gwati.) (b) Ḽeneḽi bono ḽo ita uri vho thubiwaho vha vhe na vhungoho ha mini?

KHA BONO ḽawe ḽa u fhedza, Hesekiele u vhona tshipiḓa tsha shango tsho vhetshelwaho thungo u itela mushumo wo khetheaho. Tshenetshi tshipiḓa tsho vha tshi songo vhetshelwa thungo uri tshi ṋewe lushaka lwa Vhaisiraele sa ifa, fhedzi tsho vha tsho vhetshelwa Yehova. Hesekiele u dovha a vhona muḓi wo khetheaho u re na dzina ḽi mangadzaho. Tshenetshi tshipiḓa tsha bono tsho ita uri vhathu vho thubiwaho vha vhe na vhungoho ha uri: Yehova u ḓo vha navho musi vha tshi vhuyelela shangoni ḽa havho ḽine vha ḽi funa.

² Hesekiele u ri ṱalutshedza nga ha tshenetsho tshipiḓa nga vhuḓalo. Kha ri haseledze eneo mafhungo ane a amba zwinzhi kha riṋe sa vhagwadameli vha Yehova vha ngoho.

3. Ndi zwipiḓa zwifhio zwiṱanu zwe Yehova a zwi vhetshela thungo, nahone zwo vha zwi tshi shumiselwa mini? (Sedzani bogisi “Tshipiḓa Tshine Na Tea U Tshi Vhetshela Thungo.”)

³ Tshenetsho tshipiḓa tsha shango tsho khetheaho, tsho vha tshi khiḽomithara dza 13 u bva devhula u ya tshipembe na khiḽomithara dza 13 u bva vhubvaḓuvha u ya vhukovhela. Henefho fhethu he ha vha hu tshi lingana thungo dzoṱhe, ho vha hu tshi vhidzwa  “tshipiḓa.” Tsho vha tsho khethekanywa tsha vha zwipiḓa zwiraru. Tshipiḓa tsha nga nṱha tsho vha tshi tsha Vhalevi, tsha vhukati tshi tsha thembele na vhotshifhe. Zwenezwo zwipiḓa zwivhili zwo vha zwi tshi vhidzwa “fhethu hukhethwa.” Tshipiḓa tsha vhuraru tshe tsha vha tshi tshiṱuku kana “fhethu ho salaho,” tsho vha tshi tsha “muḓi.” Ho vha hu tshi ḓo shumiswa nga vhathu vha wonoyo muḓi.—Hesek. 48:15, 20.

4. Ri nga guda mini nga ha tshipiḓa tsho ṋewaho Yehova?

⁴ Ri nga guda mini kha mafhungo a ambaho nga ha tshipiḓa tshe tsha ṋewa Yehova? Yehova o thoma nga u vhetshela thungo tshipiḓa tsho khetheaho tsha shango, a sa athu u ṋea tshaka dza Isiraele shango. O vha a tshi khou sumbedza uri tshenetsho tshipiḓa tsha shango tshi tea u dzhiiwa tshi tsha ndeme. (Hesek. 45:1) Zwi tou pfala uri vhenevho vhathu vho thubiwaho vho guda kha nḓila ye shango ḽa kovhiwa ngayo uri ndi zwifhio zwine zwa vha zwa ndeme u fhira zwoṱhe. Vho vha vha tshi fanela u ita uri u gwadamela Yehova zwi ḓe u thoma vhutshiloni havho. Na riṋe ṋamusi ri dzhia u guda Ipfi ḽa Mudzimu, u ya miṱanganoni ya Vhukriste na u huwelela, zwi zwone zwa ndeme u fhira zwithu zwoṱhe vhutshiloni hashu. Musi ri tshi edzisa tsumbo ya Yehova ya u ita zwithu zwa ndeme u thoma, ri vha ri tshi khou ita uri u mu gwadamela zwi vhe zwone zwithu zwa ndeme u fhira zwithu zwoṱhe.

5, 6. (a) Muḓi wo vha u wa vhonnyi? (b) Muḓi a u ambeli kha mini, nahone ndi ngani ri tshi ralo?

⁵ Vhalani Hesekiele 48:15. “Muḓi” na shango ḽo u tangaho zwo vha zwi tshi imela mini? (Hesek. 48:16-18) Kha bono, Yehova o vha o vhudza Hesekiele uri: “Wonoyo muḓi u vhe . . . [wa] vhoṱhe vha nnḓu ya Isiraele.” (Hesek. 45:6, 7) Nga zwenezwo, muḓi na shango ḽo u tangaho zwo vha zwi si “fhethu hukhethwa” he ha vha ho fanela u ‘vhetshelwa Yehova.’ (Hesek. 48:9) Ri na zwenezwo muhumbuloni, kha ri haseledze nga ha zwine ra zwi guda ṋamusi nga ha nḓila ye muḓi wa vha wo dzudzanywa ngayo.

⁶ U itela uri ri ḓivhe zwine ra nga zwi guda kha wonoyu muḓi, ri fanela u thoma ra ḓivha zwine wa si vhe zwone. A si muḓi wa Yerusalema wo vusuluswaho na thembele yawo. Ndi ngani? Ndi ngauri muḓi we Hesekiele a u vhona kha bono a u na thembele. Zwiṅwe hafhu, wonoyo muḓi wo vha u sa ambeli kha muṅwe muḓi u re shangoni ḽa Isiraele ḽo vusuluswaho. Ndi ngani? Ndi ngauri vhathu vho vhuyaho vhuthubwani kana vhana vhavho, a vho ngo fhaṱa muḓi u re na zwithu zwo ṱaluswaho kha ḽeneḽo bono. Zwiṅwe hafhu, wonoyo muḓi a u ambeli kha muḓi wa ṱaḓulu. Ndi ngani? Ndi ngauri wo vha wo fhaṱwa fhethu “hu si hukhethwa.” Shango ḽi si ḽikhethwa ḽo vha ḽo fhambana na shango ḽo khethelwaho vhurabeli.—Hesek. 42:20.

7. Muḓi we Hesekiele a u vhona ndi mini, nahone zwi vhonala u nga u imela mini? (Sedzani tshifanyiso tsha u thoma.)

⁷ Muḓi we Hesekiele a u vhona ndi mini? Ri songo hangwa uri o vhona wonoyo muḓi na shango kha bono ḽithihi. (Hesek. 40:2; 45:1, 6) Ipfi ḽa Mudzimu ḽi sumbedza uri shango ḽine ḽa khou ambiwa  hafha ndi ḽa pfanyisedzo, na muḓi u fanela u vha u tshi ambela kha muḓi wa pfanyisedzo. Ipfi “muḓi” ḽi amba mini nga u tou angaredza? Ḽi ambela kha tshigwada tsha vhathu vhane vha dzula vhoṱhe nga nḓila yo dzudzanyeaho. Nga zwenezwo, zwi vhonala uri muḓi wo dzudzanyeaho zwavhuḓi u linganaho thungo dzoṱhe, we Hesekiele a u vhona u imela muvhuso wo dzudzanyeaho zwavhuḓi.

8. Wonoyu muvhuso u vhusa ngafhi, nahone ndi ngani zwo ralo?

⁸ Wonoyu muvhuso u vhusa ngafhi? Bono ḽa Hesekiele ḽi dzumbulula uri wonoyo muḓi u shangoni ḽa pfanyisedzo. Nga zwenezwo, wonoyu muvhuso u re pharadisoni ya pfanyisedzo u livhisa mushumo une wa itwa nga vhathu vha Mudzimu ṋamusi. U vha ha wonoyo muḓi fhethu hu si hukhethwa zwi sumbedza mini? Zwi ri humbudza uri wonoyo muḓi a si muvhuso wa ṱaḓulu, fhedzi ndi ndangulo i re kha ḽifhasi ine ya vhuyedza vhoṱhe vha dzulaho pharadisoni ya pfanyisedzo.

9. (a) Ndi vhonnyi vha re kha ndangulo i re kha ḽifhasi ṋamusi? (b) Yesu u ḓo ita mini musi a tshi vhusa lwa Miṅwaha ya 1 000?

⁹ Ndi vhonnyi vha re kha yeneyi ndangulo i re kha ḽifhasi? Kha bono ḽa Hesekiele, we a vha a tshi langa muḓi o vha a tshi vhidzwa “murangaphanḓa.” (Hesek. 45:7) O vha e mulavhelesi wa vhathu, fhedzi o vha e si tshifhe kana Mulevi. Onoyu murangaphanḓa u ri humbudza vhahulwane vha tshivhidzo ṋamusi vhane vha si vhe vhaḓodzwa. Vhenevha vhahulwane vhane vha lisa sambi ḽa Mudzimu nga lufuno, vha bva kha vha “dziṅwe nngu.” Vha shuma nga u ḓiṱukufhadza vha tshi livhiswa nga muvhuso wa Kristo u re ṱaḓulu. (Yoh. 10:16) Musi Yesu a tshi vhusa lwa Miṅwaha ya 1 000, u ḓo vhea vhahulwane kana “vhakololo” vha faneleaho “ḽifhasini ḽoṱhe.” (Ps. 45:16) Nga tshenetsho tshifhinga, vha ḓo livhiswa nga Muvhuso u re ṱaḓulu uri vha ṱhogomele vhathu vha Mudzimu.

10. Dzina ḽa wonoyo muḓi ndi ḽifhio, nahone ḽi khwaṱhisedza mini?

¹⁰ Vhalani Hesekiele 48:35. Wonoyo muḓi u pfi “Yehova U Henefho.” Ḽeneḽi dzina ḽi khwaṱhisedza uri zwi ḓo vhonala uri Yehova u hone kha wonoyo muḓi. Musi Yehova a tshi sumbedza Hesekiele wonoyu muḓi u re vhukati ha shango, zwo vha zwi tshi tou nga u khou vhudza vhathu vho thubiwaho uri: ‘Ndi ḓo dovha nda vha na inwi!’ Eneo maipfi a a khuthadza vhukuma!

11. Ri nga guda mini kha bono ḽa Hesekiele ḽa muḓi na zwine dzina ḽawo ḽa amba zwone?

¹¹ Ri nga guda mini kha honovhu vhuporofita ha Hesekiele? Dzina ḽa yeneyi ndangulo ine ya fana na muḓi, ḽi khwaṱhisedza roṱhe uri Yehova u dzula na vhashumeli vhawe vha fhulufhedzeaho zwino nahone u ḓo ḓi dzula navho. Ḽeneḽi dzina ḽi dovha ḽa ombedzela heyi ngoho: Hoyu muḓi a wo ngo vha hone u itela u ṋea muṅwe muthu maanḓa, fhedzi wo vha hone u itela u sumbedza nḓila ine Yehova a vha na lufuno ngayo na nḓila dzawe dzavhuḓi. Sa tsumbo, Yehova ho ngo ṋea ndangulo i re kha ḽifhasi maanḓa a u khethekanya shango kana uri i ite zwine ya zwi funa. Fhedzi Yehova u lavhelela uri vharangaphanḓa vha ṱhonifhe zwipiḓa zwa shango kana ndugelo dze a dzi ṋea vhashumeli vhawe, u katela na ‘vhashai.’—Mir. 19:17; Hesek. 46:18; 48:29.

12. (a) Ndi mini tsho khetheaho kha wonoyo muḓi, nahone zwi fanyisela mini? (b) Ḽeneḽi bono ḽi humbudza vhalavhelesi vha Vhakriste tshithu tshifhio tsha ndeme?

 ¹² Ndi tshifhio tshiṅwe tshithu tsho khetheaho nga ha muḓi une wa vhidzwa uri “Yehova U Henefho”? Naho miḓi ya kale yo vha i na mbondo dza u i tsireledza dze dza vha dzi na khoro dzi si gathi, hoyu muḓi u na khoro dza 12! (Hesek. 48:30-34) Dzenedzi khoro nnzhi (tharu kha lurumbu luṅwe na luṅwe lwa muḓi) dzi sumbedza uri vharangaphanḓa vha wonoyu muḓi vha a dzhenea nahone zwi a leluwa uri vhashumeli vha Mudzimu vha ambe navho. Zwiṅwe hafhu, u vha ha wonoyo muḓi na khoro dza 12, zwi ombedzela uri u dzula wo vulea kha “vhoṱhe vha nnḓu ya Isiraele.” (Hesek. 45:6) Samusi wonoyo muḓi u na khoro nnzhi, zwine zwa ita uri zwi leluwe u dzhena khawo, zwi humbudza vhalavhelesi vha Vhakriste tshithu tsha ndeme. Yehova u ṱoḓa uri vha dzhenee na u dzula vho lugela u thusa vhoṱhe vha dzulaho pharadisoni ya pfanyisedzo.

13. Yehova o amba mini nga ha mishumo yo fhambanaho ye ya vha i tshi ḓo itwa nga vhathu?

¹³ Kha ri humbule nga ha tshifhingani tsha Hesekiele, ri vhone zwiṅwe zwidodombedzwa zwe a ṅwala kha ḽeneḽi bono ḽa u kovhekanya shango. Yehova o amba nga ha vhathu vhe vha vha vha tshi khou ita mishumo yo fhambanaho. Vhotshifhe “vhane vha shuma nḓuni khethwa,” vho vha vha tshi fanela u amba na Yehova na u mu ṋekedza zwiṱhavhelo u itela u mu shumela. Vhalevi “vhane vha shuma thembeleni,” vho vha vha tshi fanela u ita “mishumo ya thembeleni na zwoṱhe zwine zwa fanela u itwa khayo.” (Hesek. 44:14-16; 45:4, 5) Zwiṅwe hafhu, ho vha hu tshi ḓo vha na vhathu vhane vha dzula vha tshi khou shuma tsini na muḓi. Vhenevho vhashumi ndi vhonnyi?

14. Vhe vha vha vha tshi shuma tsini na muḓi vha ri humbudza mini?

¹⁴ Vhathu vhane vha shuma tsini na wonoyo muḓi vha bva kha “tshaka dzoṱhe dza Isiraele.” Vha shuma u tikedza. Vha shuma u lima zwibveledzwa zwine zwa “ḓo vha zwiḽiwa zwa vhane vha shuma kha wonoyo muḓi.” (Hesek. 48:18, 19) Naa yeneyi nzudzanyo a i ri humbudzi nga ha tshibuli tshine ra vha natsho ṋamusi? Ee. Vhoṱhe vhane vha dzula pharadisoni ya pfanyisedzo ṋamusi, vha na tshibuli tsha u tikedza mushumo une wa itwa nga vharathu vha Kristo vho ḓodzwaho. Vha tikedza na mushumo une wa itwa nga vha “gogo ḽihulu” vhe Yehova a vha vhea uri vha range phanḓa. (Nzumb. 7:9, 10) Ri sumbedza uri ri tikedza wonoyo mushumo nga u tevhela nga u ḓifunela vhulivhisi vhune ra ṋewa nga mulanda a fhulufhedzeaho.

15, 16. (a) Ri nga dovha ra guda mini kha bono ḽa Hesekiele? (b) Ri na tshibuli tsha u shela mulenzhe kha mishumo ifhio i fanaho na yeneyo?

¹⁵ Kha bono ḽa Hesekiele, ri guda tshiṅwe tshithu tsha ndeme nga ha mushumo washu wa u huwelela. Ri guda mini? Yehova u amba uri vhathu vha re kha tshaka dza 12 vhane vha si vhe Vhalevi, vha ḓo shuma fhethu huvhili: muṱani wa thembele na hune zwifuwo zwa fula hone. Vha shuma mini henefho? Tshaka dzoṱhe dzi ḓa muṱani wa thembele u itela u “rabela” na u ṋekedza Yehova  zwiṱhavhelo. (Hesek. 46:9, 24) Tshaka dzoṱhe dzi ḓa hune zwifuwo zwa fula hone u itela u tikedza nga u lima kha wonoyo muḓi. Ri nga guda mini kha vhenevha vhashumi?

¹⁶ Vha gogo ḽihulu vha na tshibuli tsha u shela mulenzhe ṋamusi kha mishumo i fanaho na ye ya itwa kha bono ḽa Hesekiele. Vha gwadamela Yehova “thembeleni yawe” nga u ṋekedza zwiṱhavhelo zwa u mu renda. (Nzumb. 7:9-15) Vha ita zwenezwi nga u shela mulenzhe kha mushumo wa u huwelela na nga u amba zwine vha zwi tenda musi vhe miṱanganoni ya tshivhidzo, nga u fhindula na nga u imba. Vha dzhia yeneyi nḓila ya u gwadamela Yehova hu zwone zwithu zwa ndeme zwine zwa tea u ḓa u thoma vhutshiloni havho. (1 Koron. 16:29) Zwiṅwe hafhu, vhunzhi ha vhathu vha Mudzimu vha a kona u tikedza ndangulo yawe nga nḓila nnzhi. Sa tsumbo, vha thusa nga u fhaṱa, u lugisa Holo dza Ṱhanzi Dza Yehova na zwifhaṱo zwa ofisi dza davhi. Vha dovha vha thusa kha miṅwe mishumo minzhi ine ya itwa ndanguloni ya Yehova. Vhaṅwe vha tikedza yeneyo mishumo nga u ṋeela nga tshelede. Musi vha tshi ita yeneyi mishumo yoṱhe ine ya fanyiswa na u lima, vha vha vha tshi khou ‘rendisa Mudzimu.’ (1 Vhakor. 10:31) Vha ita mushumo wavho nga u fhisea, vho takala ngauri vha a zwi ḓivha  uri Yehova u “takadzwa nga zwenezwo zwiṱhavhelo.” (Vhahev. 13:16) Naa ni khou shumisa zwenezwi zwibuli nga hune na nga kona ngaho?

17. (a) Ndi zwithu zwifhio zwi re kha bono ḽa Hesekiele zwine ra ḓo zwi vhona zwi tshi itea nga nḓila khulwane tshifhingani tshi ḓaho? (b) Ndi vhafhio vhane vha ḓo vhuyelwa nga ndangulo i re kha ḽifhasi musi Yesu a tshi vhusa lwa Miṅwaha ya 1 000?

¹⁷ Naa tshifhingani tshi ḓaho ri ḓo vhona hu tshi itea nga nḓila khulwane zwi re kha bono ḽa Hesekiele ḽa tshipiḓa tshi ṋewaho Yehova? Ee! Ṱhogomelani hezwi: Hesekiele o vhona uri tshipiḓa tsha shango tshi vhidzwaho “fhethu hukhethwa” tsho vha tshi vhukati ha shango. (Hesek. 48:10) Nga hu fanaho, nga murahu ha nndwa ya Haramagedo, Yehova u ḓo dzula na riṋe hu sa londwi hune ra ḓo vha ri tshi khou dzula hone. (Nzumb. 21:3) Musi Yesu a tshi vhusa lwa Miṅwaha ya 1 000, ndangulo i re kha ḽifhasi ine ya vha vhathu vho vhewaho uri vha ṱhogomele vhathu vha Mudzimu, i ḓo ṱhogomela vhathu vhoṱhe kha ḽifhasi. I ḓo livhisa nga lufuno vhathu vhoṱhe vhane vha ḓo vha vhe kha “ḽifhasi ḽiswa” vhane Mudzimu a vha ṱanganedza.—2 Pet. 3:13.

18. (a) Ndi ngani ri tshi nga vha na vhungoho ha uri ndangulo i re kha ḽifhasi i ḓo shumisana na Muvhuso wa Mudzimu? (b) Dzina ḽa muḓi ḽi ri khwaṱhisedza mini?

¹⁸ Ndi ngani ri tshi nga vha na vhungoho ha uri ndangulo i re kha ḽifhasi i ḓo shumisana na Muvhuso wa Mudzimu nga vhuḓalo? Nga nṱhani ha uri Ipfi ḽa Mudzimu ḽi bvisela khagala uri muḓi u re kha ḽifhasi u re na khoro dza 12 u tshimbidzana na muḓi u re ṱaḓulu u re na khoro dza 12. Wonoyo ndi muḓi Muswa wa Yerusalema une wa vha na vha 144 000 vhane vha ḓo vhusa na Kristo. (Nzumb. 21:2, 12, 21-27) Zwenezwi zwi sumbedza uri ndangulo i re kha ḽifhasi i ḓo tendelana na phetho dzoṱhe dzine dza ḓo itwa nga Muvhuso wa Mudzimu u re ṱaḓulu. Dzina ḽa wonoyo muḓi ḽine amba uri “Yehova U Henefho,” ḽi khwaṱhisedza roṱhe uri vhurabeli ho kunaho vhu ḓo dzula vhu hone nahone vhu ḓo dzula vhu tshi titima Pharadisoni lwa tshoṱhe. Ro lavhelela honoho vhumatshelo havhuḓi nga maṱo matswuku!