Musi Yosefa e dzhele, Farao, khosi ya Egipita, o ḽora miḽoro ye ha si vhe na muthu we a kona u i ṱalutshedza. Muṅwe wa vhashumeli vhawe a vhudza Farao uri Yosefa a nga kona u mu ṱalutshedza zwine miḽoro yawe ya amba zwone. Farao a vhidza Yosefa nga u ṱavhanya.

Farao a mu vhudzisa a ri: ‘Naa ni nga kona u ṱalutshedza miḽoro yanga?’ Yosefa a ri kha Farao: ‘Egipita hu ḓo vha na zwiḽiwa zwinzhi lwa miṅwaha ya sumbe, nga murahu ha zwenezwo, hu ḓo vha na miṅwaha ya sumbe ya nḓala. Khethani muthu o ṱalifhaho ane a ḓo vhulunga zwiḽiwa u itela uri vhathu vhaṋu vha si fe nga nḓala.’ Farao a fhindula a ri: ‘Ndi khou khetha inwi! Ni ḓo vha muthu muhulwane wa vhuvhili kha ḽa Egipita!’ Yosefa o kona hani u ṱalutshedza miḽoro ya Farao? Yehova o thusa Yosefa.

Miṅwahani ya sumbe ye ya tevhela, Yosefa o kuvhanganya zwiḽiwa. Nga murahu, ha ḓa nḓala ḽifhasini ḽoṱhe, samusi Yosefa o amba. Vhathu vha bvaho thungo dzoṱhe vha ḓa ha Yosefa u renga zwiḽiwa. Khotsi awe, Yakobo, a pfa u ri hu na zwiḽiwa Egipita, nga zwenezwo, a rumela vhana vhawe vha vhatukana vha fumi henengei u renga zwiḽiwa.

Vhana vha Yakobo vha ya kha Yosefa nahone a vha ḓivha nga u ṱavhanya. Fhedzi vhakomana vhawe a vho ngo zwi ḓivha uri ndi Yosefa. Vho mu losha, samusi o vha a zwi lora musi a tshee muṱuku. Yosefa o vha a tshi ṱoḓa u vhona arali vhakomana vhawe vha tshi kha ḓi vha na vengo. A amba navho a ri: ‘Ni dziṱholi. No ḓa u ṱola he shango ḽi si tsireledzee hone.’ Vhone vha ri: ‘Hai! Ri vharathu na vhakomana vha 12 u bva Kanana. Muṅwe murathu washu o fa nahone muṱuku o  sala na khotsi ashu.’ Yosefa a ri: ‘Ndi ḓo tenda zwine na khou zwi amba arali na ḓa na murathu wa vhoiwe muṱuku.’ Nga zwenezwo, vha vhuyelela hayani kha khotsi avho.

Musi muṱa u tshi dovha wa fhelelwa nga zwiḽiwa, Yakobo a ruma vharwa vhawe Egipita. Zwa zwino vha ṱuwa na Benyamini, murathu wavho muṱuku. U itela u linga vhakomana vhawe, Yosefa a dzumba khaphu yawe ya siliva kha saga ḽa mavhele ḽa Benyamini nahone a pomoka vhakomana vhawe uri vho i tswa. Musi vhashumeli vha Yosefa vha tshi wana khaphu sagani ḽa Benyamini, vhakomana vhawe vha mangala vhukuma. Vha humbela uri Yosefa a dzhiele vhone vhukando nṱhani ha Benyamini.

Yosefa a vhona uri vhakomana vhawe vho shanduka. Yosefa a si tsha kona u ḓifara. A lila nahone a ri: ‘Ndi murathu waṋu Yosefa. Naa khotsi anga u kha ḓi tshila?’ Vhakomana vhawe vha mangala vhukuma. A ri khavho: ‘Ni songo vhilaela nga maanḓa nga ha zwe na zwi ita kha nṋe. Mudzimu o nthuma fhano u itela u ni tshidza. Zwino gidimani ni ye u dzhia khotsi anga.’

Vha humela hayani vha ya u vhudza khotsi avho mafhungo maḓifha nahone vha ṱuwa navho Egipita. Yosefa na khotsi awe vha dovha hafhu vha ṱangana nga murahu ha miṅwaha minzhi.