NGUDO 09

U Rabela Zwi Nga Khwaṱhisa Vhushaka Haṋu Na Mudzimu

TAMBANI

Naa ni vhona u nga ni a ṱoḓa u livhiswa? Naa ni a ṱoḓa phindulo dza mbudziso dza ndeme dzine na vha nadzo? Naa ni a ṱoḓa u khuthadzwa kana u ṱuṱuwedzwa? Naa ni a ṱoḓa u vha khonani ya Yehova ya tsini? U rabela zwi nga ni thusa kha zwenezwi zwithu zwoṱhe. Fhedzi ri tea u rabela hani? Naa Mudzimu u a thetshelesa thabelo dza vhathu vhoṱhe? Ni nga ita mini uri ni vhe na vhungoho ha uri u ḓo thetshelesa musi ni tshi rabela? Kha ri vhone.

1. Ri tea u rabela kha nnyi nahone ri nga rabela nga ha mini?

Yesu o funza uri ri fanela u rabela fhedzi Khotsi ashu wa ṱaḓulu. Yesu o rabela kha Yehova. O ri: “Musi ni tshi rabela ni ri: ‘Khotsi ashu wa ṱaḓulu . . . ’” (Mateo 6:9) Musi ri tshi rabela kha Yehova, zwi ita uri vhukonani hashu nae vhu khwaṱhe.

Ri nga rabela nga ha tshiṅwe na tshiṅwe. Fhedzi arali ri tshi ṱoḓa uri Mudzimu a fhindule thabelo dzashu, ri fanela u rabela nga ha zwithu zwi tshimbidzanaho na zwine a zwi funa. “Arali ra humbela zwine zwa tshimbidzana na zwine [Mudzimu] a zwi funa, u ḓo ri pfa.” (1 Yohane 5:14) Yesu o ṋea tsumbo ya zwithu zwine ra nga rabela nga hazwo. (Vhalani Mateo 6:9-13.) Musi ri tshi rabela nga ha zwithu zwine zwa ri vhilaedzisa, ri songo hangwa u livhuwa Mudzimu zwe a ri itela zwone na u mu humbela uri a thuse vhaṅwe.

2. Ri fanela u rabela hani?

Bivhili i ri ṱuṱuwedza uri ri “[shululele Mudzimu] zwi re mbiluni [dzashu].” (Phisalema 62:8) Nga zwenezwo, ri fanela u rabela zwi tshi bva mbiluni. Ri nga rabelela nṱha kana ra rabelela mbiluni. Naa hu na nḓila ine ra tea u ima kana u dzula ngayo musi ri tshi rabela? Yehova ha ri vhudzi uri ri rabele ro gwadama, ro dzula kana ro ima. Tsha ndeme vhukuma ndi u sumbedza uri ri a mu ṱhonifha. Ri nga rabela tshifhinga tshiṅwe na tshiṅwe, ri huṅwe na huṅwe.

3. Mudzimu u fhindula hani thabelo dzashu?

U fhindula thabelo dzashu nga nḓila dzo fhambanaho. Yehova o ri ṋea Bivhili ine khayo ra wana phindulo dza mbudziso dzashu. U vhala Ipfi ḽa Mudzimu zwi nga “ita uri a si na tshenzhelo a ṱalifhe.” (Phisalema 19:7; vhalani Yakobo 1:5.) Mudzimu a nga ri thusa uri ri dzike musi ri na thaidzo. A nga ita uri vhashumeli vhawe vha ri thuse musi ri tshi ṱoḓa thuso.

GUDANI ZWO ENGEDZEAHO

Gudani uri ni nga rabela hani nga nḓila ine Mudzimu a ṱoḓa ni tshi rabela ngayo na uri u rabela zwi nga ni vhuyedza hani.

4. Hu na zwine Mudzimu a zwi lavhelela kha riṋe musi ri tshi rabela

Ndi mini zwine zwa ita uri Mudzimu a ri thetshelese musi ri tshi rabela? Ṱalelani VIDIO.

VIDIO: Naa Mudzimu U Thetshelesa Thabelo Dzoṱhe? (2:42)

Yehova u ṱoḓa ri tshi rabela khae. Vhalani Phisalema 65:2, ni kone u fhindula mbudziso dzi tevhelaho:

Ni vhona u nga “Mupfi wa thabelo” u a ṱoḓa ni tshi rabela khae? Ndi ngani ni tshi ralo?

Ri tea u lingedza u tshila u tendelana na milayo ya Mudzimu arali ri tshi ṱoḓa uri a ri thetshelese musi ri tshi rabela. Vhalani Mika 3:4 na 1 Petro 3:12, ni kone u fhindula mbudziso i tevhelaho:

Ri nga ita mini uri Yehova a ri thetshelese musi ri tshi rabela?

Musi hu na nndwa, zwigwada zwoṱhe zwi a rabela uri zwi kunde. Naa zwi a pfala u lavhelela uri Mudzimu a fhindule dzenedzo thabelo?

5. Ri tea u vhudza Yehova nḓila ine ra ḓipfa ngayo

Vhaṅwe vhathu vho gudiswa uri musi vha tshi rabela vha tea u dovholola zwithu zwithihi lunzhi-lunzhi. Fhedzi naa yeneyi ndi nḓila ine Mudzimu a ṱoḓa ri tshi mu rabela ngayo? Vhalani Mateo 6:7, ni kone u fhindula mbudziso i tevhelaho:

Ni nga iledza hani u “dovholola zwithu zwithihi lunzhi-lunzhi” musi ni tshi rabela?

Ḓuvha ḽiṅwe na ḽiṅwe humbulani nga ha tshithu tshithihi tshavhuḓi tshine na nga tshi livhuwa Yehova. Arali na humbula nga ha zwithu zwo fhambanaho zwine na nga zwi livhuwa Yehova ḓuvha ḽiṅwe na ḽiṅwe, musi vhege i tshi fhela ni ḓo vha no no rabela nga ha zwithu zwa sumbe zwo fhambanaho ni sa dovhololi.

Khotsi wavhuḓi u ṱoḓa ṅwana wawe a tshi mu vhudza nḓila ine a ḓipfa ngayo. Nga hu fanaho, Yehova u ṱoḓa uri ri rabele khae zwi tshi bva mbiluni

6. U rabela ndi tshifhiwa tsho khetheaho tshi bvaho kha Mudzimu

U rabela zwi nga ri thusa hani, nga mannḓa-mannḓa musi ro sedzana na zwiimo zwi konḓaho? Ṱalelani VIDIO.

VIDIO: U Rabela Zwi Ri Thusa U Konḓelela (1:32)

Bivhili i fhulufhedzisa uri u rabela zwi nga ri thusa uri ri vhe na mulalo wa vhukuma. Vhalani Vhafilipi 4:6, 7, ni kone u fhindula mbudziso dzi tevhelaho:

U rabela zwi ri thusa hani naho zwi sa fhelisi thaidzo dzashu nga zwiṅwe zwifhinga?
Ndi zwifhio zwiṅwe zwithu zwine na ṱoḓa u rabela nga hazwo?

Naa no vha ni tshi zwi ḓivha?

“Amen” zwi amba uri “nga zwi ralo.” Ndi kale hu tshi ambiwa uri “amen” musi hu tshi fhedza u rabeliwa.—1 Koronika 16:36.

7. Ni songo hangwa u rabela

Nga zwiṅwe zwifhinga ri a farakanea lune ra hangwa u rabela. U rabela zwo vha zwi zwa ndeme lungafhani kha Yesu? Vhalani Mateo 14:23 na Marko 1:35, ni kone u fhindula mbudziso dzi tevhelaho: