Ho vha hu vhusiku ha Ḽavhuna zwino. Yesu na vhaapostola vhawe vha 12 vho vha vho ḓa nḓuni iyi ya nṱha uri vha ḽe zwiḽiwa zwa Paseka. Munna a khou ṱuwaho ndi Yudasi Iskariote. O vha a tshi khou ya u vhudza vhotshifhe uri vha nga wana hani Yesu.

Nga ḓuvha ḽa phanḓa ha iḽo, Yudasi o vha o ya khavho a vha vhudzisa: ‘Ni ḓo mpha mini arali nda ni thusa u fara Yesu?’ Vha ri: ‘Maseṱha a furaru.’ Zwino Yudasi o vha a tshi khou ya u ṱangana na avho vhanna uri a kone u vha isa kha Yesu.

Zwiḽiwa zwa Paseka zwo vha zwo no fhela. Yesu a thoma zwiṅwe zwiḽiwa zwo khetheaho. A ṋekedza vhaapostola vhawe ḽofo ya vhurotho a ri: ‘Vhu ḽeni, ngauri vhu amba muvhili wanga une wa ḓo ṋekedzelwa vhoinwi.’ A vha ṋekedza na ngilasi ya veine a ri: ‘Inweni, ngauri i amba malofha anga, ane a ḓo shululelwa vhoinwi.’ Bivhili i zwi vhidza ‘zwiḽiwa zwa Murena zwa madekwana,’ kana ‘tshilalelo tsha Murena.’

Vhaisiraele vho ḽa Paseka u vha humbudza musi muruṅwa wa Mudzimu a tshi ‘fhira’ nnḓu dzavho Egipita, fhedzi a vhulaha tanzhe nḓuni dza Vhaegipita. Fhedzi zwino Yesu o ṱoḓa uri vhatevheli vhawe vha mu humbule, na uri o vha ṋekedzela hani vhutshilo hawe. Ndi nga hone o vha vhudza uri vha ite zwiḽiwa izwi zwo khetheaho ṅwaha muṅwe na muṅwe.

Vho no ḽa Zwiḽiwa zwa Murena zwa Madekwana, Yesu a vhudza vhaapostola vhawe uri vha si ofhe vha khwaṱhe lutendoni. Mafheleloni, vha imbela Mudzimu dzinyimbo vha ṱuwa. Ho vha ho no vha vhusiku vhuhulu. Kha ri vhone uri vho ya ngafhi.

Mateo 26:14-30; Luka 22:1-39; Yohane dzindima 13 a ya kha 17; 1 Vhakorinta 11:20.