Mafhungo maḓifha a uri vhathu vha ḓo tshila tshoṱhe kha ḽifhasi o ṅwalwa Bivhilini. (Phisalema 37:29) Bivhili yo vhumbwa nga bugu ṱhukhu dza 66. Mudzimu o shumisa vhanna vha 40 vha fhulufhedzeaho uri vha i ṅwale. Bugu ṱhanu dza u thoma dzo ṅwalwa nga Mushe miṅwahani i ṱoḓaho u vha 3 500 yo fhiraho. Bugu ya u fhedza yo ṅwalwa nga muapostola Yohane miṅwahani i fhiraho 1 900 yo fhiraho. Zwe vhenevha vhaṅwali vha Bivhili vha zwi ṅwala vho zwi wana ngafhi? Mudzimu o amba na vhaṅwali vha Bivhili a tshi shumisa muya wawe mukhethwa. (2 Samuele 23:2) Vho ṅwala zwi bvaho ha Mudzimu, hu si mihumbulo yavho. Yehova ndi ene Muṅwali wa Bivhili.​—Vhalani 2 Timotheo 3:16; 2 Petro 1:20, 21.

Ṱalelani vidio ine ya ri, Bivhili Yo Ṅwalwa Nga Nnyi?

Ri a zwi ḓivha uri Bivhili i bva ha Mudzimu ngauri i amba ngoho nga ha zwine zwa ḓo itea tshifhingani tshi ḓaho. A hu na muthu ane a nga kona u ita zwenezwo. (Yoshua 23:14) Ndi Mudzimu Ramaanḓaoṱhe fhedzi ane a nga kona u vhona vhumatshelo ha vhathu.​—Vhalani Yesaya 42:9; 46:10.

Bivhili yo khethea ngauri i bva ha Mudzimu. Ho phaḓaladzwa Bivhili dza dzibilioni nga nyambo nnzhi. Naho Bivhili i ya kale, i tendelana na saintsi. Zwe vhaṅwali vhayo vha 40 vha zwi ṅwala a zwi hanedzani. * Zwiṅwe hafhu, Bivhili i sumbedza nga ho fhelelaho lufuno lune Mudzimu a vha nalwo. I dovha ya vha na maanḓa a u shandula vhathu uri vha tshile nga nḓila yavhuḓi. Zwenezwi zwi ita uri vhathu  vhanzhi vha tende uri Bivhili ndi Ipfi ḽa Mudzimu.​—Vhalani 1 Vhathesalonika 2:13.

Ṱalelani vidio ine ya ri, Ri Nga Vha Hani Na Vhungoho Ha Uri Bivhili Ndi Ya Ngoho?

Bivhili i ambesa nga ha mafhungo maḓifha a zwithu zwi takadzaho zwine Mudzimu a ḓo zwi itela vhathu. Maṅwalo a ṱalutshedza uri ndi ngani vhathu vha si tsha tshila pharadisoni kha ḽifhasi na nḓila ine pharadiso ya ḓo vusuluswa ngayo.​—Vhalani Nzumbululo 21:4, 5.

Bivhili i dovha ya vha na milayo na nyeletshedzo dzine dza ri thusa uri ri takale. Zwiṅwe hafhu, Bivhili i amba nga ha nḓila ye Mudzimu a shumisana ngayo na vhathu tshifhingani tsha kale, zwenezwo zwi sumbedza zwine Mudzimu a vha zwone. Bivhili i nga ni thusa u ḓivha Mudzimu. I amba nga ha nḓila ine na nga vha ngayo khonani yawe.​—Vhalani Phisalema 19:7, 11; Yakobo 2:23; 4:8.

Heyi bugwana i ḓo ni thusa u pfesesa Bivhili, i ṱalutshedza Maṅwalo u fana na nḓila ye Yesu a a ṱalutshedza ngayo. O vha a tshi amba nga ha ndimana dzi re Bivhilini, a ṱalutshedza “zwine Maṅwalo a amba zwone.”​—Vhalani Luka 24:27, 45.

Mafhungo maḓifha a bvaho ha Mudzimu a takadza u fhira zwithu zwoṱhe. Fhedzi vhaṅwe vhathu a vha a takaleli, vhaṅwe a a vha dina. Ni songo kulea nungo. Ni fanela u ḓivha Mudzimu uri ni kone u wana vhutshilo vhu sa fheli.​—Vhalani Yohane 17:3.