1, 2. Ndi ngani nga zwiṅwe zwifhinga Yehova o shumisa mabono musi a tshi ḓivhadza ngoho vhashumeli vhawe vha re kha ḽifhasi?

KHA ri ri ni khou vhona muṱa u re na vhana vhaṱuku, wo dzula ṱafulani khishini u tshi khou guda Bivhili. Khotsi u sumbedza vhana zwifanyiso zwi sa konḓi u itela u vha thusa uri vha pfesese ngoho i re Bivhilini. Musi vhana vha tshi setshelela na u fhindula nga mafulufulu, zwi sumbedza uri khotsi u khou kona u vha swikelela mbilu. Khotsi u dovha a shumisa zwifanyiso u itela u thusa vhana vhawe uri vha pfesese musi vha tshi guda nga ha Yehova samusi vha tshee vhaṱuku.

² Nga hu fanaho, samusi ri vhana vhawe, Yehova o shumisa zwifanyiso u itela u ri thusa uri ri pfesese zwithu zwine ra sa kone u zwi vhona, zwe ra vha ri sa ḓo zwi pfesesa. Sa tsumbo, Yehova o sumbedza Hesekiele bono ḽi re na zwifanyiso zwi songo ḓoweleaho u itela u ṱalutshedza ngoho ya ndeme nga ha ene muṋe. Ro amba nga ha tshiṅwe tsha zwenezwi zwifanyiso kha ndima yo fhiraho ya yeneyi bugu. Zwino kha ri livhise ṱhogomelo kha tshipiḓa tshithihi fhedzi tsha tshenetsho tshifanyiso tshi mangadzaho, ri vhone uri u pfesesa zwine tsha amba zwone zwi nga ri thusa hani u sendela tsini na Yehova.

3. (a) U ya nga Hesekiele 1:4, 5, Hesekiele o vhona mini kha bono? (Sedzani tshifanyiso tsha u thoma.) (b) No ṱhogomela mini kha nḓila ye Hesekiele a ṅwala ngayo zwe a zwi vhona?

³ Vhalani Hesekiele 1:4, 5. Hesekiele o amba uri zwithu zwi ngaho “zwivhumbiwa zwiṋa” zwi tshilaho, zwi na tshivhumbeo tshi no nga tsha muruṅwa, tsha muthu na tsha phukha. Ṱhogomelani nḓila yo livhaho ye Hesekiele a ṅwala ngayo zwe a zwi vhona, o amba uri o vhona zwi ngaho zwivhumbiwa zwi tshilaho. Musi ni tshi vhala bono ḽoṱhe ḽa Hesekiele kha ndima 1, ni ḓo ṱhogomela uri onoyo muporofita u shumisesa maipfi a ngaho “zwine zwa nga,” “tou nga,” “ine ya nga” na “tshi ngaho.” (Hesek. 1:13, 24, 26) Zwi tou vha khagala uri Hesekiele o zwi ṱhogomela uri zwe a zwi vhona zwo vha zwi tshi tou fana kana zwi tshi fanyisela zwithu zwi sa vhonali zwi re ṱaḓulu.

4. (a) Zwe Hesekiele a zwi vhona kha bono zwo mu kwama hani? (b) Hesekiele o vha a tshi ḓivha mini nga ha vhakerube?

⁴ Hesekiele a nga vha o tshuwiswa nga zwe a zwi vhona kha bono na nga mibvumo. Mbonalo ya zwivhumbiwa zwiṋa zwi tshilaho yo vha i tshi nga “malasha ane a khou duga.” Zwi gidima nga “luvhilo lwa lupenyo.” Mubvumo wa phapha dzazwo wo vha “u tshi tou nga mubvumo wa maḓi,” musi zwi tshi tshimbila ho vha “hu tshi pfala mutsindo u ngaho wa mmbi.” (Hesek. 1:13, 14, 24-28; sedzani bogisi “Musi Ndo Lavhelesa Zwivhumbiwa Zwi Tshilaho.”) Nga murahu, Hesekiele o amba uri zwenezwi zwivhumbiwa zwiṋa zwi tshilaho ndi “vhakerube” kana vharuṅwa vha re na maanḓa. (Hesek. 10:2) Samusi khotsi a Hesekiele vho vha vhe tshifhe, zwi tou pfala uri a nga vha o vha a tshi zwi ḓivha uri vhakerube vha tshimbidzana na u vha hone ha Mudzimu na uri ndi vhashumeli Vhawe.—1 Koron. 28:18; Ps. 18:10.

5. (a) Vhakerube na zwifhaṱuwo zwavho zwiṋa vho sumbedza hani uri Yehova u na maanḓa mahulu na vhugala? (b) Ndi ngani tshenetshi tshipiḓa tsha bono tshi tshi ri humbudza zwine dzina ḽa Mudzimu ḽa amba zwone? (Sedzani ṱhaluso i re magumoni a siaṱari.)

⁵ Vhalani Hesekiele 1:6, 10. Hesekiele o dovha a ṅwala uri mukerube muṅwe na muṅwe o vha e na zwifhaṱuwo zwiṋa, tshifhaṱuwo tsha muthu, tsha ndau, tsha mboho na tsha goni. Musi Hesekiele a tshi vhona zwenezwi zwifhaṱuwo, zwi fanela u vha zwo ita uri a humbulese nga ha nḓila ine Yehova a vha ngayo na maanḓa na vhugala. Ndi ngani? Zwa ndeme vhukuma ndi uri tshifhaṱuwo tshiṅwe na tshiṅwe tshi re kha zwenezwo zwivhumbiwa, tshi na zwine tsha imela zwone. Tshiṅwe tshi imela tshirunzi na maanḓa. Ndau ndi phukha ya ḓaka i re na tshirunzi, mboho ndi tshifuwo tshi mangadzaho, goni ndi tshiṋoni tshi re na maanḓa, muthu ndi tsiko ya Mudzimu yo khetheaho kha ḽifhasi, u vhusa zwiṅwe zwivhumbiwa zwoṱhe zwi re kha ḽifhasi. (Ps. 8:4-6) Fhedzi kha ḽeneḽi bono, Hesekiele o vhona uri zwenezwo zwifhaṱuwo zwoṱhe zwiṋa zwi re kha vhakerube vha re na maanḓa, zwo vha zwi nga fhasi ha khuluṋoni ya Yehova ane a vha Muvhusahoṱhe Muhulwane wa zwithu zwoṱhe. Yeneyi ndi nḓila yo teaho ya u sumbedza uri Yehova a nga shumisa tsiko yawe u itela u swikela tshipikwa tshawe! * Na muphisalema o amba zwi tevhela nga ha Yehova: “Vhugala hawe vhu nṱha ha ḽifhasi na ḽiṱaḓulu.”—Ps. 148:13.

6. Hesekiele a nga vha o thuswa nga mini uri a pfesese zwine zwifhaṱuwo zwiṋa zwa dovha zwa imela zwone?

⁶ Musi ho no fhela tshifhinga Hesekiele o no elekanya nga ha zwe a zwi vhona, a nga vha o zwi humbula uri vhashumeli vha Mudzimu  vhe vha tshila a sa athu u vha hone vho vhuya vhambedza zwipuka na zwiṅwe zwithu. Sa tsumbo, Yakobo muthomi wa lushaka o vhuya a vhambedza Yuda murwa wawe na ndau, a vhambedza Benyamini murwa wawe na ṱarelwa. (Gen. 49:9, 27) Ndi ngani? Ndi ngauri ndau na ṱarelwa zwi fanyisela zwe Yuda na Benyamini vha vha vha tshi ḓo vha zwone. Musi Hesekiele a tshi humbula dzenedzo tsumbo dzi re kha mafhungo e a ṅwalwa nga Mushe, a nga vha o humbula uri na zwifhaṱuwo zwa vhakerube zwo vha zwi na zwine zwa fanyisela zwone. Fhedzi zwo vha zwi tshi fanyisela mini?

7, 8. Kanzhi zwifhaṱuwo zwiṋa zwa vhakerube zwi tshimbidzana na mini?

⁷ Vhaṅwali vha Bivhili vhe vha tshila Hesekiele a sa athu u vha hone, vho amba uri ndau, goni na mboho zwi tshimbidzana na mini? Ṱhogomelani zwe Bivhili ya zwi amba: “Munna a re na tshivhindi ane mbilu yawe ya fana na ya ndau.” (2 Sam. 17:10; Mir. 28:1) ‘Goni ḽi fhufhela’ nṱha na “maṱo aḽo a vhona zwa kule.” (Yobo 39:27, 29) “Maanḓa a mboho a ita uri hu vhe na khaṋo nnzhi.” (Mir. 14:4) Samusi zwo ambiwa lunzhi kha khandiso dzashu, u ya nga maṅwalo, tshifhaṱuwo tsha ndau tshi fanyisela u vha na tshivhindi tsha u haṱula nga nḓila yo teaho. Tshifhaṱuwo tsha goni tshi fanyisela vhuṱali ha u vhona zwi re kule nahone tshifhaṱuwo tsha mboho tshi fanyisela maanḓa mahulu.

⁸ Fhedzi hu pfi mini nga ‘tshifhaṱuwo tsha munna’? (Hesek. 10:14) Tshi fanela u vha tshi tshi fanyisela zwithu zwine phukha ya si kone u zwi ita, fhedzi zwine zwa kona u itwa nga vhathu samusi Mudzimu o vha sika a tshi ḓifanyisa. (Gen. 1:27) Zwenezwo zwithu zwine vhathu vha kona u zwi ita, zwo sumbedzwa zwavhuḓi kha milayo ya Mudzimu ine ya ri: “U tea u funa Yehova Mudzimu wau nga mbilu yau yoṱhe” na uri “u tea u funa muṅwe muthu vhunga u tshi ḓifuna.” (Dot. 6:5; Lev. 19:18) Musi ri tshi tevhedza yeneyi milayo nga u sumbedza uri ri funa vhaṅwe zwi tshi bva mbiluni, ri vha ri tshi khou sumbedza lufuno lune Yehova a vha nalwo. Muapostola Yohane o ṅwala uri: “Ri a funa, ngauri ndi ene o thomaho u ri funa.” (1 Yoh. 4:8, 19) Ndi ngazwo ‘tshifhaṱuwo tsha munna’ tshi tshi imela lufuno.

9. Ndi nnyi ane a vha na zwithu zwine zwifhaṱuwo zwa vhakerube zwa imela zwone?

⁹ Ndi nnyi ane a vha na zwithu zwine zwifhaṱuwo zwa vhakerube zwa imela zwone? Samusi zwifhaṱuwo zwi zwa vhakerube, ndi muṱa wa Yehova wa zwivhumbiwa zwawe zwi fhulufhedzeaho zwi re ṱaḓulu u re na zwenezwo zwithu. (Nzumb. 5:11) Zwiṅwe hafhu, samusi hu Yehova o ṋeaho vhakerube vhutshilo, o dovha a ita na zwine vha vha zwone. (Ps. 36:9) Nga zwenezwo, zwifhaṱuwo zwa vhakerube zwi fanyisela zwine Yehova a vha zwone. (Yobo 37:23; Ps. 99:4; Mir. 2:6; Mika 7:18) Yehova u sumbedza hani zwine a vha zwone?

10, 11. Ri vhuyelwa hani nga nḓila ine Yehova a sumbedza ngayo uri u na vhuṱali, maanḓa, lufuno na u haṱula nga nḓila yo teaho?

¹⁰ Khaṱhulo Yo Teaho. Samusi Yehova e Mudzimu ane a “funa khaṱhulo yo teaho,” ha “ṱaluli muthu.” (Ps. 37:28; Dot. 10:17) Ngauralo,  roṱhe ri nga vha vhashumeli vhawe, ra dzula ri tshi mu shumela na u wana phaṱhutshedzo dzi sa fheli hu sa londwi vhuimo hashu kana vhubvo hashu. Vhuṱali. Samusi Yehova Mudzimu “o ṱalifha,” o ri ṋea bugu yo ḓalaho “vhuṱali.” (Yobo 9:4; Mir. 2:7) U shumisa nyeletshedzo ya vhuṱali i bvaho Bivhilini zwi ri thusa u sedzana na thaidzo dza ḓuvha ḽiṅwe na ḽiṅwe na u ḓivha uri ri khou tshilela mini. Maanḓa. Samusi Yehova e Mudzimu a re na “maanḓa mahulu,” u shumisa muya wawe mukhethwa u itela u ri ṋea “maanḓa a songo ḓoweleaho.” Enea maanḓa a ri thusa uri ri kone u konḓelela milingo yoṱhe ine ra nga sedzana nayo.—Nah. 1:3; 2 Vhakor. 4:7; Ps. 46:1.

¹¹ Lufuno. Samusi Yehova e Mudzimu ane ‘lufuno lwawe lu sa shanduki lwa vha luhulu,’ ha laṱedzi vhagwadameli vhawe vha fhulufhedzeaho. (Ps. 103:8; 2 Sam. 22:26) Ri a ṱungufhadzwa nga nṱhani ha u vha na mutakalo u si wavhuḓi kana musi vhulala vhu tshi ita uri ri si tsha kona u shumela Yehova zwavhuḓi u fana na tshifhingani tsho fhiraho. Fhedzi ri khuthadzwa nga u ḓivha uri Yehova ha hangwi mishumo yashu yavhuḓi ye ra mu itela yone tshifhingani tsho fhiraho. (Vhahev. 6:10) A zwi timatimisi uri ri vho vhuyelwa nga maanḓa nga nḓila ine Yehova a sumbedza ngayo uri u na vhuṱali, maanḓa, lufuno na u haṱula nga nḓila yo teaho. Zwi ḓo ri vhuyedza na tshifhingani tshi ḓaho.

12. Ri fanela u humbula mini nga ha vhukoni hashu ha u pfesesa zwine Yehova a vha zwone?

¹² Ri fanela u humbula uri zwine ra kona u zwi pfesesa nga ha zwine Yehova a vha zwone, zwi tou vha “mishumo yawe i si gathi.” (Yobo 26:14) “Ri nga si kone u pfesesa Ramaanḓaoṱhe” ngauri “vhuhulwane hawe a vhu pfesesei.” (Yobo 37:23; Ps. 145:3) Ndi ngazwo ri tshi zwi ṱhogomela uri ri nga guda zwinzhi nga ha Yehova, fhedzi ri nga si kone u zwi ḓivha zwoṱhe. (Vhalani Vharoma 11:33, 34.) Zwi re zwone ndi uri bono ḽa Hesekiele ḽi dzumbulula uri ri nga si ḓivhe Mudzimu ra mu fhedza. (Ps. 139:17, 18) Zwenezwo zwo ombedzelwa hani kha bono?

13, 14. Zwifhaṱuwo zwiṋa zwa vhakerube zwi imela mini, nahone ndi ngani ri tshi ralo?

¹³ Kha bono, Hesekiele o vhona uri mukerube muṅwe na muṅwe o vha e na zwifhaṱuwo zwiṋa, hu si tshithihi. Zwenezwo zwi sumbedza mini? Bivhilini, nomboro 4 i anzela u shumiswa u itela u ambela kha tshithu tsho fhelelaho kana zwithu zwoṱhe. (Yes. 11:12; Mat. 24:31; Nzumb. 7:1) Kha ḽeneḽi bono, ri ṱhogomela uri Hesekiele o amba yeneyi nomboro lu fhiraho 10! (Hesek. 1:5-18) Zwino ri nga phetha nga ḽifhio? Samusi vhakerube vhaṋa vha tshi imela zwiṅwe zwivhumbiwa zwoṱhe zwi fhulufhedzeaho zwi re ṱaḓulu, na zwifhaṱuwo zwiṋa zwa vhakerube musi zwi tshi sedzwa khathihi, zwi imela kana u katela zwoṱhe zwine Yehova a vha zwone. *

¹⁴ U itela u vhona uri zwifhaṱuwo zwiṋa zwa vhakerube a zwi ambeli fhedzi kha khaṱhulo yo teaho, vhuṱali, maanḓa na lufuno, kha ri vhambedze na zwine zwa itea kha malinga maṋa kha ḽeneḽi bono.  Linga ḽiṅwe na ḽiṅwe ḽi a mangadza, fhedzi musi wo a sedza oṱhe nga khathihi, a vha o tika pulatifomo ye gariki ya dzula khayo. Nga nḓila i fanaho, musi zwifhaṱuwo zwiṋa zwi tshi sedzwa khathihi, zwi vha zwi tshi khou sumbedza khaṱhulo yo teaho, vhuṱali, maanḓa na lufuno. Zwi dovha zwa sumbedza nḓila i mangadzaho ine Yehova a vha ngayo.

15. Hesekiele o ṱuṱuwedzwa nga ngoho ifhio ye a i guda kha bono ḽa u thoma ḽe a sumbedzwa?

¹⁵ Kha bono ḽawe ḽa u thoma, Hesekiele o ṱuṱuwedzea na u guda ngoho ya ndeme nga ha vhushaka hawe na Yehova. Ngoho ifhio? Yeneyo ngoho yo sumbedzwa kha maipfi a u thoma a bugu ya Hesekiele. Hesekiele o amba uri o vha e “shangoni ḽa Vhakaladea.” O dovha a amba zwe zwa itea musi e henefho. O ri: “Tshanḓa tsha Yehova tsho ḓa khae e henefho.” (Hesek. 1:3) Ṱhogomelani uri Hesekiele o amba uri o sumbedzwa bono e henefho Babele, ho ngo sumbedzwa bono e Yerusalema. * Zwino zwenezwi zwo dzumbululela mini Hesekiele? Zwo dzumbulula uri naho o vha e muthu zwawe o thubiwaho, e kule na muḓi wa Yerusalema na thembele yawo, o vha a siho kule na Yehova na vhurabeli Hawe. U ḓivhonadza ha Yehova kha Hesekiele  e Babele zwo sumbedza uri u gwadamela Mudzimu kha vhurabeli ho kunaho, a zwi ḓitiki nga fhethu kana vhuimo. Fhedzi zwo vha zwi tshi ḓitika nga u ḓiimisela ha Hesekiele na lutamo lwawe lwa u shumela Yehova.

16. (a) Ndi khwaṱhisedzo ifhio ine ra nga i wana kha bono ḽa Hesekiele? (b) Ndi mini zwi itaho uri ni shumele Yehova nga mbilu yaṋu yoṱhe?

¹⁶ Ndi ngani ngoho ye Hesekiele a i guda i tshi ri khuthadza ṋamusi? I ri khwaṱhisedza uri musi ri tshi shumela Yehova nga mbilu yoṱhe, u dzula e tsini na riṋe hu sa londwi hune ra dzula hone, uri ro tsikeledzea lungafhani kana vhuimo vhune ra vha khaho. (Ps. 25:14; Mish. 17:27) Yehova ha ri fheleli mbilu nga nṱhani ha uri u funa vhashumeli vhawe nga lufuno lu sa shanduki. (Ek. 34:6) Nga zwenezwo, Yehova u ḓo dzula a tshi ri funa nga lufuno lu sa shanduki. (Ps. 100:5; Vharoma 8:35-39) Zwiṅwe hafhu, ḽeneḽi bono ḽi sumbedzaho maanḓa a Yehova na uri ndi mukhethwa, ḽi ri humbudza uri Yehova o tewa nga uri ri mu gwadamele. (Nzumb. 4:9-11) Ri livhuwa zwingafhani uri Yehova o shumisa mabono o raloho u itela u ri thusa uri ri pfesese ngoho ya ndeme nga hae na zwine a vha zwone! U pfesesa zwine Yehova a vha zwone, zwi ri sendedza tsini nae, zwa ita uri ri mu rende na u mu shumela nga mbilu dzashu dzoṱhe na nga maanḓa ashu oṱhe.—Luka 10:27.

17. Ri ḓo fhindula mbudziso dzifhio kha ndima dzi tevhelaho?

¹⁷ Zwi ṱungufhadzaho ndi uri vhurabeli ho kunaho ho vha ho tshikafhala misini ya Hesekiele. Zwo ḓa hani? Yehova o ita mini? Nahone zwenezwo zwiitea zwa kale zwi amba mini kha riṋe ṋamusi? Ri ḓo fhindula dzenedzi mbudziso kha ndima dzi tevhelaho.