Uyo ndi muapostola Petro o imaho afho, nahone avho vha re murahu hawe ndi khonani dzawe. Fhedzi ndi ngani munna o gwadamela Petro? Naa u fanela u zwi ita? Ni a ḓivha uri ndi nnyi?

Munna ndi Koronelio. O vha e nduna ya mmbi ya Roma. Koronelio o vha a sa ḓivhi Petro, fhedzi o vha o vhudzwa uri a mu rambele nḓuni yawe. Kha ri zwi wane uri zwo ḓa hani.

Vhatevheli vha Yesu vha u thoma vho vha vhe Vhayuda, fhedzi Koronelio o vha e si Muyuda. O vha a tshi funa Yehova, a tshi mu rabela, na u itela vhathu zwithu zwavhuḓi. Muruṅwa a bvelela khae a ri: ‘Yehova u takadzwa nga iwe, nahone u ḓo fhindula thabelo dzau. Ruma vhanna vha vhidze munna a no pfi Petro. U dzula Yope nḓuni ya Simoni, a dzulaho tsini na lwanzhe.’

Koronelio a rumela vhanna a wana Petro. Nga ḽi tevhelaho, Petro o vha e nḓuni ya nṱha ya nnḓu ya Simoni. Henefho Yehova a ita uri Petro a humbule uri u vhona labi ḽihulu ḽi tshi khou tsa ḽi tshi bva ṱaḓulu. Labini ho vha hu na tshaka dzoṱhe dza zwipuka. U ya nga mulayo wa Yehova, zwipuka izwi zwo vha zwi sa ḽiwi, naho zwo ralo ipfi ḽa ri: ‘Takuwa, Petro. Vhulaha u ḽe.’

Petro a fhindula: ‘Hai! Thi athu u ḽa tshi re na tshika.’ Fhedzi ipfi ḽa vhudza Petro: ‘Litsha u ri tshithu tshi na tshika tshine Mudzimu zwino a ri a tshi na tshika.’ Izwi zwa itea luraru. Petro a tshi khou mangala uri zwi amba mini, vhanna vha Koronelio vha swika nḓuni vha vhudzisa hu re na Petro.

Petro a tsela nḓuni ya fhasi a ri: ‘Ndi nṋe ane na mu ṱoḓa. No ḓelani?’ Musi vhanna vha tshi ṱalutshedza uri muruṅwa o vhudza Koronelio uri a rambele Petro nḓuni yawe, Petro a tenda a ṱuwa navho. Ḓuvha ḽi tevhelaho Petro na khonani dzawe vha ṱuwa u ya u dalela Koronelio ngei Kesarea.

Koronelio o vha o kuvhanganya mashaka awe na dzikhonani. Musi Petro a tshi ḓa, Koronelio a mu ṱanganedza. A gwadama milenzheni ya Petro, samusi ni tshi zwi vhona afha. Fhedzi Petro a ri: ‘Takuwa; nṋe ndi muthu.’ Ee, Bivhili i sumbedza uri zwo khakhea u gwadama na u rabela muthu. Ri rabele Yehova fhedzi.

Petro a ṱanziela vho kuvhanganaho, a ri: ‘Ndi a zwi vhona uri Mudzimu u ṱanganedza vhoṱhe vha ṱoḓaho u mu shumela.’ Musi a tshi khou amba, Yehova a rumela muya wawe mukhethwa, vhathu vha thoma u amba nga ndimi dzo fhambanaho. Vhafunziwa vhe vha vha vho ḓa na Petro vha mangala, ngauri vho vha vha tshi humbula uri Yehova u funa Vhayuda fhedzi. Ngauralo zwa vha funza uri Yehova ha sedzi vhathu vha lushaka luthihi sa vha re khwine khae u fhira vha luṅwe lushaka.

Mishumo 10:1-48; 11:1-18; Ndzumbululo 19:10.