NGUDO 6
Naa Vhafu Vha Ḓo Vuswa?
1. Ndi afhio mafhungo maḓifha nga ha vhafu?
Musi Yesu a tshi swika Bethania tsini na Yerusalema, ho vha ho no fhela maḓuvha maṋa Lazaro khonani yawe o lovha. Musi Yesu a tshi ya mavhiḓani, o ṱuwa na khaladzi dza mufu Marita na Maria. Ho mbo ḓi kuvhangana vhathu vhanzhi nga u ṱavhanya. Edzani u humbula nḓila ye Marita na Maria vha vha vho takala ngayo musi Lazaro a tshi vuswa!—Vhalani Yohane 11:21-24, 38-44.
Marita o vha a tshi vho ḓivha mafhungo maḓifha nga ha vhafu. O vha a tshi zwi ḓivha uri Yehova u ḓo vusa vho lovhaho uri vha dovhe vha tshile kha ḽifhasi.—Vhalani Yobo 14:14, 15.
2. Hu itea mini kha muthu musi o lovha?
Mudzimu o vhudza Adamu a ri: “U buse, u ḓo vhuyelela buseni.”—GENESI 3:19.
Vhathu vho sikwa nga buse. (Genesi 2:7; 3:19) A ri na muya u sa fi une wa tshila nga ngomu hashu. Musi ri tshi lovha, a huna tshithu tshine tsha bvela phanḓa tshi tshi khou tshila huṅwe fhethu. Musi ri tshi lovha na vhuluvhi hashu a vhu tsha shuma, ra si tsha kona u humbula. Ndi ngazwo Lazaro a songo amba tshithu nga ha zwe zwa itea musi o lovha ngauri vhafu a vha ḓivhi tshithu.—Vhalani Phisalema 146:4; Muhuweleli 9:5, 6, 10.
Naa Mudzimu u shengedza vhathu vho faho nga u vha fhisa muliloni? Samusi Bivhili i tshi sumbedza uri vhafu a vha ḓivhi tshithu, zwi khagala uri pfunzo ya mazwifhi ya uri hu na hele i tshinya dzina ḽa Mudzimu. Mudzimu u nengiswa nga yeneyi pfunzo ya uri u shengedza vhathu nga mulilo.—Vhalani Yeremia 7:31.
Ṱalelani vidio ine ya ri, Vhuimo Ha Vhafu Ndi Vhufhio?
3. Naa vhafu vha nga amba na riṋe?
Vhafu a vha koni u amba kana u pfa. (Phisalema 115:17) Fhedzi hu na vharuṅwa vhavhi vhane vha nga ḓiita vhathu vho faho u itela uri vha ambe na vhane vha khou tshila. (2 Petro 2:4) Yehova ha ṱoḓi ri tshi lingedza u amba na vhafu.—Vhalani Dotoronomio 18:10, 11.
4. Ndi vhafhio vhane vha ḓo vuswa?
Vhathu vhanzhi vho faho vha ḓo vuswa mavhiḓani vha dovha vha tshila kha ḽifhasi. Hu ḓo vuswa na vhaṅwe vhe vha vha vha sa ḓivhi Mudzimu, vhe vha ita zwithu zwivhi.—Vhalani Luka 23:43; Mishumo 24:15.
Vho vuswaho vha ḓo kona u guda mafhungo ngoho nga ha Mudzimu na u sumbedza uri vha na lutendo kha Yesu nga u mu thetshelesa. (Nzumbululo 20:11-13) Kha vho vuswaho, vhane vha ḓo ita zwithu zwavhuḓi vha ḓo ḓiphiṋa nga u tshila tshoṱhe kha ḽifhasi.—Vhalani Yohane 5:28, 29.
5. U vuswa ha vhafu zwi ri gudisa mini nga Yehova?
Mudzimu o rumela Murwa wawe uri a ri fele. Zwenezwo zwo ita uri zwi konadzee uri vhafu vha vuswe. U vuswa ha vhafu zwi ri gudisa uri Yehova u a ri funa na uri u na vhuthu vhuhulu. Musi vhafu vha tshi vuswa, ndi nnyi ane na ṱoḓa u mu vhona nga maṱo matswuku?—Vhalani Yohane 3:16; Vharoma 6:23.
