Munna o gwadamaho afha ndi Stefano. Ndi mufunziwa wa Yesu a fulufhedzeaho. Fhedzi vhonani uri hu khou iteani khae zwino! Avha vhanna vha khou mu posa nga matombo mahulu. Kha ri vhone uri ndi ngani vho vhenga Stefano ngauralo lwe vha ita izwi.

Mudzimu o vha a khou ḓi thusa Stefano uri a ite vhuṱolo. Vhanna avha vho vha vha tshi khou mu pikisa nga ha u funza hawe vhathu ngoho. Fhedzi Yehova a fha Stefano vhuṱali vhuhulu, nahone Stefano a sumbedza uri avha vhanna vho vha vha tshi khou funza zwa mazwifhi. Izwi zwa tou vha sinyusa zwihulu. Ngauralo vha mu fara, vha vhidza vhathu uri vha mu zwifhele.

Tshifhe muhulu a vhudzisa Stefano: Ìzwi zwithu ndi ngoho na?’ Stefano a fhindula nga u ṋea nyambo i bvaho Bivhilini. Vhufheloni hayo, a amba uri vhathu vhavhi vho vhenga hani vhaporofita vha Yehova kale. Zwenezwo a ri: ‘Ni fana na avho vhathu. No vhulaha Yesu, nahone a no ngo thetshelesa milayo ya Yehova.’

Izwi zwa tou sinyusa vharangaphanḓa vha vhutendi! Vha shenganya maṋo. Fhedzi Stefano a imisela ṱhoho nṱha, a ri: ‘Vhonani! Ndi vhona Yesu o ima kha thungo ya u ḽa ya Yehova ṱaḓulu.’ Zwenezwo, avha vhanna vha thivha nḓevhe dzavho nga zwanḓa vha gidimela kha Stefano. Vha mu bvisela nnḓa ha muḓi.

Afha vha bvula madzhasi avho vha a fha muṱhannga Saulo uri a a linde. Ni a mu vhona Saulo? Vhaṅwe vha vhanna vha posa Stefano nga matombo. Stefano a gwadama, samusi ni tshi nga zwi vhona, a rabela kha Mudzimu: ‘Yehova, u songo vha ṱarafela itshi tshithu tshivhi.’ O zwi ḓivha uri vhaṅwe vhavho vho vha vho fhurwa nga vharangaphanḓa vha vhutendi. Stefano a fa.

Musi vhaṅwe vha tshi ni itela tshithu tshivhi, naa ni a lingedza u vha vhaisa, kana u humbela Mudzimu uri a vha vhaise? A si zwe Stefano na Yesu vha ita. Vho vha vhe na vhulenda na kha vhe vha vha vha si na vhulenda khavho. Kha ri vha edzise.

Mishumo 6:8-15; 7:1-60.