Yesu o amba uri Vhakriste vha tea u lovhedzwa. (Vhalani Mateo 28:​19, 20.) Fhedzi ndovhedzo ndi mini? Ndi mini zwine muthu a tea u zwi ita uri a lovhedzwe?

1. Ndovhedzo ndi mini?

Ipfi u “lovhedza” ḽi bva kha ipfi ḽa Tshigerika ḽine ḽa amba “u mbwandamedza” maḓini. Musi Yesu a tshi lovhedzwa, o mbwandamedzwa Mulamboni wa Yorodane nahone a “bva maḓini.” (Marko 1:​9, 10) U fana na Yesu, Vhakriste vha vhukuma vha lovhedzwa nga u mbwandamedzwa tshoṱhe maḓini.

2. Ndovhedzo i sumbedza mini?

Musi muthu a tshi lovhedzwa, u vha a tshi khou sumbedza uri o ḓiṋekedzela kha Yehova Mudzimu. Muthu u ḓiṋekedzela hani? Musi muthu a sa athu lovhedzwa, u rabela tshiphirini, a vhudza Yehova uri u ṱoḓa u Mu shumela lwa tshoṱhe. U fhulufhedzisa uri u ḓo gwadamela Yehova fhedzi na uri zwine Mudzimu a zwi funa zwi ḓo vha zwone zwithu zwa ndeme vhutshiloni hawe u fhira zwithu zwoṱhe. U khetha u ‘ḓihangwa’ na u ‘dzula a tshi tevhela’ pfunzo ya Yesu na tsumbo yawe. (Mateo 16:​24) U ḓiṋekedzela na u lovhedzwa zwi ita uri a vhe na vhushaka ha tsini na Yehova na vhaṅwe vhathu vhane vha gwadamela Yehova.

3. Muthu u fanela u ita mini a sa athu lovhedzwa?

Musi ni sa athu lovhedzwa, ndi zwa ndeme uri ni gude nga ha Yehova na u vha na lutendo lwo khwaṱhaho khae. (Vhalani Vhahevheru 11:6.) Musi ni tshi vha na nḓivho yo engedzeaho, lutendo lwaṋu lu ḓo khwaṱha, zwa ita uri ni fune Yehova nga ho engedzeaho. Zwenezwo zwi ḓo ita uri ni ṱoḓe u vhudza vhaṅwe nga hae na u tshila u tendelana na milayo yawe. (2 Timotheo 4:2; 1 Yohane 5:3) Musi muthu o no thoma u tshila “nga nḓila i rendisaho Yehova uri [a] kone u mu takadza nga vhuḓalo,” a nga khetha u ḓiṋekedzela kha Mudzimu na u lovhedzwa.​—Vhakolosa 1:​9, 10. a

 GUDANI ZWO ENGEDZEAHO

4. Ri nga guda mini kha ndovhedzo ya Yesu?

Vhalani Mateo 3:​13-17, ni gude zwo engedzeaho nga ha ndovhedzo ya Yesu. Ni kone u fhindula mbudziso dzi tevhelaho:

• Naa Yesu o lovhedzwa e lutshetshe?

• O lovhedzwa hani? Naa o tou shashiwa nga maḓi?

Yesu o thoma u ita mushumo wo khetheaho we Mudzimu a mu ṋea wone kha ḽifhasi musi o no lovhedzwa. Vhalani Luka 3:​21-23 na Yohane 6:38, ni kone u fhindula mbudziso i tevhelaho:

• Musi Yesu o no lovhedzwa, ndi ufhio mushumo we a ita uri u ḓe u thoma vhutshiloni hawe?

5. U lovhedzwa ndi tshipikwa tshine na nga tshi swikelela

Mathomoni ni nga pfa ni tshi ofha u ḓiṋekedzela na u lovhedzwa. Fhedzi ni nga ita mvelaphanḓa na vha na tshivhindi tsha u dzhia yeneyi phetho ya ndeme. U itela u vhona vhaṅwe vhathu vhe vha zwi ita, ṱalelani VIDIO.

Vhalani Yohane 17:3 na Yakobo 1:​5, ni kone u fhindula mbudziso i tevhelaho:

• Ndi mini zwine zwa nga thusa muthu uri a lugele u lovhedzwa?

1. Ri ḓiṋekedzela nga u vhudza Yehova uri ri ṱoḓa u mu shumela vhutshilo hashu hoṱhe

2. Musi ri tshi lovhedzwa, ri vha ri tshi khou sumbedza vho ṱalelaho uri ro ḓiṋekedzela kha Mudzimu

 6. Musi ri tshi lovhedzwa ri vha tshipiḓa tsha muṱa wa Yehova

Musi ri tshi lovhedzwa ri vha tshipiḓa tsha muṱa u re na vhuthihi wa shango ḽoṱhe. Naho ri tshi bva fhethu ho fhambanaho nahone ro aluswa nga nḓila i sa fani, roṱhe ri tenda zwithu zwi fanaho nahone ri livhiswa nga milayo i fanaho. Vhalani Phisalema 25:​14 na 1 Petro 2:​17, ni kone u fhindula mbudziso i tevhelaho:

• Ndovhedzo i kwama hani vhushaka vhune muthu a vha naho na Yehova na vhaṅwe vhathu vhane vha gwadamela Yehova?

 NO GUDA MINI?

Yesu o funza uri Vhakriste vha tea u lovhedzwa. Musi muthu a sa athu lovhedzwa, u tea u vha na lutendo lwo khwaṱhaho kha Yehova, a tshile u tendelana na milayo yawe, a kone u ḓiṋekedzela Khae.

Ni Kha Ḓi Zwi Humbula?

• Ndovhedzo ndi mini nahone ndi ngani i ya ndeme?

• U lovhedzwa zwi sumbedza mini?

• Ndi mini zwine muthu a tea u zwi ita a sa athu ḓiṋekedzela na u lovhedzwa?