NGUDO 11

Ni Nga Vhuyelwa Hani Nga U Vhala Bivhili?

TAMBANI

Naa no no vhuya na ḓiwana ni tshi khou tea u ita muṅwe mushumo muhulu, fhedzi ni sa ḓivhi uri ni ḓo u thoma nga gai? Khamusi no u thoma nga zwiṱuku nga zwiṱuku u itela uri u ni lelutshele. Zwo tou ralo na kha u vhala Bivhili. Ni nga ḓivhudzisa uri: ‘Ndi ḓo tou i thoma nga gai?’ Kha ino ngudo, ri ḓo haseledza nga ha dziṅwe nḓila dzo leluwaho dzine dza ḓo ni thusa uri ni ḓiphine nga u vhala na u guda Bivhili.

1. Ndi ngani ri tshi fanela u vhala Bivhili tshifhinga tshoṱhe?

Muthu ane a vhala Bivhili kana “mulayo wa Yehova,” u ḓo takala nahone zwithu zwi ḓo mu tshimbilela zwavhuḓi. (Vhalani Phisalema 1:1-3.) Lingedzani u vhala Bivhili lwa mimunithi i si gathi ḓuvha ḽiṅwe na ḽiṅwe. Musi ni tshi ḓiḓowedza u vhala Bivhili, ni ḓo ḓiphiṋa nga u i vhala.

2. Ndi mini zwine zwa ḓo ni thusa uri ni vhuyelwe nga u vhala Bivhili?

Uri ri kone u vhuyelwa nga u vhala Bivhili, ri fanela u ḓiṋea tshifhinga tsha u humbulisisa nga ha zwine ra khou zwi vhala. Ri fanela u i vhala na u ‘elekanya’ nga ha zwine ra khou zwi vhala. (Yoshua 1:8, ṱhaluso i re magumoni a siaṱari.) Musi ni tshi khou vhala, ni ḓivhudzise uri: ‘Zwenezwi zwi mmbudza mini nga ha Yehova Mudzimu? Ndi nga zwi shumisa hani vhutshiloni hanga? Ndi nga shumisa hani idzi vese u itela u thusa vhaṅwe?’

3. Ni nga ḓivhetshela hani tshifhinga tsha u vhala Bivhili?

Naa zwi a ni konḓela u wana tshifhinga tsha u vhala Bivhili? Vhunzhi hashu zwi a ri konḓela u wana tshifhinga. Lingedzani u shumisa “tshifhinga tshaṋu nga vhuṱali.” (Vhaefesa 5:16) Zwenezwi ni nga zwi ita nga u ḓivhetshela tshifhinga tsha u vhala Bivhili ḓuvha ḽiṅwe na ḽiṅwe. Vhaṅwe vha vhala Bivhili nga matsheloni-tsheloni. Vhaṅwe vha i vhala nga masiari, khamusi nga lantshi. Ngeno vhaṅwe vha tshi i vhala nga madekwana vha sa athu u ya u eḓela. Inwi ni takalela u vhala Bivhili nga tshifhinga tshifhio?

GUDANI ZWO ENGEDZEAHO

Gudani uri ni nga ita hani uri u vhala Bivhili zwi takadze. Gudani nḓila ine na nga lugiselela ngayo zwavhuḓi uri ni kone u vhuyelwa nga ngudo yaṋu ya Bivhili.

Samusi ri tshi nga guda u takalela u ḽa zwiḽiwa zwo fhambanaho, ri nga guda na u ḓiphiṋa nga u vhala Bivhili

4. Ḓiphiṋeni nga u vhala Bivhili

Zwi nga kha ḓi vha zwi songo leluwa u thoma u vhala Bivhili. Fhedzi ni nga guda u ḓiphiṋa nga u vhala Bivhili, u fana na musi muthu a tshi nga thetshela tshiḽiwa, tsha vho thoma u mu ḓifhela musi o no ḓowela u tshi ḽa. Vhalani 1 Petro 2:2, ni kone u fhindula mbudziso i tevhelaho:

Arali ni tshi vhala Bivhili ḓuvha ḽiṅwe na ḽiṅwe, naa ni vhona u nga ni ḓo ḓiphiṋa nga u i vhala na u ṱoḓa u i vhala nga ho engedzeaho?

Ṱalelani VIDIO ni vhone zwo itaho uri vhaṅwe vha thome u ḓiphiṋa nga u vhala Bivhili. Ni kone u fhindula mbudziso dzi tevhelaho.

VIDIO: Vhaswa Vha Nga Ḓigudisa Hani U Funa Ipfi Ḽa Mudzimu? (5:33)

Kha vidio, vhaswa vho kunda thaidzo dzifhio?
Ndi mini zwo vha thusaho uri vha dzule vha tshi vhala Bivhili tshifhinga tshoṱhe?
Vho zwi itisa hani uri u vhala Bivhili zwi takadze?

Zwine zwa nga ni thusa uri ni thome u vhala Bivhili:

Wanani Bivhili ine ya shumisa luambo lwa musalauno. Ni nga shumisa Bivhili ya Ṱhalutshedzelo Ya Shango Ḽiswa arali i hone nga luambo lwaṋu.
Thomani nga u vhala mafhungo ane na a takalela Bivhilini. U itela u vhona uri ni nga zwi itisa hani, sedzani tshati ine ya ri “Thomani U Vhala Bivhili.”
Ṅwalani fhasi zwithu no no zwi vhalaho. Shumisani tshati ine ya ri “Makani Hune No No Hu Vhala” i re kha yeneyi khandiso.
Shumisani app ya JW Library^®. Kha yeneyo app ni nga vhala kana na thetshelesa hu tshi khou vhaliwa Bivhili, ni tshi shumisa founu yaṋu kana zwiṅwe zwishumiswa zwa elekitironiki.
Shumisani ṱhumetshedzo dzine dza wanala kha Bivhili ya Ṱhalutshedzelo Ya Shango Ḽiswa. Kha dzenedzo ṱhumetshedzo hu na mimapa, dzitshati u katela na thevhedzaipfi zwine zwa nga ni thusa uri ni ḓiphiṋe nga u vhala Bivhili.

5. Lugiselelani zwine na ḓo guda nga hazwo

Vhalani Phisalema 119:34, ni kone u fhindula mbudziso i tevhelaho:

Ndi ngani zwi zwa ndeme u rabela ni sa athu u vhala Bivhili kana ni sa athu u lugiselela zwine na khou ḓo zwi guda?

Ni nga ita mini uri ni kone u vhuyelwa nga zwine na khou zwi guda? Musi ni tshi khou lugiselela ngudo iṅwe na iṅwe, lingedzani zwi tevhelaho:

Vhalani phara dzi re mathomoni a ngudo.
Vhalani dzivese, ni lingedze u pfesesa uri dzi tshimbidzana hani na zwine na khou zwi guda.
Talelani maipfi ane a fhindula mbudziso iṅwe na iṅwe; zwenezwi zwi ḓo ni thusa musi ni tshi haseledza yeneyi ngudo na mugudisi waṋu.

Naa no vha ni tshi zwi ḓivha?

Ṱhanzi dza Yehova vho no shumisa Bivhili dzo fhambanaho. Fhedzi ri takalela u shumisa Bivhili ya Ṱhalutshedzelo Ya Shango Ḽiswa Ya Maṅwalo Makhethwa ngauri i a pfala, i a vhalea nahone i shumisa dzina ḽa Mudzimu.—Vhalani Thero i re kha jw.org “Naa Ṱhanzi Dza Yehova Vha Na Bivhili Yavho?”

VHAṄWE VHATHU VHA AMBA URI: “U guda Bivhili zwi a konḓa. Ndi vha ndo neta kana a thi na tshifhinga tsha u vhala.”

Inwi ni ri mini?

NO GUDA MINI?

Uri ni kone u vhuyelwa nga u vhala Bivhili, ḓiṋeeni tshifhinga tsha u i vhala, ni rabele uri ni kone u pfesesa zwine na khou zwi vhala nahone ni lugiselele zwine na khou ḓo zwi guda.