NGUDO 06
Vhutshilo Ho Thoma Hani?
Mudzimu ndi ene “tshisima tsha vhutshilo.” (Phisalema 36:9) Naa ni a zwi tenda? Vhaṅwe vhathu vha amba uri a hu na musiki. Arali zwenezwo zwi ngoho, zwi amba uri zwo sokou itea uri ri vhe hone. Fhedzi arali hu Yehova Mudzimu o sikaho zwithu zwoṱhe, u a ḓivha uri o zwi sikela mini, a si zwone? a Ṱhogomelani uri Bivhili i amba uri vhutshilo ho thoma hani na uri ndi ngani ni tshi nga vha na vhungoho ha uri zwine ya zwi amba ndi ngoho.
1. Zwo ḓa hani uri hu vhe na ḽifhasi na ṋaledzi?
Bivhili i ri: “U rangani Mudzimu o sika ḽiṱaḓulu na ḽifhasi.” (Genesi 1:1) Vhorasaintsi vhanzhi vha a tenda uri ḽifhasi na ṋaledzi zwo tou sikwa. Mudzimu o zwi sika hani? O sika ḽifhasi, milalavhungu, dziṋaledzi na dzipulanete a tshi shumisa muya wawe mukhethwa une wa vha “maanḓa” awe ane a a shumisa.—Genesi 1:2.
2. Ndi ngani Mudzimu o sika ḽifhasi?
Yehova ho ngo “[sikela ḽifhasi] ḽifhedzi,” o “ḽi vhumba uri ḽi dzulwe nga vhathu.” (Yesaya 45:18) O sika ḽifhasi ḽavhuḓisa, ḽi na zwithu zwoṱhe zwine vhathu vha zwi ṱoḓa uri vha tshile tshoṱhe khaḽo. (Vhalani Yesaya 40:28; 42:5.) Vhorasaintsi vha amba uri ḽifhasi ḽo khethea vhukuma na uri a ḽi fani na dziṅwe pulanete. A vha athu u wana iṅwe pulanete i fanaho na ḽifhasi ine ya vha na zwithu zwoṱhe zwine vhathu vha zwi ṱoḓa uri vha tshile.
3. Ndi ngani vhathu vho fhambana na zwipuka?
Musi Yehova o no sika ḽifhasi, o sika zwimela na zwipuka. A tshi fhedza, “a sika muthu a tshi ḓifanyisa.” (Vhalani Genesi 1:27) Ndi ngani vhathu vho fhambana na zwiṅwe zwithu zwe Mudzimu a zwi sika? Samusi Mudzimu o ri sika a tshi ḓifanyisa, ri a kona u funa vhaṅwe na u fara vhaṅwe nga nḓila yavhuḓi u fana nae. O dovha a ri sika ri na vhukoni ha u guda nyambo, u takalela zwithu zwavhuḓi na u ḓiphina nga muzika. Ro fhambana na zwipuka ngauri ri a kona u gwadamela Musiki washu kana u vha khonani dzawe.
GUDANI ZWO ENGEDZEAHO
Ṱhogomelani vhuṱanzi vhu sumbedzaho uri zwithu zwi tshilaho zwo tou sikwa na uri zwine Bivhili ya zwi amba nga ha tsiko zwi a pfesesea. Gudani uri zwine vhathu vha vha zwone zwi ri gudisa mini nga ha Mudzimu.
4. Zwithu zwi tshilaho zwo tou sikwa
Vhathu vha a huliswa musi vho ita zwithu zwe vha tou zwi kopa kha tsiko. Ndi nnyi ane a tea u huliswa nge a sika zwenezwi zwithu zwine vhathu vha kopa khazwo? Ṱalelani VIDIO, ni kone u fhindula mbudziso i tevhelaho.
-
Vhathu vho kopa mini kha tsiko?
Nnḓu iṅwe na iṅwe i na muthu we a i fhaṱa. Fhedzi ndi nnyi we a sika zwithu zwi re hone? Vhalani Vhahevheru 3:4, ni kone u fhindula mbudziso dzi tevhelaho:
-
Ndi zwifhio zwine zwa ni takadza kha zwithu zwoṱhe zwe zwa sikwa?
-
Naa zwi a pfala u tenda uri ḽifhasi, ṋaledzi na zwithu zwoṱhe zwi re hone zwo tou sikwa? Ndi ngani ni tshi ralo?
Naa no vha ni tshi zwi ḓivha?
Ni nga wana khandiso na vidio dzine dza amba nga ha enea mafhungo kha jw.org kha tshiteṅwa, “Naa Zwo Tou Sikwa?” na “Zwine Vhathu Vha Humbula Nga Ha Mathomo A Vhutshilo.”
“Ndi ngoho uri nnḓu iṅwe na iṅwe i na mufhaṱi, fhedzi o fhaṱaho zwoṱhe ndi Mudzimu”
5. Hu na zwiitisi zwi pfalaho zwi itaho uri ri tende uri zwine Bivhili ya zwi amba nga ha tsiko ndi ngoho
Kha Genesi ndima 1, Bivhili i a ṱalutshedza uri ḽifhasi na zwithu zwi tshilaho zwi re khaḽo zwi bva ngafhi. Naa ni nga fhulufhela eneo mafhungo kana a sokou vha ngano? Ṱalelani VIDIO, ni kone u fhindula mbudziso dzi tevhelaho.
-
Naa Bivhili i funza uri ḽifhasi na zwithu zwoṱhe zwi tshilaho zwo sikwa nga maḓuvha a rathi a re na awara dza 24?
-
Ni vhona u nga zwine Bivhili ya zwi amba nga ha tsiko zwi a pfala na u pfesesea? Ndi ngani ni tshi ralo?
Vhalani Genesi 1:1, ni kone u fhindula mbudziso i tevhelaho:
-
Vhorasaintsi vha amba uri ḽifhasi na ṋaledzi zwo tou sikwa. Zwine vha zwi amba zwi tshimbidzana hani na zwine na khou bva u zwi vhala Bivhilini?
Vhaṅwe vhathu vha a ḓivhudzisa uri, naa Mudzimu o sika tshithu tshithihi tshi tshilaho nahone kha tshenetsho tshithu ha kona u bvelela zwiṅwe zwithu zwinzhi zwi tshilaho? Vhalani Genesi 1:21, 25, 27, ni kone u fhindula mbudziso dzi tevhelaho:
-
Naa Bivhili i funza uri Mudzimu o sika tshithu tshithihi tshi tshilaho, a ita uri khatsho hu bvelele zwipuka na vhathu? Kana naa Mudzimu o sika “mifuda” yoṱhe ya zwithu zwi tshilaho? b
6. Vhathu vho khethea kha zwithu zwoṱhe zwe Mudzimu a zwi sika
Ro fhambana vhukuma na zwipuka zwe Yehova a zwi sika. Vhalani Genesi 1:26, ni kone u fhindula mbudziso i tevhelaho:
-
Samusi Mudzimu o ri sika a tshi ḓifanyisa, u kona hashu u funa na u pfela vhuṱungu, zwi sumbedza mini nga ha zwine Mudzimu a vha zwone?
VHAṄWE VHATHU VHA AMBA URI: “Zwine Bivhili ya zwi amba nga ha tsiko zwi sokou vha ngano.”
-
Inwi ni ri mini? Ndi ngani ni tshi ralo?
NO GUDA MINI?
Yehova o sika ḽifhasi, ṋaledzi na zwithu zwoṱhe zwi tshilaho.
Ni Kha Ḓi Zwi Humbula?
-
Bivhili i funza uri zwo ḓa hani uri hu vhe na ḽifhasi na ṋaledzi?
-
Naa Mudzimu o sika tshithu tshithihi tshi tshilaho, a ita uri khatsho hu bvelele zwiṅwe zwithu zwoṱhe zwi tshilaho kana o tou sika zwithu zwoṱhe?
-
Ndi ngani vhathu vho khethea?
WANANI ZWO ENGEDZEAHO
Vhonani tsumbo dza zwithu zwe zwa sikwa zwine zwa sumbedza uri hu na Musiki.
“Zwimela Na Zwipuka Zwi Ri Gudisa Mini?” (Thereo i re kha Fhaṱuwani!, September 2006)
Vhonani uri khotsi vha ṱalutshedza hani ṅwana wavho wa mutukana zwine Bivhili ya zwi amba nga ha tsiko.
Naa pfunzo ya uri zwithu zwo sokou bvelela na zwine Bivhili ya zwi funza zwi nga vha zwi zwa vhukuma zwoṱhe.
“Naa Mudzimu O Ita Uri Zwithu Zwi Tshilaho Zwi Sokou Bvelela?” (Thero i re kha jw.org)
Vhonani uri marambo a kale na ṱhoḓisiso ya saintsi, zwi sumbedza uri naa zwithu zwi tshilaho zwo tou sikwa kana zwo sokou bvelela?
You May Also Like
MBUDZISO DZINE DZA ANZELA U VHUDZISWA
Ngudo Ya Bivhili Ndi Mini?
Musi ni tshi khou guda na Ṱhanzi dza Yehova nga mahala, ni nga shumisa Bivhili iṅwe na iṅwe ine na i takalela. Ni nga vhidza vha muṱani ha waṋu kana khonani dzaṋu uri na vhone vha vhe hone musi ni tshi guda.
