Tshifhingani tsho fhiraho, khandiso dzashu dzo vha dzi tshi amba uri muḓi wa Yerusalema wo guneaho u fanyisela Vhurereli ha Mazwifhi. Muḓini wa Yerusalema u sa fhulufhedzei, ho vha hu tshi gwadamelwa midzimu ya zwifanyiso nahone ho ḓala zwa tshanḓanguvhoni. Zwenezwo zwi ri humbudza zwine zwa khou itea zwino kha Vhurereli ha Mazwifhi. Fhedzi zwino kha khandiso dzashu u katela na yeneyi, a hu tsha fanyiswa kana u vhambedzwa mafhungo a vhuporofita na zwiṅwe zwithu nga nnḓa ha musi Bivhili yo zwi bvisela khagala. Naa hu na vhuṱanzi ho khwaṱhaho vhu bvaho Maṅwaloni vhu sumbedzaho uri muḓi wa Yerusalema u fanyisela Vhurereli ha Mazwifhi? Hai.

Ṱhogomelani zwi tevhelaho: Yerusalema ho vhuya ha vha fhethu ha vhurabeli ho kunaho; fhedzi nga murahu, vhadzulapo vha henefho vha vha vhagunei. Zwo fhambanaho na zwenezwo, Vhurereli ha Mazwifhi a ho ngo vhuya ha vha vhurabeli ho kunaho. Vhurereli ha Mazwifhi ho funza pfunzo dza mazwifhi u bva tshee ha thoma ḓanani ḽa vhuṋa ḽa miṅwaha C.E.

Zwiṅwe hafhu, musi muḓi wa Yerusalema wo no fheliswa nga Vhababele, Yehova o dovha a ṱanganedza vhathu vha wonoyo muḓi nahone wa dovha wa vha fhethu ha vhurabeli ho kunaho. Fhedzi Mudzimu ho ngo vhuya a ṱanganedza Vhurereli ha Mazwifhi nahone musi ho no fheliswa nga maṱungu mahulu, a vhu tsha ḓo dovha ha vha hone.

Zwino ri nga ri mini u ya nga zwe zwa ambiwa afho nṱha? Musi ri tshi guda nga ha vhuporofita vhu re Bivhilini vhu ambaho nga zwo iteaho muḓini wa Yerusalema u sa fhulufhedzei, ri nga amba uri ‘zwi fana na zwine ra khou zwi vhona ṋamusi kha Vhurereli ha Mazwifhi.’ Fhedzi a hu na vhuṱanzi ho khwaṱhaho vhu bvaho Maṅwaloni vhu sumbedzaho uri muḓi wa Yerusalema u fanyisela Vhurereli ha Mazwifhi.