Samusi zwo ṅwalwa kha 1 Vha-Korinta 6:1-8, muapostola Paulo o haseledza nga ha u hwelelana khothe vhukati ha vhatendi. O kulwa nungo nga uri vhaṅwe Vhakriste vha ngei Korinta vho vha vha tshi ‘yo sengiswa nga vha songo lugaho.’ (Ndimana 1) Paulo o ṋea zwiitisi zwi pfalaho uri ndi ngani Vhakriste vha songo fanela u hwelelana khothe, fhedzi vha tshi fanela u piringulula vhuleme havho tshivhidzoni. Kha ri ṱolisise zwiṅwe zwiitisi zwo itaho uri hu ṋewe yeneyi nyeletshedzo yo hevhedzwaho nahone ri haseledze vhuimo vhu si gathi vhune yeneyi nyeletshedzo ya sa vhu ṱanganye.

Arali ri na vhuleme ha zwa mabindu na mutendi nga riṋe, ri fanela u thoma ra vhu piringulula nga nḓila ya Yehova, hu si yashu. (Mirero 14:12) Samusi Yesu o zwi sumbedza, ndi khwine u piringulula vhuleme nga u ṱavhanya vhu sa athu hulela. (Mateo 5:23-26) Naho zwo ralo, zwi pfisaho vhuṱungu ndi uri vhaṅwe Vhakriste vha vusa khani lune vha fheleledza vho hwelelana khothe. Paulo o ri: “Na hone iṱali hó no ḓi vha u kundelwa kha inwi, arali hú na u sengisana kha inwi.” Ndi ngani? Tshiitisi tsha ndeme ndi uri u ita zwenezwo zwi tshinya dzina ḽa tshivhidzo na Mudzimu ane ra mu gwadamela. Nga zwenezwo ri fanela u dzhiela nṱha nyeletshedzo ya Paulo ine ya ri: “Ndi mini ní sa ri: Khwine ndi uri ra ṱangulwa zwashu”?—Ndimana 7.

Paulo o dovha a amba uri Mudzimu o ṋea tshivhidzo ndugiselelo yavhuḓi ya u piringulula vhuleme ho fhamba-fhambanaho. Vhahulwane ndi vhanna vha Vhakriste vhane vha vha na vhuṱali nga ṅwambo wa nḓivho yavho ya mafhungo-ngoho a Maṅwalo nahone Paulo o amba uri vha “a kona u sengela murathu” musi zwi tshi ḓa kha mafhungo a “vhuno vhutshilo.” (Dzindimana 3-5) Yesu o amba uri vhuleme vhune ha katela vhukhakhi vhuhulwane, vhu ngaho u remba na u fhura, vhu fanelwa u dzudzanywa hu tshi tevhelwa vhukando vhuraru: ha u thoma, hu itwe vhuḓidini ha u piringulula eneo mafhungo tshiphirini vhukati ha vhane vha kwamea; arali vhukando ha u thoma ha sa bvelela, hu tevhele ha vhuvhili, hu vhidzwe ṱhanzi nthihi kana mbili; nahone arali vhukando honoho ha sa bvelela, hu tevhele ha vhuraru, eneo  mafhungo a iswe tshivhidzoni samusi tshi tshi imelwa nga vhahulwane.—Mateo 18:15-17.

Ndi ngoho uri vhahulwane vha Vhakriste a si vhoramilayo kana vhoramabindu nahone a zwi vhuyi zwa ṱoḓa uri vha ḓivhe mafhungo a tshimbidzanaho na zwenezwo zwithu. A vha vhei milayo ya u piringulula vhuleme vhune ha nga vha hone kha vhahashu. Nṱhani hazwo, vha ṱoḓa u thusa vhathu vhoṱhe uri vha shumise Maṅwalo nahone vha piringulule vhuleme nga mulalo. Kha mafhungo o serekanaho, vha nga kha ḓi kwamana na mulavhelesi wa ḽiisela kana ofisi ya davhi ya Ṱhanzi dza Yehova. Naho zwo ralo, hu na zwiṅwe zwiimo zwi sa katelwi kha nyeletshedzo ya Paulo. Ndi zwifhio zwiṅwe zwazwo?

Kha vhuṅwe vhuimo, u hwelela mulandu khothe zwi nga sokou vha maitele a u ḓadzisa mulayo u itela uri hu sa vhe na ane a vha na tseḓa nahone mafhungo a dzudzanywe nga mulalo. Sa tsumbo, u hwelela mulandu khothe i nga vha i yone nḓila nthihi fhedzi ya u wana ḽiṅwalwa ḽa muṱalano, u wana ndugelo ya u vha muunḓi wa ṅwana, u wana tshelede ine ya ṋewa mufarisi wa kale wa mbingano, u wana tshelede ya ndindakhombo, u vha kha mutevhe wa vhathu vhane vha tea u ṋewa tshelede musi mukolodi a tshi amba uri ha koni u lifha tshikolodo, na u khwaṱhisedza uri maṅwalwa a ndaka a mulayoni. Hu na vhuṅwe vhuimo vhune wahashu a nga vhona zwo tea uri a ye khothe u itela u ḓitsireledza kha muthu we a mu hwelela. *

Arali honoho u hwelelana khothe ha sa itwa nga muya wa u pikisana, hu nga kha ḓi sa pfuka nyeletshedzo ye ya hevhedzwa nga Paulo. * Naho zwo ralo, tshithu tsha ndeme kha Mukriste ndi u ita uri dzina ḽa Yehova ḽi khethwe na uri hu vhe na mulalo na vhuthihi tshivhidzoni. Vhatevheli vha Kristo vha vhonala nga lufuno lwavho, nahone “lufuno . . . a lu ḓi-ṱoḓeli zwalwo.”—1 Vha-Korinta 13:4, 5; Yohane 13:34, 35.