Vhurifhi Vhu Bvaho Kha Tshigwada Tshi Langaho
Ni “fanela u vha vhagudisi.” (Vhaheb. 5:12) Humbulani! Yehova ane a vha Mugudisi muhulwanesa ḽifhasini ḽoṱhe uri ramba uri ri funze vhaṅwe nga hae! Mushumo muṅwe na muṅwe wa u funza nga ha Yehova—muṱani, tshivhidzoni kana vhuḓinḓani ndi ndugelo yavhuḓi vhukuma nahone ndi vhuḓifhinduleli vhuhulwane. Ri nga bvelela hani?
Phindulo i wanala kha maipfi e muapostola Paulo a a ṅwalela Timotheo ane a ri: “Bvela phanḓa u tshi ita vhuḓidini ha u vhalela vhaṅwe khagala, u tshi ṱuṱuwedza, u tshi funza.” O dovha a ri: “Nga u ita zwenezwo u ḓo ḓitshidza nahone wa tshidza na vhane vha u thetshelesa.” (1 Tim. 4:13, 16) Mulaedza une na vha nawo u tshidza vhathu. Nga zwenezwo, ndi zwa ndeme uri ni khwinise nḓila ine na vhala na u funza ngayo. Hetshi tshibugwana tsho itelwa u ni thusa uri ni ite zwenezwo. Ṱhogomelani zwithu zwi si gathi zwine zwa vha khatsho.
Kha siaṱari ḽiṅwe na ḽiṅwe hu na luṅwalo lune lwa vha na maitele ane a vha Bivhilini kana tsumbo ya ngudo ine na khou shumela khayo
Yehova ndi “Mugudisi waṋu Muhulwane.” (Yes. 30:20. NW) Naho tshenetshi tshibugwana tshi tshi ḓo ni thusa uri ni vhe muvhali na mugudisi wa khwine, ni songo vhuya na hangwa uri hoyu mulaedza ndi wa Yehova na uri ndi ene ane a kokodzela vhathu khae. (Yoh. 6:44) Nga zwenezwo, humbelani muya wawe mukhethwa nga thabelo tshifhinga tshoṱhe. Shumisani Bivhili tshifhinga tshoṱhe. Isani vhugala kha Yehova, hu si kha inwi muṋe. Itani uri vhathetshelesi vhaṋu vha fune Yehova zwi tshi bva mbiluni.
No rambiwa uri ni funze mulaedza wa ndeme u sa athu u vhuya wa vha hone. Ri a fulufhela uri ni ḓo bvelela musi ni tshi ḓitika nga “nungo dze [na] ṋewa dzone nga Mudzimu.”—1 Pet. 4:11.
Vhahaṋu,
Tshigwada Tshi Langaho Tsha Ṱhanzi Dza Yehova
