VHAKRISTE vha laedzwa uri vha pembelele Tshihumbudzo tsha lufu lwa Kristo. Honovhu vhuṱambo vhu dovha ha vhidzwa “tshilalelo tsha Murena.” (1 Vha-Korinta 11:20) Ndi mini zwine zwa ita uri tshi vhe tsha ndeme? Tshi fanela u pembelelwa lini nahone hani?

Yesu Kristo o thoma honovhu vhuṱambo vhusikuni ha Paseka ya Vhayuda nga 33 C.E. Paseka yo vha i vhuṱambo he ha vha vhu tshi pembelelwa luthihi fhedzi nga ṅwaha, nga ḽa 14 Nisan ḽa ṅwedzi wa Vhayuda. U itela u vhalela ḽeneḽi ḓuvha, Vhayuda vho vha vha tshi lindela ḓuvha ḽa tshimedzi musi hu tshi vha na tshedza lwa awara dza 12 na awara dza 12 dza swiswi. Ṅwedzi muswa u vhonalaho u re tsini na ḽeneḽi ḓuvha wo vha u tshi swaya u thoma ha Nisan. Paseka yo vha i tshi pembelelwa nga murahu ha maḓuvha 14 ḓuvha ḽo no kovhela.

Yesu o pembelela Paseka na vhaapostola vhawe, a pandela Yudasi Iskariote, nahone a thoma Tshilalelo tsha Murena. Tshenetsho tshilalelo tsho dzhiela vhudzulo Paseka ya Vhayuda nahone  nga zwenezwo tshi fanela u pembelelwa luthihi fhedzi nga ṅwaha.

Evangeli ya Mateo i vhiga u ri: “Yesu a dzhia tshinnkwa, a livhuha, a tshi ṅwatakanya, a ṋea vhafunziwa vhawe a ri: Ṱanganedzani, ni ḽe, ndi muvhili wanga. A dzhia na tshinwelo, a livhuha, a vha ṋea a ri: Inwani ngatsho’ noṱhe; Ndi malofha anga aya a mulanga muswa, a shululelwaho vhanzhi uri vha hangwelwe zwivhi.”—Mateo 26:26-28.

Vhaṅwe vha tenda uri Yesu o shandukisa tshinnkwa tsha vha ṋama yawe ya vhukuma nahone veine ya vha malofha awe a vhukuma. Naho zwo ralo, muvhili wa ṋama wa Yesu wo vha u songo huvhala musi a tshi ṋekedza tshenetshi tshinnkwa. Naa vhaapostola vha Yesu vho vha vha tshi khou ḽa ṋama ya Yesu ya vhukuma na u nwa malofha awe a vhukuma? Hai, ngauri zwenezwo zwo vha zwi tshi ḓo vha hu u ḽa muthu nahone zwi u pfuka mulayo wa Mudzimu. (Genesi 9:3, 4; Levitiko 17:10) U ya nga Luka 22:20, Yesu o ri: “Ndi tshone tshinwelo tsha mulanga muswa wa malofha anga a shululwaho nga mulandu waṋu.” Naa tshenetsho tshinwelo tsho mbo ḓi shanduka tsha vha “mulanga muswa” nga ho livhaho? Zwenezwo zwo vha zwi si nga si konadzee, samusi mulanga hu u tendelana, hu si tshithu tshine wa nga tshi fara nga tshanḓa.

Nga zwenezwo, tshinnkwa na veine zwo vha zwi zwithu zwa pfanyisedzo. Tshinnkwa tsho vha tshi tshi imela muvhili wa Kristo wo fhelelaho. Yesu o shumisa tshinnkwa tsho salaho musi hu tshi pembelelwa vhuṱambo ha Paseka. Tshenetsho tshinnkwa tsho vha tshi songo vanganyiwa na dini, kana mbiliso. (Ekisodo 12:8) Bivhili i shumisa dini sa tshiga tshi imelaho tshivhi kana u sina. Ngauralo tshinnkwa tsho vha tshi tshi imela muvhili wo fhelelaho we Yesu a u ṋekedza wa vha tshiṱhavhelo. Wo vha u si na tshivhi.—Mateo 16:11, 12; 1 Vha-Korinta 5:6, 7; 1 Petro 2:22; 1 Yohane 2:1, 2.

Veine tswuku i imela malofha a Yesu. Eneo malofha a ita uri mulanga muswa u khwaṱhe. Yesu o amba uri malofha awe o shululwa “u itela u hangwelwa ha zwivhi.” Ngauralo vhathu vha nga vha vho kunaho phanḓa ha Mudzimu nahone vha dzhena kha mulanga muswa na Yehova. (Vha-Heberu 9:14; 10:16, 17) Wonoyu mulanga kana thendelano, u ita uri Vhakriste 144 000 vha fulufhedzeaho vha kone u ya ṱaḓulu. Vha ḓo vha mahosi na vhotshifhe u itela u fhaṱutshedza vhathu vhoṱhe.—Genesi 22:18; Yeremia 31:31-33; 1 Petro 2:9; Ndzumbululo 5:9, 10; 14:1-3.

 Ndi vhafhio vhane vha fanela u ḽa zwiga zwa Tshihumbudzo? Zwi tou pfala uri ndi vhane vha vha kha mulanga muswa—ndi uri vhane vha vha na fulufhelo ḽa u ya ṱaḓulu—vhane vha fanela u ḽa tshinnkwa na veine. Muyamukhethwa wa Mudzimu u a vha vhudza uri vho ṋangwa uri vha ye u vha mahosi ṱaḓulu. (Vha-Roma 8:16) Vha dovha vha vha kha mulanga wa Muvhuso na Yesu.—Luka 22:29.

Hu pfi mini nga vhane vha vha na fulufhelo ḽa u tshila nga hu sa fheli Paradisoni kha ḽifhasi? Vha tevhedza ndaela ya Yesu nahone vha vha hone Tshilaleloni tsha Murena, fhedzi vha vha vha tshi tou vha vhaṱaleli fhedzi vha re na ṱhonifho. Ṱhanzi dza Yehova vha pembelela Tshilalelo tsha Murena luthihi nga ṅwaha nga ḽa 14 Nisan musi ḓuvha ḽo no kovhela. Naho hu na vha si gathi fhedzi vhane vha amba uri vha na fulufhelo ḽa u ya ṱaḓulu, honovhu vhuṱambo ndi ha ndeme kha Vhakriste vhoṱhe. Ndi tshiitea tshine vhathu vhoṱhe vha nga elekanya nga ha lufuno luhulwane lwa Yehova Mudzimu na Yesu Kristo.—Yohane 3:16.