NGUDO 17
Yesu Ndi Muthu Wa Hani?
Musi ri tshi guda nga ha zwithu zwe Yesu a zwi ita na zwe a zwi amba musi e kha ḽifhasi, ri kona u vhona zwine a vha zwone. Zwenezwi zwi ita uri ri ṱoḓe u vha khonani ya Yesu na Yehova ane a vha Khotsi awe. Ndi zwifhio zwiṅwe zwa zwithu zwine Yesu a vha zwone? Ri nga edzisa hani Yesu?
1. Yesu u fana hani na Khotsi awe?
Musi e ṱaḓulu, Yesu o sedza Khotsi awe vha re na lufuno nahone o guda khavho lwa miṅwaha minzhi-minzhi. Nga nṱhani ha zwenezwo, zwine a zwi ita, zwine a zwi humbula na nḓila ine a ḓipfa ngayo, u zwi ita u fana na Khotsi awe. (Vhalani Yohane 5:19.) Yesu u edzisa kokotolo zwine Khotsi awe a vha zwone lwe a vhuya a amba uri: “A vhonaho nṋe o vhona Khotsi.” (Yohane 14:9) Musi ni tshi guda zwine Yesu a vha zwone, zwi ḓo ita uri ni ḓivhe Yehova khwine. Sa tsumbo, Yesu o vha e na ndavha na vhathu, zwenezwo zwi sumbedza uri Yehova u na ndavha na inwi.
2. Yesu o sumbedza hani uri u funa Yehova?
Yesu o ri: “Ndi khou ita zwe Khotsi a mmbudza uri shango ḽi zwi ḓivhe uri Khotsi ndi a mu funa.” (Yohane 14:31) Musi e kha ḽifhasi, Yesu o sumbedza uri u funa Khotsi awe nga u thetshelesa naho zwo vha zwi tshi konḓa u ita nga u ralo. Yesu o vha a tshi ṱoḓa u dzula a tshi amba nga ha Khotsi awe ngauri o vha a tshi funa Khotsi awe nga maanḓa.—Yohane 14:23.
3. Yesu o sumbedza hani uri u funa vhathu?
Bivhili i amba uri Yesu o vha a tshi “takalela vhukuma vhana vha vhathu.” (Mirero 8:31) O sumbedza uri u funa vhathu nga u vha ṱuṱuwedza na u vha thusa. O ita maḓembe u itela u sumbedza vhathu uri u na maanḓa na uri u a pfela vhuṱungu. (Marko 1:40-42) O vha e na vhuthu kha vhathu vhoṱhe nahone a sa ṱaluli. Zwe a zwi amba zwo khuthadza vhoṱhe vhe vha mu thetshelesa na u ita uri vha vhe na fhulufhelo. Yesu o vha o ḓiimisela u tambula na u fa nga nṱhani ha uri u funa vhathu vhoṱhe. Fhedzi o vha a tshi funa nga maanḓa-maanḓa vhe vha thetshelesa zwe a zwi funza.—Vhalani Yohane 15:13, 14.
GUDANI ZWO ENGEDZEAHO
Gudani zwo engedzeaho nga ha zwine Yesu a vha zwone. Ni humbule nga ha uri ni nga sumbedza hani lufuno na mafunda u fana nae.
4. Yesu u funa Khotsi awe
Tsumbo ya Yesu i ri gudisa nḓila ine ra nga sumbedza ngayo uri ri funa Mudzimu. Vhalani Luka 6:12 na Yohane 15:10; 17:26. Musi no fhedza u vhala vese dzoṱhe, fhindulani mbudziso i tevhelaho:
-
Ri nga edzisa hani tsumbo ya Yesu na u sumbedza uri ri funa Yehova?
Yesu o vha a tshi funa Khotsi awe vha re ṱaḓulu nahone a tshi amba navho nga thabelo tshifhinga tshoṱhe
5. Yesu u na ndavha na vhashai
Yesu o vha e na ndavha na vhaṅwe vhathu u fhira ene muṋe. Na musi o neta, o vha a tshi shumisa tshifhinga tshawe na nungo dzawe u itela u thusa vhathu. Vhalani Marko 6:30-44, ni kone u fhindula mbudziso dzi tevhelaho:
-
Kha enea mafhungo, Yesu o sumbedza hani uri u a funa vhaṅwe?—Vhalani vese 31, 34, 41 na 42.
-
Ndi mini zwe zwa ṱuṱuwedza Yesu uri a thuse vhathu?—Vhalani vese 34.
-
Samusi Yesu a tshi edzisa zwine Yehova a vha zwone, zwenezwi zwi ri gudisa mini nga ha Yehova?
-
Ri nga sumbedza hani uri ri na ndavha na vhaṅwe u fana na Yesu?
6. Yesu u na mafunda
Naho Yesu o vha e si na zwithu zwinzhi, o kovhela vhaṅwe zwe a vha e nazwo. U ri vhudza uri na riṋe ri fanela u vha na mafunda. Vhalani Mishumo 20:35, ni kone u fhindula mbudziso i tevhelaho:
-
Yesu o ri ndi mini zwine zwa nga ita uri ri takale?
Ṱalelani VIDIO, ni kone u fhindula mbudziso i tevhelaho.
-
Ri nga kovhela hani vhaṅwe naho ri si na zwithu zwinzhi?
Naa no vha ni tshi zwi ḓivha?
Bivhili i amba uri musi ri tshi rabela, ri rabele dzinani ḽa Yesu. (Vhalani Yohane 16:23, 24.) Musi ri tshi rabela dzinani ḽa Yesu, ri vha ri tshi khou sumbedza uri ri khou livhuwa zwe Yesu a ri itela zwone u itela u ri thusa uri ri vhe khonani dza Yehova.
VHAṄWE VHATHU VHA AMBA URI: “Mudzimu ha na ndavha na u tambula hashu.”
-
Samusi Yesu a tshi sumbedza zwine Khotsi awe a vha zwone, zwine a zwi ita zwi sumbedza hani uri Yehova u na ndavha na riṋe?
NO GUDA MINI?
Yesu u funa Yehova nahone u funa vhathu. Samusi Yesu a tshi fana na Khotsi awe, musi ni tshi ḓivha Yesu khwine, zwi ḓo ita uri ni ḓivhe Yehova khwine.
Ni Kha Ḓi Zwi Humbula?
-
Ri nga sumbedza hani uri ri funa Yehova u fana na Yesu?
-
Ri nga sumbedza hani uri ri funa vhathu u fana na Yesu?
-
Ndi mini zwine na zwi takalela nga maanḓa nga ha zwine Yesu a vha zwone?
WANANI ZWO ENGEDZEAHO
Ṱhogomelani zwiṅwe zwine Yesu a vha zwone zwine ra nga zwi edzisa.
“U Itela U Edzisa Yesu, Ni Tea . . .” (Yesu Ndi Nḓila, Ngoho Na Vhutshilo, siaṱari 317)
Gudani uri ndi ngani ri tshi fanela u rabela dzinani ḽa Yesu.
“Ndi Ngani Ni Tshi Fanela U Rabela Dzinani ḽa Yesu?” (Tshiingamo, 1 April 2008)
Naa hu na zwine Bivhili ya zwi amba nga ha mbonalo ya Yesu?
Ri nga guda mini kha nḓila ye Yesu a fara ngayo vhafumakadzi?
“U Ṱhonifha Na Tshirunzi Ri Tshi Ṱhogomelwa Nga Mudzimu” (Tshiingamo, 1 September 2012)
You May Also Like
MBUDZISO DZINE DZA ANZELA U VHUDZISWA
Ngudo Ya Bivhili Ndi Mini?
Musi ni tshi khou guda na Ṱhanzi dza Yehova nga mahala, ni nga shumisa Bivhili iṅwe na iṅwe ine na i takalela. Ni nga vhidza vha muṱani ha waṋu kana khonani dzaṋu uri na vhone vha vhe hone musi ni tshi guda.
