Musi Yesu a tshi khou tshimbila shangoni, a fhodza vhalwadze. Mafhungo a uvhu vhuṱolo a ambiwa miḓini yoṱhe. Ngauralo vhathu vha mu ḓisela zwihole na mabofu na madzinganḓevhe, na vhaṅwe vhanzhi vha lwalaho. Yesu a vha fhodza.

Miṅwaha i fhiraho miraru yo vha yo no fhira u bva tshee Yohane a lovhedza Yesu. Yesu a vhudza vhafunziwa vhawe uri o vha a tshi ḓo gonya Yerusalema nga u ṱavhanya, he a vha a tshi ḓo vhulawa, a konou vuwa. Nga tshenetsho tshifhinga, Yesu a fhodza vhalwadze.

Ḽiṅwe ḓuvha Yesu o vha a tshi khou funza nga Sabatha, ḓuvha ḽa u awela ḽa Vhayuda. Musadzi ane na mu vhona afha o vha a tshi lwalesa. O vha o kotama miṅwaha ya 18, a sa koni u ima a tou tswi. Yesu a vhea zwanḓa zwawe khae, a ima. A fhola!

Izwi zwa tou sinyusa vharangaphanḓa vha vhutendi. Muṅwe wavho a huwelela gogo: ‘Hu na maḓuvha a rathi ane ra fanela u shuma ngao, ndi one maḓuvha a u ḓa u fhodzwa, hu si nga Sabatha!’

Fhedzi Yesu a fhindula: ‘Vhoiwe vhanna vhavhi. Naho e ufhio wa vhoiwe a vhofholola mbongola yawe a i isa hune ya nwa nga Sabatha. Naa uyu musadzi we a vha a tshi lwala miṅwaha ya 18, ho ngo fanela u fhodzwa nga Sabatha?’ Vhanna vhavhi vha shona.

Nga murahu Yesu na vhaapostola vhawe vha yela Yerusalema. Vha tshi tou vha nnḓa ha muḓi wa Yeriko, vhahumbeli vhavhili vha mabofu vha pfa Yesu a khou fhira, vha vhidzelela: ‘Yesu ri thuse.’

Yesu a vhidza vhanna vha mabofu, a vhudzisa: ‘Ndi ni itele mini?’ Vha ri: ‘Murena, ita uri maṱo ashu a vulee.’ Yesu a fara maṱo avho, vha kona u vhona nga u ṱavhanya! Yesu o ita uvhu vhuṱolo hoṱhe ngauri o vha a tshi funa vhathu nahone o vha a tshi ṱoḓa uri vha mu tende. Ngauralo ri nga khwaṱhisa uri musi e Khosi a hu na ane a ḓo dovha a lwala kha ḽifhasi.

Mateo 15:30, 31; Luka 13:10-17; Mateo 20:29-34.