MAIPFI a tevhelaho a vhidzwa maipfi a ḓivheaho e a vhuya a ṅwalwa. “U rangani Mudzimu o sika ḽiṱaḓulu na ḽifhasi.” (Genesi 1:1) Nga eneo maipfi a pfalaho na a re na maanḓa, Bivhili i ri vhudza nga ha Muthu wa ndeme a re Maṅwaloni Makhethwa—Mudzimu ramaanḓaoṱhe, Yehova. Ndimana ya u thoma ya Bivhili i dzumbulula uri Mudzimu ndi Musiki wa fhethu hoṱhe, u katela na pulanete ine ra tshila khayo. Ndimana dzi tevhelaho dzi ṱalusa zwenezwo nga u tevhekana ha zwifhinga, zwine nga lwa pfanyisedzo zwa vhidzwa maḓuvha, Mudzimu o bvela phanḓa a tshi ri lugiselela ḽifhasi, a tshi sika zwithu zwoṱhe zwi mangadzaho zwi re hone kha shango ḽashu.

Tshithu tshihulwane tshe Mudzimu a tshi sika kha ḽifhasi ho vha hu muthu. Tsho vha tshi tshivhumbiwa tshe tsha sikwa nga tshifanyiso tsha Mudzimu—tshine tsha kona u sumbedza pfaneleo dza Yehova, dzi ngaho lufuno na vhuṱali. Mudzimu o vhumba muthu nga buse ḽa mavuni. Mudzimu o mu ira dzina ḽa Adamu, nahone a mu vhea paradisoni—tsimuni ya Edeni. Mudzimu nga dzawe ndi ene o itaho yeneyo tsimu, a i ḓadza nga miri yo nakaho na i aṋwaho mitshelo.

Mudzimu o vhona ṱhoḓea ya uri munna a vhe na mufarisi. A tshi shumisa iṅwe ya mbabvu dza Adamu, Mudzimu o ita musadzi nahone a mu ḓisa kha munna sa musadzi wawe, nahone nga murahu a vhidzwa Eva. Nga dakalo, Adamu o amba nga nḓila ya u renda, a ri: “Ngoyu-ha a re shambo ḽa shambo ḽanga, na ṋama ya ṋama yanga.” Mudzimu o amba uri: “Ndi zwine munna a ḓo sia khotsi-awe na mme-awe ngazwo’, a ḓo nambatela musadzi wawe, vha vha ṋama nthihi.”—Genesi 2:22-24; 3:20.

Mudzimu o ṋea Adamu na Eva milayo mivhili. Wa u thoma, o vha laya uri vha ṱhogomele haya havho nahone mafheleloni vha ḓadze shango nga vhana vhavho. Wa vhuvhili, o vha vhudza uri vha songo ḽa muri muthihi fhedzi kha minzhi ye ya vha i hone ngadeni, “muri wa u ṱalukanya vhuḓi na vhuvhi.” (Genesi 2:17) Arali vha sa thetshelesa, vho vha vha tshi ḓo fa. Nga yeneyo milayo, Mudzimu o ṋea munna na musadzi tshibuli tsha u sumbedza uri vha a mu ṱanganedza sa Muvhusi wavho. U thetshelesa havho ho vha hu tshi ḓo sumbedza uri vha a funa Mudzimu na u mu livhuha. Vho vha vhe na tshiitisi tsha u ṱanganedza vhuvhusi hawe havhuḓi. Vho vha vhe vhathu vho fhelelaho. Bivhili i ri vhudza uri: “Mudzimu a lavhelesa zwoṱhe zwe a ita a wana zwó naka nga ngoho.”—Genesi 1:31.

—Enea mafhungo a wanala kha Genesi dzindima 1 na 2.