Nganea 54: Munna wa Maanḓa Mahulu
Dzina ḽa munna wa maanḓa mahulu we a vhuya a tshila ni a ḽi ḓivha? Ndi muhaṱuli a vhidzwaho Simisoni. Ndi Yehova o fhaho Simisoni maanḓa. Na musi Simisoni a sa athu u bebwa, Yehova o vhudza mme awe: ‘U ḓo vha na murwa nga u ṱavhanya. U ḓo tshidza Isiraele kha Vhafilisita.’
Vhafilisita vho vha vhe vhathu vhavhi vha Kanana. Vho vha vhe na maswole manzhi, vha tshi vhaisa Vhaisiraele. Luthihi, musi Simisoni a khou ya he ha vha hu tshi dzula Vhafilisita, ha ḓa ndau khae i tshi khou vhomba. Fhedzi Simisoni a i vhulaha nga zwanḓa zwawe fhedzi. A vhulaha na maḓana a Vhafilisita.
Nga murahu Simisoni a funana na musadzi a no pfi Delila. Vharangaphanda vha Vhafilisita vha fulufhedzisa uri muṅwe na muṅwe u ḓo fha Delila maseṱha a 1 100 arali a vha vhudza zwi itaho uri Simisoni a vhe na maanḓa. Delila a ṱoḓa iyo tshelede. O vha a si khonani ya ngoho ya Simisoni na vhathu vha Yehova. Ngauralo a ḓi vhudzisa Simisoni zwe zwa mu ita uri a vhe na maanḓa.
Delila a vhuya a ita uri Simisoni a mu vhudze tshiphiri tsha maanḓa awe. A ri: ‘Mavhudzi anga ho ngo vhuya a vheulwa. U bva tshee nda bebwa, Mudzimu o nnanga u vha muḓinḓa wawe a vhidzwaho Mukhethwa. Nda vheulwa, ndi fhelelwa nga maanḓa.’
Zwino, Delila a tshi pfa izwi, a ita uri Simisoni a eḓele kha zwirumbi zwawe. A vhidza munna uri a dzhene a vheule mavhudzi awe. Musi Simisoni a tshi vuwa, o vha o fhelelwa nga maanḓa. Vhafilisita vha dzhena vha mu fara. Vha phula maṱo awe oṱhe, vha mu ita phuli yavho.
Ḽiṅwe ḓuvha Vhafilisita vho vha vhe na tshimima tshihulu tsha u rabela mudzimu wavho Dagoni, nahone vha bvisa Simisoni dzhele uri vha tambe ngae. Mavhudzi a Simisoni o vha o no dovha a mela. Simisoni a ri kha mutukana we a vha a tshi khou mu tshimbidza nga tshanḓa: ‘Nnditshe ndi fare phuphu dzo faraho nnḓu.’ Simisoni a rabela Yehova uri a mu fhe maanḓa, a farelela dziphuphu. A lila: ‘Kha ndi fe na Vhafilisita.’ Ho vha hu na Vhafilisita vha 3 000 tshimimani, musi Simisoni a tshi gagaḓela dziphuphu nnḓu ya wa ya vhulaha avho vhathu vhavhi vhoṱhe.
Vhahaṱuli dzindima 13 a ya kha 16.
Mbudziso
- Munna wa maanḓa mahulu we a vhuya a tshila ndi nnyi, nahone eneo maanḓa o a ṋewa nga nnyi?
- Nga tshiṅwe tshifhinga, Simisoni o ita mini ndau khulwane, samusi ni tshi khou zwi vhona kha tshifanyiso?
- Ndi tshiphiri tshifhio tshine Simisoni a khou tshi vhudza Delila afha kha tshifanyiso, nahone zwenezwi zwo ita uri a farwe nga Vhafilisita nga nḓila-ḓe?
- Simisoni o vhulaha hani Vhafilisita vha 3 000 vhe vha vha vhe maswina nga ḓuvha ḽe a fa ngaḽo?
Mbudziso dzo engedzeaho
- Vhalani Vhahaṱuli 13:1-14.
Manoa na musadzi wawe vho vhetshela vhabebi vhane vha khou alusa vhana tsumbo yavhuḓi nga nḓila-ḓe? (Vhahaṱ. 13:8; Ps. 127:3; Vha-Ef. 6:4)
- Vhalani Vhahaṱuli 14:5-9 na 15:9-16.
Mafhungo a Simisoni a u vhulaha ndau, na u ṱhukhula thambo ntswa dze vha vha vho mu vhofha ngadzo, na u shumisa shambo ḽa luṱaha lwa mbongola u vhulaha vhanna vha 1 000 zwi dzumbulula mini nga ha u shuma ha muyamukhethwa wa Yehova?
Muyamukhethwa u ri thusa hani ṋamusi? (Vhahaṱ. 14:6; 15:14; Sak. 4:6; Mish. 4:31)
- Vhalani Vhahaṱuli 16:18-31.
Simisoni o ṱuṱuwedzwa hani nga khonani mmbi, nahone ri guda mini kha zwenezwi? (Vhahaṱ. 16:18, 19; 1 Vha-Kor. 15:33)
