1, 2. Ndi ngani hu tshi nga ambiwa uri Khosi Davida o vha a tshi ḓivha uri u sa fulufhedzea zwi hani?

 KHOSI DAVIDA o vha a tshi zwi ḓivha uri u sa fulufhedzea zwi hani. Nga tshiṅwe tshifhinga muvhuso wawe we wa vha u tshi vho tseka-tseka wo ṱoḓa u wiswa nga vhathu vha lushaka lwa hawe vhe vha mu itela tshimbevha. Zwiṅwe hafhu, Davida o ambululwa nga vhaṅwe vhathu vhe ra vha ri tshi nga vha dzhia vhe khonani dzawe khulwane. Kha ri ambe nga Mihali, musadzi wa Davida wa u thoma. U thomani o vha “a tshi funa Davida,” nahone a zwi timatimisi uri o vha a tshi mu tikedza kha vhuhosi hawe. Naho zwo ralo, nga murahu “a mu nyadza mbiluni yawe,” a dzhia Davida a “tshi nga muyaḓa.”—1 Samuele 18:20; 2 Samuele 6:16, 20.

² Hu dovha ha vha na Ahitofele mueletshedzi wa Davida. Nyeletshedzo yawe yo vha i tshi ṱhonifhiwa, zwa tou nga i bva ha Yehova nga ho livhaho. (2 Samuele 16:23) Fhedzi onoyu mueletshedzi a fulufhedzwaho a mbo ḓi vha mufheṱi nahone a ṱanganela na tshigwada tshe tsha shandukela Davida. Ndi nnyi we a vusa tshenetshi tshimbevha? Ndi Abesalomo, murwa wa Davida! Onoyo mudzia-tshimbevha o “tswa dzimbilu dza vhanna vhoṱhe vha Isiraele,” a thoma u vhanga vhuhosi. Vhuvutsheli ha Abesalomo ho ḓiṋea maanḓa lwe Khosi Davida a kombetshedzea u shavha u itela uri a sa vhulahwe.—2 Samuele 15:1-6, 12-17.

 3. Davida o vha e na fulufhelo ḽifhio?

³ Naa ho vha hu si na na muthihi we a sala a tshi fulufhedzea kha Davida? Kha maṱungu oṱhe e a sedzana nao, Davida o vha a tshi zwi ḓivha uri vhukuma u hone ane a fulufhedzea khae. O vha e nnyi? A nga vha nnyi arali e si Yehova Mudzimu. Davida o amba zwi tevhelaho nga ha Yehova: “Mufulufhedzei U mu ita nga u fulufhedzea.” (2 Samuele 22:26, vhambedzani NW.) U fulufhedzea ndi mini, nahone Yehova u vhea hani tsumbo i swayeaho ya yeneyi pfaneleo?

4, 5. (a) “U fulufhedzea” ndi mini? (b) U fulufhedzea hune ha sumbedzwa nga zwithu zwi sa tshili ho fhambana hani na u fulufhedzea hune ha sumbedzwa nga muthu?

⁴ Ipfi ḽine ḽa ri “u fulufhedzea” nga nḓila ye ḽa shumiswa ngayo Maṅwaloni a Luheberu, ḽi amba vhuthu vhune nga lufuno ha nambatela kha tshithu u swika ndivho yaho nga tshenetsho tshithu i tshi ḓadzea. Muthu ane a fulufhedzea u na lufuno. a Zwi takadzaho ndi uri mupsalme u amba uri ṅwedzi ndi “ṱhanzi i fulufhedzeaho makoleni a i zwifhi” ngauri u dzula u hone vhusiku. (Psalme ya 89:37, vhambedzani NW.) Kha haya mafhungo ṅwedzi u a fulufhedzea. Fhedzi ṅwedzi u nga si fulufhedzee u fana na muthu. Ndi ngani? Ngauri u fulufhedzea ha muthu hu tshimbidzana na lufuno—lune lwa sa kone u sumbedzwa nga zwithu zwi sa tshili.

⁵ U ya nga Maṅwalo, honohu u fulufhedzea hu tshimbidzana na maḓipfele. Nḓila ine u fulufhedzea ha shumiswa ngayo hu sumbedza uri hu na vhushaka vhukati ha muthu ane a sumbedza na ane a sumbedzwa yeneyi pfaneleo. U fulufhedzea ho raloho hu dzula hu hone. A hu fani na magabelo a lwanzhe ane a vhudzulelwa ngeno na ngei nga mimuya. Zwo fhambanaho na  zwenezwo, u fulufhedzea, kana lufuno lwa vhukuma, lwo dzika nahone lu na maanḓa a u sedzana na zwithivheli zwihulwane vhukuma.

 6. (a) U fulufhedzea hu shayea lungafhani kha vhathu, nahone zwenezwi zwi sumbedzwa hani Bivhilini? (b) Ndi ifhio nḓila ya khwine ya u ḓivha zwine zwa katelwa kha u fulufhedzea, nahone ndi ngani?

⁶ Ndi ngoho uri u fulufhedzea a ho ngo anda ṋamusi. Kanzhi khonani khulwane dzi a ‘tshinyana.’ Zwo anza u pfa nga ha vhavhingani vhe vha ṱalana. (Mirero 18:24; Maleaxi 2:14-16) Tshimbevha tsho ḓowelea lune ri nga ḓiwana ri tshi khou dovholola maipfi a muporofita Mixa ane a ri: “Kha shango vhane vha fulufhedzea vho fhela.” (Mixa 7:2, vhambedzani NW.) Naho kanzhi vhathu vha tshi kundwa u sumbedza vhuthu, Yehova u fulufhedzea nga nḓila i swayeaho. Zwi re zwone ndi uri nḓila khulwane ya u guda zwine zwa katelwa kha u fulufhedzea, ndi u ṱolisisa nḓila ine Yehova a sumbedza ngayo yeneyi pfaneleo khulwane ine ya tshimbidzana na lufuno lwawe.

7, 8. Ndi ngani hu tshi nga ambiwa uri ndi Yehova e eṱhe ane a fulufhedzea?

⁷ Bivhili i amba zwi tevhelaho nga ha Yehova: “Ndi’we u fulufhedzeaho Ú woṱhe.” (Ndzumbululo 15:4, vhambedzani NW.) Ndi ngani zwo ralo? Naa vhathu na vharuṅwa a vho ngo sumbedza u fulufhedzea nga nḓila i swayeaho? (Yobo 1:1; Ndzumbululo 4:8) Nahone hu pfi mini nga Yesu Kristo? Naa a si “mufulufhedzei” muhulwane wa Mudzimu? (Psalme ya 16:10, NW) Nga zwenezwo-ha, ndi ngani hu tshi nga ambiwa uri Yehova ndi ene e eṱhe a fulufhedzeaho?

⁸ Tsha u thoma, humbulani uri u fulufhedzea hu tshimbidzana na lufuno. Samusi ‘Mudzimu e ene lufuno,’ ndi nnyi ane a sumbedza yeneyi pfaneleo u fhira Yehova? (1 Yohane 4:8) Vhathu na vharuṅwa vha nga sumbedza pfaneleo dza Mudzimu u swika kha vhuṅwe vhuimo, fhedzi ndi Yehova fhedzi ane a fulufhedzea nga nḓila khulwane vhukuma. Samusi  e “Wa-Kale Wa-Maḓuvha,” o fhedza tshifhinga tshilapfu a tshi khou sumbedza vhuthu hu sa athu vha na zwivhumbiwa ṱaḓulu na kha ḽifhasi. (Daniele 7:9) Nga zwenezwo, Yehova ndi tshisima tsha u fulufhedzea. U sumbedza yeneyi pfaneleo u fhira tshivhumbiwa naho tshi tshifhio. Ṱhogomelani dziṅwe tsumbo.

 9. Yehova u a “fulufhedzea kha nḓila dzawe dzoṱhe,” nga nḓila-ḓe?

⁹ Yehova u a “fulufhedzea kha nḓila dzawe dzoṱhe.” (Psalme ya 145:17, vhambedzani NW.) Nga nḓila-ḓe? Psalme ya 136 i a fhindula. Henefho ho redzwa mishumo ya Yehova ya u tshidza, u katela na u tshidzwa ha Vhaisiraele nga nḓila i swayeaho Lwanzheni Lutswuku. Tshi swayeaho ndi uri ndimana iṅwe na iṅwe ya yeneyi psalme i ombedzela maipfi ane a ri: “ Vhuthu hawe [kana u fulufhedzea] ndi ha lini na lini.” Yeneyi psalme yo katelwa kha Mbudziso Dza U Elekanya kha siaṱari 289. Musi ni tshi vhala dzenedzo ndimana, ni ḓo takadzwa nga nḓila nnzhi dzine Yehova a sumbedza ngadzo vhathu vhawe vhuthu. Ee, Yehova u sumbedza u fulufhedzea hawe kha vhashumeli vhawe vha fulufhedzeaho, nga u thetshelesa zwililo zwavho musi vha tshi ṱoḓa thuso na nga u dzhia vhukando nga tshifhinga tsho fanelaho. (Psalme ya 34:6) Lufuno lune Yehova a vha nalwo kha vhashumeli vhawe lwo khwaṱha, arali fhedzi vha dzula vha tshi fulufhedzea khae.

10. Yehova u sumbedza hani u fulufhedzea malugana na zwilinganyo zwawe?

¹⁰ Zwiṅwe hafhu, Yehova u sumbedza u fulufhedzea kha vhashumeli vhawe nga u sa shandula zwilinganyo zwawe. U fhambana na vhathu vhane vha fara itshi na tshiḽa, vhane vha langiwa nga maḓipfele, Yehova ha shanduli mahumbulele awe malugana na zwo lugaho na zwo khakheaho. Mavhonele awe nga ha zwithu zwi ngaho vhungome, u gwadamela midzimu i sili, na vhuvemu, ho ngo shanduka kha zwigidi zwoṱhe zwa miṅwaha. O amba nga muporofita wawe Yesaya a ri: “Ni ḓo vhuya na kalaha ndi tshi ḓi ralo.” (Yesaya 46:4) Nga zwenezwo, ri nga vha na fulufhelo ḽa uri ri ḓo vhuyelwa arali ra tevhela vhulivhisi ho ṱaluswaho zwavhuḓi ha matshilele vhu re Ipfini ḽa Mudzimu.—Yesaya 48:17-19.

11. Ṋeani tsumbo u itela u sumbedza uri Yehova u a ita zwe a zwi fulufhedzisa.

 ¹¹ Yehova u dovha a sumbedza u fulufhedzea nga u ḓadzisa zwe a zwi fulufhedzisa. Musi a tshi amba zwithu hu tshee nga phanḓa, zwi a ḓadzea. Nga zwenezwo, Yehova o ri: “Na ipfi ḽanga ḽi bvaho mulomoni wanga . . . a ḽi nga vhuyi fhedzi ngeno hanga; tshaḽo, ḽi ḓo shuma zwi ntakadzaho, ḽi ḓo vuledza zwe nda ḽi rumela zwone.” (Yesaya 55:11) Yehova u sumbedza u fulufhedzea kha vhathu vhawe nga u ita zwe a zwi fulufhedzisa. Ha vha tikisi luwa. Yehova u a fulufhedzea vhukuma kha enea mafhungo lwe Yoshua mushumeli wawe a ri: “A ho ngo sala na ḽithihi ḽa mafhungo oṱhe avhuḓi e Yehova a amba na vha lushaka lwa Isiraele, ḽe ḽi si vulee; oṱhe o bvelela a vha hone.” (Yoshua 21:45) Nga zwenezwo, ri nga vha na vhungoho ha uri zwi nga si vhuye zwa itea uri Yehova a sa ite zwe a zwi fulufhedzisa.—Yesaya 49:23; Vha-Roma 5:5.

12, 13. Vhuthu ha Yehova ndi ha “lini na lini” nga nḓila-ḓe?

¹² Samusi ro zwi ṱhogomela u thomani, Bivhili i ri vhudza uri vhuthu ha Yehova “ndi ha lini na lini.” (Psalme ya 136:1) Ndi ngani zwo ralo? Nga muhumbulo wa uri Yehova u hangwela tshoṱhe zwivhi. Samusi zwo haseledzwa kha Ndima ya 26, Yehova ha tsha vusa zwivhi zwe a zwi hangwela muthu. Samusi “vho tshinya vhoṱhe, vhoṱhe vho ṱáhela vhurena ha Mudzimu,” roṱhe ri fanela u takalela uri vhuthu ha Yehova ndi ha lini na lini.—Vha-Roma 3:23.

¹³ Fhedzi vhuthu ha Yehova ndi ha lini na lini nga muṅwe muhumbulo. Ipfi ḽawe ḽi amba uri o lugaho “u ḓo nga muri wo simiwaho milongani ya maḓi, u aṋwaho mitshelo nga tshifhinga tsha hone, u sa omiho maṱari. Zwiné a ita zwoṱhe zwi a vulea.” (Psalme ya 1:3) Edzani u humbula muri u titimaho u sa omiho maṱari! Nga zwenezwo-ha, arali na riṋe ra takalela vhukuma Ipfi ḽa Mudzimu, ri ḓo tshila vhutshilo vhulapfu, vhu re na mulalo, na vhu vhuyedzaho. Phaṱutshedzo dzine Yehova a dzi ṋea vhashumeli vhawe vha fulufhedzeaho ndi dza nga hu sa fheli. I ngoho, shangoni ḽiswa ḽa u luga ḽine ḽa ḓo ḓiswa nga Yehova, vhathu vhawe vha fulufhedzeaho vha ḓo sumbedzwa vhuthu hawe lini na lini.—Ndzumbululo 21:3, 4.

14. Yehova u sumbedza hani uri u takalela u fulufhedzea ha vhashumeli vhawe?

¹⁴ Yehova o sumbedza u fulufhedzea hawe lunzhi-lunzhi. Samusi Yehova a sa shanduki, u fulufhedzea hune a hu sumbedza vhashumeli vhawe vha fulufhedzeaho hu nga si vhuye ha fhela. Mupsalme o ṅwala a ri: “Tshee nda bebwa nda vhuya nda kalaha, a thi athu u vhona muvhuya ó laṱiwa, a tho ngo vhona vhana vhawe vhó tshinyala. Yehova u funa mulayo; ha laṱedzi [“vhafulufhedzei,” NW] vhawe.” (Psalme ya 37:25, 28) I ngoho, ro tea u gwadamela Yehova ngauri ndi Musiki washu. (Ndzumbululo 4:11) Naho zwo ralo, samusi a tshi fulufhedzea, Yehova u takalela mishumo yashu ya u fulufhedzea.—Maleaxi 3:16, 17.

15. Ṱalutshedzani nḓila ine u shumisana ha Yehova na Vhaisiraele ha ombedzela ngayo u fulufhedzea Hawe.

¹⁵ Nga ṅwambo wa vhuthu hawe, Yehova u thusa lunzhi-lunzhi vhathu vhawe musi vhe mutsikoni. Mupsalme u a ri vhudza: “Vha funaho Yehova, vha hanaho vhuvhi, vha na Mulondi wavho; u ḓo tshidza mimuya ya vhavhuya vhawe zwanḓani zwa vhavhi.” (Psalme ya 97:10) Ṱhogomelani nḓila ye a shumisana ngayo na lushaka lwa Isiraele. Nga murahu ha u vhofhololwa nga lwa vhuṱolo Lwanzheni Lutswuku, Vhaisiraele vho imbela Yehova luimbo: “Vhau vhathu wo vha lamulela, wó vha ranga phanḓa nga vhuthu [kana “lufuno lwa vhukuma,” u ya nga ṱhaluso i re magumoni a siaṱari, NW]; Vusa maanḓa au U vha ise fhethu hau hukhethwa.” (Ekisodo 15:13) Vhukuma, u vhofhololwa Lwanzheni Lutswuku wo vha u musumbedzo wa uri u fulufhedzea ha Yehova ndi ha vhukuma. Nga zwenezwo, Mushe o vhudza Vhaisiraele a ri: “Yehova a tshi ni ṱalula a ni nanga kha tshakha dzoṱhe ha ngo ita nga u’ na vha vhanzhi; huufha ní lushaka luṱuku kha tshakha dzoṱhe! O ni nanga nga u’ a ni funa, uri a ite zwe a anela vho-khotsi-aṋu, a ni pfulusa nga tshanḓa tsha maanḓa, a ni lamulela ní nḓuni ya vhupuli, ní zwanḓani zwa Farao khosi ya Egipita.”—Doiteronomio 7:7, 8.

16, 17. (a) Vhaisiraele vho sumbedza hani u sa livhuha, fhedzi Yehova o vha pfela hani vhuṱungu? (b) Vhunzhi ha Vhaisiraele vho sumbedza hani uri a vha “tsha kona u dzivhelwa” nahone ndi tsevho ifhio ine ra i wana kha zwenezwi?

 ¹⁶ Vhukuma, lushaka lwa Isiraele lwo kundwa u livhuha vhuthu ha Yehova, ngauri nga murahu ha u vhofhololwa havho vho “ḓi dovha vha mu shandukela [Yehova] henengei phangani, vha vutshela wa Ṱaḓulu-ṱaḓulu.” (Psalme ya 78:17) Maḓanani a miṅwaha, vho shanduka lunzhi-lunzhi, vha ṱutshela Yehova nahone vha gwadamela midzimu ya mazwifhi na u tevhela maitele a vhuhedeni e a vha tshikafhadza. Naho zwo ralo, Yehova ho ngo fhelisa mulanga wawe. Nṱhani hazwo, Yehova o humbela vhathu vhawe nga muporofita Yeremia a ri: “Hee Isiraele, iwe mudzia-u-paṱa . . . Huma! A thi nga U kotamiseli tshifhaṱuwo tshanga, ngauri ndi̗ wa vhuthu [“ndi a fulufhedzea,” NW].” (Yeremia 3:12) Samusi ro zwi ṱhogomela kha Ndima ya 25, Vhaisiraele vhanzhi vho konyolela matanda nḓevheni. Vhukuma, “vhone vha vha vha u goḓa vhaḓinḓa vha Mudzimu, vha u nyadza zwe a amba, na vha u tamba nga vhaporofita vhawe.” Ha vha na mvelelo dzifhio? Mafheleloni “vhuhali ha Yehova ha vhuya ha duga ó sinyutshela vhathu vhawe, hu si tsha kona u dzivhelwa.”—2 Koronika 36:15, 16.

¹⁷ Ri guda mini kha zwenezwi? Uri u fulufhedzea ha Yehova a hu sumbedzwi muṅwe na muṅwe. Ndi ngoho uri Yehova u na “vhuhwavho vhuhulu,” nahone u takalela u sumbedza khathutshelo musi hu na tshiitisi tsha u ita nga u ralo. Fhedzi u ita mini musi muitazwivhi a tshi bvela phanḓa nga tshipimbi vhuvhini hawe? Kha vhuimo ho raloho, Yehova u nambatela zwilinganyo zwawe zwo lugaho nahone a ṋea khaṱulo i vhavhaho. Samusi Mushe o amba, ‘[Yehova] ha litshi u lifhedza.’—Ekisodo 34:6, 7.

18, 19. (a) U ṱarafa ha Yehova vhavhi zwi sumbedza hani uri u a fulufhedzea? (b) Yehova u ḓo sumbedza nga nḓila-ḓe u fulufhedzea hawe kha vhashumeli vhawe vhe vha tovholwa u swika vha tshi fa?

¹⁸ U ṱarafa ha Mudzimu vhaitazwivhi zwi sumbedza u fulufhedzea. Nga nḓila-ḓe? Muṅwe musumbedzo wa zwenezwi u wanala kha bugu ya Ndzumbululo kha ndaela dze Yehova a dzi  ṋea vharuṅwa vha sumbe: “Tshimbilani ni yo tevhutshela midzio iḽa miṱanu-na-mivhili ya mbiti dza Mudzimu kha ḽifhasi.” Musi muruṅwa wa vhuraru a tshi tevhula mudzio wawe “milamboni na zwisimani zwa maḓi,” zwo shanduka zwa vha malofha. Nga zwenezwo, onoyo muruṅwa a vhudza Yehova a ri: “A U khakhi [“u a fulufhedzea,” NW] Iwe U re hone, Iwe we wa vha Ú hone, Iwe ḽigala! Wo kona wa haṱula wa ralo! Ngauri vho shulula malofha a vhakhethwa na vhaporofita, zwino wo vha fha malofha uri vha nwe one. Zwo vha eḓana.”—Ndzumbululo 16:1-6.

¹⁹ Ṱhogomelani uri musi onoyo muruṅwa a tshi khou ḓivhadza wonoyo mulaedza wa khaṱulo, u amba uri Yehova “u a fulufhedzea.” Ndi ngani? Nga ṅwambo wa uri musi a tshi fhelisa vhavhi, Yehova u sumbedza u fulufhedzea kha vhashumeli vhawe, vhe vhunzhi havho vha tovholwa u swika vha tshi fa. Ngauri u a fulufhedzea, Yehova ha hangwi vhathu vho raloho. U ṱulutshela u dovha a vhona vhenevho vhathu vha fulufhedzeaho, nahone Bivhili i khwaṱhisedza uri o ḓiimisela u vha lambedza nga u vha vusa vhafuni. (Yobo 14:14, 15) Yehova ha hangwi vhashumeli vhawe vha fulufhedzeaho nga ṅwambo wa uri vho fa. Nṱhani ha zwenezwo, “vha khou mu tshilela  vhoṱhe.” (Luka 20:37, 38) Ndivho ya Yehova ya u vusa vhane a vha humbula ndi vhuṱanzi ho khwaṱhaho ha uri u a fulufhedzea.

20. Ndi vhafhio vhane vha vha “midzio yo khathutshelwaho,” nahone Yehova u sumbedza hani u fulufhedzea khavho?

²⁰ Kha ḓivhazwakale yoṱhe, Yehova o sumbedza u fulufhedzea hu swayeaho kha vhathu vha fulufhedzeaho. Zwi re zwone ndi uri kha zwigidi zwa miṅwaha, Yehova “ó fhedza a ḓi ita mbilu ndapfu-ndapfu, a dzula ó fara midzio ya mbiti nga zwavhuḓi, naho yó vha yó itelwa u pfi i ḓo lovha.” Ndi ngani? ‘U itela uri a ḓivhadze lupfumo lwa vhurena hawe kha midzio yo khathutshelwaho, yo itelwaho u pfi i ḓo vha ya vhurena.’ (Vha-Roma 9:22, 23) Yeneyi “midzio yo khathutshelwaho” ndi vhathu vhavhuḓi vho ḓodzwaho nga muyamukhethwa uri vha  vhe maḽaifa na Kristo Muvhusoni wawe. (Mateo 19:28) Nga u vulela nḓila yeneyi midzio yo khathutshelwaho, Yehova o dzula a tshi fulufhedzea kha Abrahamu, we a vhofha nae mulanga u tevhelaho wa fulufhedziso: “Dzitshakha dzoṱhe ndi ḓo dzi fhaṱutshedza nga vhana vhau; zwi ḓo ralo nga u’ wa pfa ipfi ḽanga.”—Genesi 22:18.

21. (a) Yehova u sumbedza hani u fulufhedzea kha vha “gogo ḽihulu” na vhane vha vha na tshilavhelelwa tsha u ponyoka “maṱunguni mahulu”? (b) U fulufhedzea kha Yehova hu ni sudzulusela u ita mini?

²¹ Yehova u sumbedza u fulufhedzea hu fanaho kha vha “gogo ḽihulu” vha re na tshilavhelelwa tsha u ponyoka “maṱunguni mahulu” nahone vha tshila tshoṱhe kha ḽifhasi ḽa paradiso. (Ndzumbululo 7:9, 10, 14) Naho vhashumeli vhawe vha songo fhelela, nga u fulufhedzea Yehova u vha vulela tshibuli tsha u tshila tshoṱhe kha ḽifhasi ḽa paradiso. U zwi ita hani zwenezwo? Nga tshirengululi—tshine tsha vha musumbedzo muhulwanesa wa u fulufhedzea ha Yehova. (Yohane 3:16; Vha-Roma 5:8) U fulufhedzea ha Yehova hu kokodza vhane mbilu dzavho dza tama u luga. (Yeremia 31:3) Naa a ni ḓipfi ni tsini-tsini na Yehova nga ṅwambo wa u fulufhedzea he a hu sumbedza na hune a kha ḓi ḓo hu sumbedza? Samusi ri tshi tama u sendela tsini na Mudzimu, u nga ri ri nga ṱanganedza lufuno lwawe nga u ḓiimisela u mu shumela nga u fulufhedzea.