Ndima Ya 23

Vhuṅwe Vhuṱolo Kapernaume

SABATHA ya musi Yesu o no vhidza vhafunziwa vhawe vhaṋa vha u thoma​—Petro, Andrea, Yakobo, na Yohane—​vhoṱhe vha ya tshikoloni tsha henefho Kapernaume. Henefho Yesu u thoma u funza, nahone vhathu vha a mangala ngauri u funza sa a re na maanḓa a sa ngi vha maṅwalo.

Nga heyi Sabatha hu na muṅwe munna a re na muya muvhi. Nga murahu ha tshifhinganyana, u a zhamba nga ipfi ḽihulu: “U na mafhungo-ḓe na riṋe, iwe Yesu wa Nazareta? Wo ḓa u ri fhedza. Ndi a U ḓivha zwauri U nnyi; ndi’we Mukhethwa wa Mudzimu.”

Dimoni ḽine ḽa khou langa onoyo munna vhukuma ndi muṅwe wa vharuṅwa vha Sathane. A tshi kaidza ḽeneḽo dimoni, Yesu u ri: “Fhumula, U bve kha muthu uyo!”

Ee, ḽeneḽo dimoni ḽa khwiḓukanya onoyo munna nahone ḽa zhamba zwihulu. Fhedzi ḽa bva kha onoyo munna ḽi songo mu huvhadza. Muṅwe na muṅwe o akhamala! Vha a vhudzisa: “Ndi zwithu-ḓe izwi? Ú vhusa mimuya mivhi, huno i a mu pfa.” Mafhungo a zwenezwi a phaḓalala fhethu hoṱhe.

Vha tshi bva tshikoloni, Yesu na vhafunziwa vhawe vha ya hayani ha Simoni, kana Petro. Henefho makhulu wa Petro u khou lwala u na biso ḽihulu. Vha a humbela: ‘Nga khumbelo, mu thuse.’ Ngauralo Yesu u a ya, u mu fara nga tshanḓa, a mu vusa. A mbo ḓi fhola na zwenezwo a thoma u vha bikela!

Nga murahu, musi ḽo no kovhela, vhathu vhane vha bva thungo dzoṱhe vha thoma u ḓa nḓuni ya Petro vhe na vhalwadze vhavho. Nga u ṱavhanya muḓi woṱhe u kuvhangana muṋangoni! Nahone Yesu u fhodza vhalwadze vhavho vhoṱhe, hu sa londwi uri malwadze avho o tou itisa hani. U ita na u vhofholola vha re na madimoni. Musi a tshi bvela nnḓa, madimoni ane a a pandela a a zhamba: “Murwa wa Mudzimu ndi iwe.” Fhedzi Yesu u a a kaidza nahone a si a tendele u amba ngauri a a zwi ḓivha uri ndi Kristo. Marko 1:21-34; Luka 4:31-41; Mateo 8:14-17.

▪ Hu bvelela mini tshikoloni nga Sabatha ya nga murahu ha musi Yesu a tshi vhidza vhafunziwa vhawe vhaṋa?

▪ Yesu u ya ngafhi musi a tshi bva tshikoloni, nahone ndi vhuṱolo vhufhio vhune a vhu ita henefho?

▪ Hu bvelela mini nga murahu madekwana eneo?