BIVHILI a si tshisima tsha holodei dzo ḓoweleaho dza vhurereli na dza shango dzine dza pembelelwa mashangoni manzhi ṋamusi. Nga zwenezwo-ha, honoho u pembelelwa ho thoma ngafhi? Arali ni tshi nga kona u ita ṱhoḓisiso laiburari, ni ḓo wana zwi tshi takadza u ṱhogomela zwine bugu dza ndaedzi dza zwi amba nga  ha holodei dzo ḓoweleaho hune na dzula hone. Ṱhogomelani tsumbo dzi si gathi.

Easter. The Encyclopædia Britannica i ri: “A huna vhuṱanzi ha u pembelelwa ha vhuṱambo ha Easter kha Thestamennde Ntswa.” Easter yo thoma hani? Yo thomiwa vhurabelini ha vhuhedeni. Naho hu tshi ambiwa uri yeneyi holodei ndi ya u pembelela u vuswa ha Yesu, mikhuvha i tshimbidzanaho na tshifhinga tsha Easter a si ya Vhukriste. Sa tsumbo, malugana na “muvhuḓa wa Easter,” The Catholic Encyclopedia i ri: “Muvhuḓa ndi tshiga tsha vhuhedeni nahone u anzela u vha tshiga tsha u beba.”

U Pembelela Ṅwaha Muswa. Ḓuvha na mikhuvha i tshimbidzanaho na u pembelelwa ha Ṅwaha Muswa zwi a fhambana u ya nga mashango. Malugana na vhubvo ha honohu u pembelela, The World Book Encyclopedia i ri: “Julius Caesar muvhusi wa Vharoma o vhea ḓuvha ḽa 1 January sa Ḓuvha ḽa Ṅwaha Muswa nga 46 B.C. Vharoma vho kumedza ḽeneḽi ḓuvha kha Janus, mudzimu wa dzikhoro, mahothi, na wa mathomo a zwithu. Ṅwedzi wa January wo khethiwa musi Janus o no fa, we a vha e na zwifhaṱuwo zwivhili—tshiṅwe tsho sedza phanḓa nahone tshiṅwe tsho sedza murahu.” Ngauralo u pembelelwa ha Ṅwaha Muswa zwo thoma kha masialala a vhuhedeni.

Halloween. Encyclopedia Americana i ri: “Mikhuvha i tshimbidzanaho na Halloween yo thoma kha vhuṱambo ha Druid [tshigwada tsha kale tsha vhotshifhe tsha Vhacelt] ha zwifhinga zwa nga phanḓa ha Vhukriste. Vhacelt vho vha vhe na vhuṱambo ha midzimu mivhili mihulwane—mudzimu wa ḓuvha na mudzimu wa vhafu. . . , we vhuṱambo hawe ha vha vhu tshi itwa nga ḽa 1 November, mathomoni a Ṅwaha Muswa wa Vhacelt. Vhuṱambo ha vhafu ho dzheniswa nga zwiṱuku nga zwiṱuku kha mikhuvha ya Vhukriste.”

Dziṅwe Holodei. A zwi konadzei uri ri haseledze vhuṱambo hoṱhe vhune ha itwa shangoni ḽoṱhe. Naho zwo ralo, holodei dzine dza hulisa vhathu kana madzangano a vhathu a dzi ṱanganedzwi nga Yehova. (Yeremia 17:5-7; Mishumo 10:25, 26) Humbulani uri vhubvo ha vhuṱambo ha vhurereli vhu a sumbedza arali vhu tshi takadza Mudzimu kana vhu sa mu takadzi. (Yesaya 52:11; Ndzumbululo 18:4) Maitele a Bivhili o bulwaho kha Ndima ya 16 a yeneyi bugu a ḓo ni thusa u ṱhogomela nḓila ine Mudzimu a dzhia ngayo u ṱanganela kha holodei dzi si dza vhurereli.