Vhathu vha linganaho 50 000 vha fara lwendo lulapfu lwa u bva Babele u ya Yerusalema. Fhedzi musi vha tshi swika, Yerusalema wo vha u tshi sokou vha shubi ḽihulu. Ho vha hu si na a dzulaho henefho. Vhaisiraele vha fanela u dovha u fhaṱa zwoṱhe.

Tshiṅwe tsha zwithu zwa u thoma zwe vha fhaṱa ndi aletare. Afha ndi fhethu he vha vha vha tshi nga itela hone zwiṱhavhelo zwa zwipuka, kana zwifhiwa, kha Yehova. Miṅwedzi i si minzhi nga murahu Vhaisiraele vha thoma u fhaṱa thembele. Fhedzi maswina a dzulaho tsini a lingedza u vha shushedza u itela uri vha litshe u i fhaṱa. Mafheleloni, aya maswina a ita uri khosi ntswa ya Peresia i ite mulayo wa u litshisa mushumo wa u fhaṱa.

Miṅwaha ya fhira. Zwino ho vha ho no vha miṅwaha ya 17 tshee Vhaisiraele vha vhuya Babele. Yehova a rumela vhaporofita vhawe Hagai na Sakaria u vhudza vhathu uri vha thome u fhaṱa hafhu. Vhathu vha fulufhedza thuso ya Yehova, nahone vha pfa vhaporofita. Vha thoma u fhaṱa, naho mulayo u tshi hana.

Ha ḓa Thathanai mushumeli wa muvhuso wa Peresia a vhudzisa Vhaisiraele uri vha na ifhio ndugelo ya u fhaṱa thembele. Vhaisiraele vha mu vhudza uri musi vhe Babele, Khosi Korese o ri: ‘Ṱuwani, ni ye Yerusalema ni fhaṱe thembele ya Mudzimu waṋu.’

Thathanai a rumela vhurifhi Babele u vhudzisa arali Korese, we a vha o no fa, o amba izwo. Nga u ṱavhanya vhurifhi vhu bvaho kha khosi ntswa ya Peresia ha vhuya. Ha amba uri Korese o zwi amba vhukuma. Ngauralo khosi ya ṅwala: ‘Litshani Vhaisiraele vha fhaṱe thembele ya Mudzimu wavho. Ndi ni laya uri ni vha thuse.’ Nga miṅwaha i ṱoḓaho u vha miṋa thembele yo vha yo fhela.

Miṅwaha minzhi ya fhira. Zwino yo vha i miṅwaha ine ya nga vha 48 u bva tshee thembele ya fhela. Vhathu vha Yerusalema vho vha vha tshi shaya, nahone muḓi na thembele ya Mudzimu zwo vha zwi songo naka. Murahu Babele, Muisiraele Esera a pfa nga ha u shaea ha u lugisa thembele. Ni a ḓivha uri a ita mini?

Esera a ya u vhona Arithasasitha, khosi ya Peresia, ya mu fha zwifhiwa zwinzhi zwa u isa Yerusalema. Esera a humbela Vhaisiraele vha re Babele uri vha mu thuse u hwala zwifhiwa izwi zwi tshi ya Yerusalema. Vhathu vha ṱoḓaho u vha 6 000 vha tenda. Vho vha vhe na tsimbitseṱha na musuku na zwiṅwe zwavhuḓi.

Esera a vhilaela, ngauri ho vha hu na vhathu vhavhi nḓilani. Avha vhathu vhavhi vho vha vha tshi nga vha dzhiela tsimbitseṱha yavho na musuku, vha vha vhulaha. Esera a kuvhanganya vhathu, samusi ni tshi nga zwi vhona tshifanyisoni. Vha rabela Yehova uri a vha tsireledze lwendoni lwavho lwa u ya Yerusalema.

Yehova a vha tsireledza. Nga murahu ha miṅwedzi miṋa ya u tshimbila, vha swika zwavhuḓi Yerusalema. Naa izwi a zwi sumbedzi uri Yehova u a kona u tsireledza vha mu fulufhedzaho?

Esera dzindima 2 u ya kha 8.