1-3. Roṱhe ri zwivhotshwa zwa mini nahone Yehova u ḓo ri vhofholola hani?

EDZANI u humbula no gwevhelwa u dzula dzhele vhutshilo haṋu hoṱhe kha mulandu we ni si u ite. A hu na u vhofhololwa. Zwi vhonala ni si tsheena vhumatshelo nahone a hu na zwine na nga ita. Fhedzi ni tshee no fhulufhuwa no ralo, ni wana uri hu na muthu ane a vha na maanḓa a u ni bvisa dzhele nahone o fhulufhedzisa u ni thusa. No vha ni tshi ḓo ḓipfa hani?

² Roṱhe ri zwivhotshwa zwa lufu. A hu na vhushavhelo naho ra tou ita hani. Fhedzi Yehova u na maanḓa a u ri vhofholola kha lufu. O fhulufhedzisa uri “lufu ndi swina ḽa u fhedza ḽine a ḓo ḽi fhelisa.”—1 Vhakorinta 15:26.

³ Edzani u humbula uri ni ḓo takala hani musi ni si tsha vhilaela nga ha u fa. Yehova ha nga fhelisi lufu fhedzi. U ḓo vusa na vho faho. Zwenezwo zwi ḓo ni takadza vhukuma. U fhulufhedzisa uri “vha re mavhiḓani” vha ḓo dovha vha tshila. (Yesaya 26:19) Zwenezwi Bivhili i zwi vhidza u vuswa.

4. (a) Ri nga khuthadzwa nga mini musi ro felwa nga muraḓo wa muṱa kana khonani ya tsini? (b) Khonani dza Yesu dza tsini ho vha hu vhonnyi?

⁴ Musi muraḓo wa muṱa kana khonani ya tsini i tshi fa, vhuṱungu vhune ra vhu pfa vhu nga kha ḓi sa  konḓelelea. Ri pfa ro kulea nungo. A hu na tshine ra nga kona u tshi ita u vusa onoyo muthu. Fhedzi Bivhili i a ri khuthadza. (Vhalani 2 Vhakorinta 1:3, 4.) Kha ri ṱhogomele tsumbo nthihi ine ya sumbedza nḓila ye Yehova na Yesu vha ḓiimisela ngayo u vusa vhane ra vha funa. Musi Yesu a tshee kha ḽifhasi, kanzhi o vha a tshi dalela Lazaro na khaladzi dzawe, Marita na Maria. Vhuraru havho vho vha vhe khonani dza tsini dza Yesu. Bivhili i ri: “Yesu o vha a tshi funa Marita, Maria na Lazaro.” Nga ḽiṅwe ḓuvha, Lazaro a fa.—Yohane 11:3-5.

5, 6. (a) Yesu o ita mini musi a tshi vhona vha muṱa wa Lazaro na dzikhonani vha tshi khou lila? (b) Ndi ngani zwi tshi khuthadza u ḓivha nḓila ye Yesu a ḓipfa ngayo nga ha lufu?

⁵ Yesu o ya u khuthadza Marita na Maria. Musi Marita a tshi pfa uri Yesu u khou ḓa, a ya a mu ṱanganedza. O vha o takalela u vhona Yesu, fhedzi a ri khae: “Arali wo vha u fhano, ndi musi khaladzi anga a songo fa.” Marita o vha a tshi vhona u nga Yesu o no lenga vhukuma. Nga murahu ha zwenezwo, Yesu o vhona Maria a tshi khou lila. Musi a tshi vhona nḓila ye vha ṱungufhala ngayo, zwa mu pfisa vhuṱungu nahone a lila. (Yohane 11:21, 33, 35) O pfa vhuṱungu vhune ra vhu pfa musi ro felwa.

⁶ Zwi a ri khuthadza vhukuma u ḓivha uri Yesu u pfa vhuṱungu vhune ra vhu pfa nga ha lufu. Yesu u fana na Khotsi awe. (Yohane 14:9) Yehova u na maanḓa a u fhelisa lufu lwa tshoṱhe nahone ndi zwine a ḓo zwi ita hu si kale.

7, 8. Ndi ngani Marita o hana hu tshi bviswa tombo vhiḓani ḽa Lazaro, fhedzi Yesu o ita mini?

⁷ Musi Yesu a tshi swika vhiḓani he Lazaro a vhulungwa  hone, vhiḓa ḽo vha ḽo valwa nga tombo ḽihulu. Yesu a ri: “Bvisani tombo.” Fhedzi Marita a hana. Tshitumbu tsha Lazaro tsho vha tsho no fhedza maḓuvha maṋa tshi vhiḓani. (Yohane 11:39) Marita o vha a sa ḓivhi zwine Yesu a ḓo ita u itela u thusa khaladzi awe.

⁸ Yesu a ri kha Lazaro: “Ibva!” Zwe Marita na Maria vha zwi vhona zwo vha zwi tshi mangadza. ‘Lazaro a bva o pombiwa milenzhe na zwanḓa nga malabi.’ (Yohane 11:43, 44) Lazaro o vha o vuswa. O dovha a vha na muṱa wahawe na dzikhonani. Vho kona u mu kuvhatedza, u mu fara na u amba nae. Zwo vha zwi tshi mangadza vhukuma. Yesu o vusa Lazaro.

9, 10. (a) Ndi nnyi o ṋeaho Yesu maanḓa a u vusa vhathu? (b) Ndi ngani mafhungo a u vusa vhathu e a ndeme kha riṋe?

⁹ Naa Yesu o shumisa maanḓa awe a tshi vusa vhathu? Hai. Musi Yesu a sa athu u vusa Lazaro, o rabela Yehova nahone Yehova a mu ṋea maanḓa a u vusa Lazaro. (Vhalani Yohane 11:41, 42.) A ho ngo vuswa Lazaro fhedzi. Bivhili i ri vhudza nga ha ṅwananyana ane a vha na miṅwaha ya 12 we a vha a tshi khou lwala vhukuma. Khotsi awe Yairo o vha o hanganea nahone a luvheledza Yesu uri a fhodze ṅwananyana wawe. O vha e ṅwana wawe muthihi fhedzi. Musi a tshi khou amba na Yesu, vhaṅwe vhanna vha ḓa vha ri: “U songo tsha dina Mufunzi, ṅwananyana wau o lovha!” Fhedzi Yesu a ri kha Yairo: “U songo ofha, ivha na lutendo, ṅwananyana wau u ḓo vuwa.” Yesu a ya hayani ha Yairo nae. Musi vhe tsini na u swika muḓini, Yesu a vhona vhathu na u pfa vha tshi khou lila. Yesu a ri: “Litshani u lila, ngauri ho ngo fa, o eḓela.” Khamusi vhabebi vha onoyo  ṅwana vho vha vha sa pfesesi zwe Yesu a amba. Yesu a humbela vhathu vhoṱhe uri vha bvele nnḓa, ene a dzhena na vhabebi vha ṅwananyana kamarani ye a vha o eḓedzwa khayo. Yesu a mu fara zwavhuḓi nga tshanḓa a ri: “Ṅwananyana, vuwa!” Edzani u humbula nḓila ye vhabebi vhawe vha takala ngayo musi a tshi vuwa a thoma u tshimbila. Yesu o vha o vusa ṅwananyana wavho. (Marko 5:22-24, 35-42; Luka 8:49-56) U bva nga ḽeneḽo ḓuvha, musi vha tshi lavhelesa ṅwananyana wavho, vho humbula zwe Yehova a vha itela zwone a tshi shumisa Yesu. *

¹⁰ Vhathu vhe vha vuswa nga Yesu vho dovha vha fa. Fhedzi zwine ra zwi vhala Bivhilini nga ha vhenevha vhathu ndi zwa ndeme ngauri zwi ri ṋea fhulufhelo ḽa vhukuma. Yehova u ṱoḓa u vusa vhathu nahone u ḓo vha vusa.

11. Muhuweleli 9:5 i ri funza mini nga ha Lazaro?

¹¹ Bivhili i zwi vhea khagala uri “vho faho a vha ḓivhi tshithu.” Zwo vha zwo tou ralo kha Lazaro. (Muhuweleli 9:5) Samusi Yesu o amba, zwo vha zwi tshi tou nga Lazaro o eḓela. (Yohane 11:11) Musi Lazaro e vhiḓani o vha a sa “ḓivhi tshithu.”

12. Ri zwi ḓivha hani uri Lazaro o vuswa zwa vhukuma?

¹² Musi Yesu a tshi vusa Lazaro, vhathu vhanzhi vho zwi vhona. Na maswina a Yesu o vha a tshi zwi ḓivha  uri o ita honovhu vhuṱolo. Lazaro o vha a tshi khou tshila nahone zwenezwi zwo sumbedza uri o vuswa zwa vhukuma. (Yohane 11:47) Vhathu vhanzhi vho ya u dalela Lazaro, zwa ita uri vha tende uri Yesu o rumiwa nga Mudzimu. Maswina a Yesu ho ngo zwi takalela, a vhamba maano a u vhulaya Yesu na Lazaro.—Yohane 11:53; 12:9-11.

13. Ndi ngani ri tshi nga vha na vhuṱanzi ha uri Yehova u ḓo vusa vhafu?

¹³ Yesu o amba uri “vhoṱhe vha re mavhiḓani” vha ḓo vuswa. (Yohane 5:28) Zwenezwi zwi amba uri vhoṱhe vhane vha ḓo humbulwa nga Yehova vha ḓo dovha vha tshila. Fhedzi uri Yehova a vuse muthu, u fanela u humbula zwoṱhe nga ha onoyo muthu. Naa a nga kona u ita zwenezwo? Hu na ṋaledzi dza dzibiḽioni. Bivhili i amba uri Yehova u ḓivha ṋaledzi iṅwe na iṅwe nga dzina. (Vhalani Yesaya 40:26.) Arali a tshi kona u humbula ṋaledzi iṅwe na iṅwe nga dzina, zwi nga mu lelutshela u humbula zwiṅwe na zwiṅwe nga ha vhoṱhe vhane a ḓo vha vusa. Zwa ndeme vhukuma ndi uri Yehova o sika zwoṱhe, nga zwenezwo ri a ḓivha uri u na maanḓa a u vusa vhathu.

14, 15. Maipfi a Yobo a ri funza mini nga ha u vuswa ha vhafu?

¹⁴ Yobo munna a fhulufhedzeaho o vha a tshi tenda uri vhafu vha ḓo vuswa. O vhudzisa uri: “Arali muthu a fa, naa a nga dovha a tshila?” A dovha a ri kha Yehova: “U ḓo vhidzelela, nṋe nda aravha. U ḓo ṱuvha mushumo wa zwanḓa zwau.” Yobo o vha a tshi ḓivha uri Yehova u khou lavhelela tshifhinga tshine a ḓo vusa vhafu.—Yobo 14:13-15.

¹⁵ Ni ḓipfa hani nga ha uri vhathu vha ḓo vuswa? Ni nga vha ni tshi khou ḓivhudzisa uri, ‘Naa khonani dzanga  na vha muṱa wanga vho faho na vhone vha ḓo vuswa?’ Zwi a ri khuthadza u ḓivha uri Yehova u ṱoḓa u vusa vhafu. Kha ri vhone uri Bivhili i ri mini nga ha hune vha ḓo dzula hone na uri hu ḓo vuswa vhafhio.

16. Vho vuswaho vhane vha ḓo tshila kha ḽifhasi vha ḓo takalela vhutshilo ha mufuda-ḓe?

¹⁶ Tshifhingani tsho fhiraho, vhe vha vuswa vho dovha vha tshila na vha miṱa yavho na dzikhonani fhano kha ḽifhasi. Zwenezwi zwi ḓo dovha zwa itea tshifhingani tshi ḓaho, fhedzi zwi ḓo vha khwine vhukuma. Ndi ngani? Ndi ngauri vhane vha ḓo vuselwa kha ḽifhasi vha ḓo vha na tshibuli tsha u tshila tshoṱhe nahone vha nga si tsha dovha vha fa. Vha ḓo tshila kha ḽifhasi ḽo fhambanaho vhukuma na ḽine ra khou tshila khaḽo ṋamusi. Hu ḓo vha hu si na nndwa, vhutshinyi na malwadze.

17. Ndi vhafhio vhane vha ḓo vuswa?

¹⁷ Ndi vhafhio vhane vha ḓo vuswa? Yesu o ri “vhoṱhe vha re mavhiḓani vha ḓo pfa ipfi ḽawe vha bva.” (Yohane 5:28, 29) Na Nzumbululo 20:13 i ri: “Lwanzhe lwa bvisa vhafu vha re khalwo, na lufu na Vhiḓa zwa bvisa vhafu vha re khazwo.” Vhathu vha dzibiḽioni vha ḓo dovha vha tshila. Muapostola Paulo na ene o ri “vho lugaho na vha songo lugaho” vha ḓo vuswa. (Vhalani Mishumo 24:15.) Zwenezwo zwi amba mini?

18. Ndi vhafhio “vho lugaho” vhane vha ḓo vuswa?

¹⁸ “Vho lugaho” vha katela na vhashumeli vha Yehova vha fhulufhedzeaho vhe vha tshila musi Yesu a sa athu u ḓa kha ḽifhasi. Vhathu vha ngaho Noaxe,  Abrahamu, Sara, Mushe, Ruṱe na Esitere vha ḓo vuselwa u tshila kha ḽifhasi. Ni nga vhala nga ha vhaṅwe vha vhenevha vhanna na vhafumakadzi kha Vhahevheru ndima 11. Hu ḓo itea mini nga vhashumeli vha Yehova vha fhulufhedzeaho vhane vha fa misini yashu? Na vhone ‘vho luga,’ nga zwenezwo, vha ḓo vuswa.

19. Ndi vhafhio “vha songo lugaho”? Yehova u ḓo vha ṋea tshibuli tshifhio?

 ¹⁹ “Vha songo lugaho” vha katela vhathu vha dzibiḽioni vhe vha si wane tshibuli tsha u ḓivha Yehova. Naho vho fa, Yehova ho ngo vha hangwa. U ḓo vha vusa nahone vha ḓo vha na tshibuli tsha u guda nga hae na u mu shumela.

20. Ndi ngani hu sa ḓo vuswa vhathu vhoṱhe?

²⁰ Naa zwenezwi zwi amba uri hu ḓo vuswa vhathu vhoṱhe vhe vha fa? Hai. Yesu o ri vhaṅwe a vha nga vuswi. (Luka 12:5) Ndi nnyi ane a ḓo dzhia tsheo ya uri ndi vhafhio vhane vha ḓo vuswa? Yehova ndi ene amba-dzi-fhele, fhedzi o ṋea na Yesu maanḓa a uri “a vhe muhaṱuli wa vha tshilaho na vho faho.” (Mishumo 10:42) Ane a haṱulwa uri ndi muvhi kana a songo ḓiimiselaho u shanduka a nga si vuswe.—Sedzani Ṱhumetshedzo 19.

21, 22. (a) Vhane vha vuselwa ṱaḓulu vha vha vhe hani? (b) Ndi nnyi wa u thoma u vuselwa u tshila ṱaḓulu?

²¹ Bivhili i dovha ya ri vhudza uri vhaṅwe vhathu vha ḓo tshila ṱaḓulu. Musi muthu a tshi vuselwa ṱaḓulu, ha vuswi e na muvhili u fanaho na washu. U vuselwa u tshila ṱaḓulu e tshivhumbiwa tsha muya.

²² Yesu ndi muthu wa u thoma we a vuswa nga yeneyo nḓila. (Yohane 3:13) Nga murahu ha maḓuvha mararu Yesu o vhulawa, Yehova o mu vusa. (Phisalema 16:10; Mishumo 13:34, 35) Yesu ho ngo vuswa e na muvhili u fanaho na washu. Muapostola Petro u ṱalutshedza uri Yesu o “vhulawa, fhedzi a vuswa e na muvhili wa muya.” (1 Petro 3:18) Yesu o vuswa e tshivhumbiwa  tsha muya tshi re na maanḓa. (1 Vhakorinta 15:3-6) Bivhili i ri a si ene fhedzi ane a ḓo vuswa nga yeneyo nḓila.

23, 24. Vha “sambi ḽiṱuku” vhe Yesu a amba nga havho ndi vhafhio nahone ndi vhangana?

²³ Musi Yesu a sa athu u fa, o vhudza vhafunziwa vhawe vha fhulufhedzeaho a ri: “Ndi khou ya u ni lugiselela vhudzulo.” (Yohane 14:2) Hezwi zwi amba uri vhaṅwe vha vhatevheli vhawe vha ḓo vuselwa u tshila nae ṱaḓulu. Ndi vhangana? Yesu o ri ndi tshivhalo tshiṱuku, tshine tsha vha “sambi ḽiṱuku.” (Luka 12:32) Muapostola Yohane o amba tshenetsho tshivhalo musi a tshi vhona Yesu o ‘ima Thavhani ya Tsioni [ya ṱaḓulu], e na vha 144 000.’—Nzumbululo 14:1.

²⁴ Vhakriste vha 144 000 vha ḓo vuswa lini? Bivhili i ri vhudza uri zwenezwo zwo vha zwi tshi ḓo itea musi Kristo o no thoma u vhusa ṱaḓulu. (1 Vhakorinta 15:23) Ri khou tshila kha tshenetsho tshifhinga zwa zwino nahone vhunzhi ha vha 144 000 vho no vuselwa ṱaḓulu. Vhane vha kha ḓi vha kha ḽifhasi nahone vha fa misini yashu, vha vuswa nga u ṱavhanya uri vha yo tshila ṱaḓulu. Naho zwo ralo, tshifhingani tshi ḓaho vhunzhi ha vhathu vha ḓo vuselwa u tshila Pharadisoni fhano kha ḽifhasi.

25. Ri ḓo guda nga ha mini kha ndima i tevhelaho?

²⁵ Hu si kale, Yehova u ḓo vhofholola vhathu vhoṱhe kha lufu nahone lufu a lu tsha ḓo vha hone. (Vhalani Yesaya 25:8.) Fhedzi vhane vha ya ṱaḓulu vha ḓo ita mini henengei? Bivhili i ṱalutshedza uri vha ḓo vhusa na Yesu Muvhusoni wa ṱaḓulu. Ri ḓo guda zwo engedzeaho nga ha wonoyo Muvhuso kha ndima i tevhelaho.