Ni a humbula ni tshi pfa nga ha avha vhaṱhannga vhararu? Ee, ndi khonani dza Daniele dze dza hana u ḽa zwe zwa vha zwi songo vha lugela. Vhababele vho vha vhidza Sadaraka, Mesaka na Abedenego. Fhedzi vha vhoneni zwino. Khezwi vha sa gwadameli tshifanyiso tshihulwane u fana na vhaṅwe? Kha ri zwi wane.

Ni a humbula milayo ye Yehova ene muṋe a i ṅwala i vhidzwaho Milayo ya Fumi? Wa u thoma wayo u ri: ‘U songo rabela miṅwe midzimu nga nnḓa ha nṋe.’ vhaṱhannga vha re afha vha khou thetshelesa uyu mulayo, naho zwi sa leluwi u zwi ita.

Nebukadanetsara, khosi ya Babele, o vha o vhidza vhathu vha ḓivhaleaho uri vha ṱhonifhe tshifanyiso itshi tshe a vha o tshi imisa. O vha a kha ḓi bva u fhedza u ri kha vhathu vhoṱhe: ‘Ni tshi pfa u lila ha dziphalaphala, dzimbila na zwiṅwe zwilidzo, ni fanela a gwadama na rabela itshi tshifanyiso tsha musuku. A sa gwadami u rabela u ḓo poswa ṋanḓoni i dugaho mulilo.’

Musi Nebukadanetsara a tshi pfa uri Sadaraka, Mesaka na Abedenego a vho ngo gwadama, a sinyuwa zwihulu. A ri vha ḓiswe khae. A vha fha tshiṅwe tshifhinga tsha u gwadama. Fhedzi vhaṱhannga vha fulufhedza Yehova. Vha vhudza Nebukadanetsara: ‘Mudzimu washu ane ra mu shumela u a kona u ri tshidza. Fhedzi naho a sa ri tshidza, a ri gwadameli tshifanyiso tshau tsha musuku.’

Nebukadanetsara a tshi zwi pfa, a sinyuwa u fhirisa. Ho vha hu na ṋanḓo tsini nahone a laya: ‘Vhasedzani ṋanḓo uri i fhise kasumbe u fhira u thomani!’ Zwenezwo a ri vhanna vha maanḓa u fhira vhoṱhe vha mmbi yawe vha vhofhe Sadaraka, Mesaka na Abedenego vha vha pose ṋanḓoni. Ṋanḓo yo vha i tshi fhisa lwe vhanna vha maanḓa vha vhulawa nga dzikhavhu. Fhedzi hu pfi mini nga ha vhaṱhannga vhararu vhe vha vha posa ngomu?

Khosi ya lavhelesa ngomu ṋanḓoni, ya ofha zwihulu. Ya vhudzisa: ‘Naa a ro ngo vhofha vhanna vhararu ra vha posa ṋanḓoni i dugaho mulilo?

Vhaḓinḓa vhawe vha fhindula: Èe, ro ita ngauralo.’

A ri: ‘Fhedzi ndi khou vhona vhanna vhana vha tshi khou tshimbila muliloni. A vho ngo vhoxwa, na mulilo a u vha vhaisi. Wa vhuṋa u nga mudzimu.’ Khosi ya sendela muṋangoni wa ṋanḓo ya vhidzelela: ‘Sadaraka! Mesaka! Abedenego! Ibvani, inwi vhaḓinḓa vha Mudzimu wa Ṱaḓulu-ṱaḓulu!’

Musi vha tshi bva, vhoṱhe vha zwi vhona uri a vho ngo vhaisala. Zwenezwo khosi ya ri: ‘Kha hu rendwe Mudzimu wa Sadaraka, Mesaka na Abedenego! O rumela muruṅwa wawe u vha tshidza ngauri a vho ngo gwadama vha rabela muṅwe mudzimu nga nnḓa ha wavho.’

Naa iyi a si tsumbedzo yavhuḓi ya vhufulufhedzei kha Yehova ya uri ri i tevhele?

Ekisodo 20:3; Daniele 3:1-30.