NDI a fulufhela ni ḓo tendelana na nṋe uri vhaṅwe vhathu ndi vhahulwane nahone vha na maanḓa ane a fhira aṋu na anga. Ndi nnyi ane na humbula uri ndi muhulwane kha riṋe?— Ndi Yehova Mudzimu. Hu pfi mini nga Murwa wawe, Mufunzi Muhulu? Naa ndi muhulwane kha riṋe?— Ee.

Yesu o tshila na Mudzimu ṱaḓulu. O vha e Murwa wa muya kana muruṅwa. Naa Mudzimu o ita vhaṅwe vharuṅwa, kana vhana vha muya?— Ee, o ita vha dzimilioni. Vhenevha vharuṅwa ndi vhahulwane kha riṋe nahone vha na maanḓa mahulwane ane a fhira ashu.—Psalme ya 104:4; Daniele 7:10.

Ni kha ḓi humbula dzina ḽa muruṅwa we a amba na Maria?— Ndi Gabriele. O vhudza Maria uri ṅwana wawe o vha a tshi ḓo vha Murwa wa Mudzimu. Mudzimu o dzhenisa vhutshilo ha Murwa wawe wa muya mbumbeloni ya Maria u itela uri Yesu a kone u bebiwa sa ṅwana fhano kha ḽifhasi.—Luka 1:26, 27.

Ni a tenda honovhu vhuṱolo? Ni a tenda uri Yesu o tshila ṱaḓulu na Mudzimu?— Yesu o amba uri o tshila ṱaḓulu. Yesu o ḓivha hani nga ha zwenezwo zwithu? Musi a tshee mutukana, khamusi Maria o mu vhudza zwe Gabriele a zwi amba. Hafhu, khamusi Yosefa o vhudza Yesu uri Khotsi awe wa vhukuma ndi Mudzimu.

Musi Yesu a tshi lovhedzwa, Mudzimu o amba e ṱaḓulu, a ri: “Ndi ene Murwa . . . wanga.” (Mateo 3:17) Nahone vhusikuni ha musi a sa athu fa, Yesu  o rabela a ri: “Zwino ṋea nṋe vhugala, iwe Khotsi, tsini hau, vhugalani he nda vha ndi naho’ ndí na iwe shango ḽí sathu u vha hone.” (Yohane 17:5) Ee, Yesu o humbela uri a dovhe a humiselwe ṱaḓulu uri a ye u tshila na Mudzimu. O vha a tshi ḓo ya hani ṱaḓulu?— Arali fhedzi Yehova Mudzimu a dovha a mu ita uri a vhe muthu wa muya a sa vhonali, kana muruṅwa.

Zwino ndi ṱoḓa u ni vhudzisa iṅwe mbudziso ya ndeme. Naa vharuṅwa vhoṱhe vho luga? Ni nga ri mini?— Tshifhingani tsho fhiraho vhoṱhe vho vha vho luga. Ndi nga ṅwambo wa uri vho sikwa nga Yehova, nahone zwoṱhe zwine a zwi ita ndi zwavhuḓi. Fhedzi muṅwe muruṅwa o mbo ḓi vha muvhi. Zwenezwi zwo itea hani?

U itela uri ri wane phindulo, ri fanela u vhuyelela murahu tshifhingani tshee Mudzimu a ita vhathu vha u thoma, Adamu na Eva. Vhaṅwe vhathu vha amba uri mafhungo avho a sokou vha lungano. Fhedzi Mufunzi Muhulu u a zwi ḓivha uri mafhungo avho ndi a ngoho.

Musi Mudzimu a tshi ita Adamu na Eva, o vha vhea tsimuni yo nakaho, fhethu hune ha pfi Edeni. Ho vha hu phakha, paradiso. Vho vha vha tshi nga vha vho vha na vhana vhanzhi, muṱa muhulwane, nahone vha tshila tshoṱhe Paradisoni. Fhedzi vho vha vho fanela u guda ngudo ya ndeme. Yeneyo ngudo ro no ḓi amba nga hayo. Kha ri vhone arali ri tshi kha ḓi i humbula.

 Yehova o vhudza Adamu na Eva uri vho vha vha tshi nga ḽa mitshelo yoṱhe ine ya vha i funa kha miri i re tsimuni. Fhedzi ho vha hu na muṅwe muri we vha vha vha songo fanela u ḽa mutshelo wawo. Mudzimu o vha vhudza zwe zwa vha zwi tshi ḓo itea arali vha ḽa wonoyo mutshelo. O ri: “U ḓo vha wa u fa.” (Genesi 2:17) Ndi ngudo ifhio ye Adamu na Eva vha vha vho fanela u i guda?—

Yo vha i ngudo ya u thetshelesa. Ee, vho vha vha tshi fanela u thetshelesa Yehova Mudzimu uri vha tshile! Zwo vha zwi songo eḓana uri Adamu na Eva vha sokou amba uri vha ḓo mu thetshelesa. Vho vha vho fanela u sumbedza uri vha ḓo mu thetshelesa nga zwithu zwe vha zwi ita. Arali vha thetshelese Mudzimu, vho vha vha tshi ḓo sumbedza uri vha a mu funa nahone vha ṱoḓa uri a vhe Muvhusi wavho. Vho vha vha tshi ḓo tshila tshoṱhe Paradisoni arali vha ite zwenezwo. Fhedzi arali vha ḽe mutshelo wa wonoyo muri, zwo vha zwi tshi ḓo sumbedza mini?—

Zwo vha zwi tshi ḓo sumbedza uri vhukuma a vha livhuhi zwe Mudzimu a vha ṋea zwone. Naa no vha ni tshi ḓo vha no thetshelesa Yehova arali no vha ni henefho?— U thomani Adamu na Eva vho thetshelesa. Fhedzi Eva a fhuriwa nga muṅwe muthu ane a vha muhulwane khae. A mu ita uri a sa thetshelese Yehova. Onoyo muthu o vha a tshi pfi nnyi?—

 Bivhili i amba uri ṋowa yo amba na Eva. Fhedzi ni a zwi ḓivha uri ṋowa a i koni u amba. Zwo ḓa hani uri i kone u amba?— Muṅwe muruṅwa o ita uri zwi vhonale u nga ndi ṋowa ye ya vha i tshi khou amba. Fhedzi ngoho ndi ya uri ho vha hu tshi khou amba muruṅwa. Onoyo muruṅwa o thoma u humbula zwithu zwivhi. O vha tshi ṱoḓa uri Adamu na Eva vha mu gwadamele. O vha a tshi ṱoḓa uri vha ite zwithu zwine a zwi amba. O vha a tshi ṱoḓa u dzhia vhuimo ha Mudzimu.

Ndi izwi-ha onoyo muruṅwa muvhi a tshi dzhenisa mahumbulele mavhi kha ngelekanyo ya Eva. A amba nae a tshi shumisa ṋowa a ri: ‘Mudzimu ho ngo ni vhudza ngoho. A ni nga fi arali na ḽa mutshelo wa wonoyo muri. Ni ḓo ṱalifha u fana na Mudzimu.’ Naa no vha ni tshi ḓo vha no tenda zwenezwo zwithu?—

Eva a thoma u ṱoḓa zwithu zwe Mudzimu a sa mu ṋee. A ḽa mutshelo wa muri wo dzivhiswaho. Nga murahu a dzhia muṅwe a u ṋea Adamu. Adamu o vha a sa tendi zwe zwa ambiwa nga ṋowa. Fhedzi o vha a tshi funesa Eva u fhira Mudzimu. Na ene-vho a mbo ḓi ḽa mutshelo wa wonoyo muri.—Genesi 3:1-6; 1 Timotheo 2:14.

Ho mbo ḓi itea mini?— Adamu na Eva a vho ngo tsha fhelela, vho mbo ḓi vha vhalala, nahone vha fa. Nahone nga ṅwambo wa uri vho  vha vha songo fhelela, na vhana vhavho vhoṱhe a vho ngo tsha fhelela nahone vha fheleledza vho vha vhalala nahone vha fa. Mudzimu o vha a songo zwifha! Ri ḓo bvela phanḓa ri tshi tshila arali ra mu thetshelesa. (Vha-Roma 5:12) Bivhili i ri vhudza uri muruṅwa we a zwifhela Eva o vha a tshi pfi Sathane Diabolo, nahone vhaṅwe vharuṅwa vhe vha vha vhavhi vha vhidzwa madimoni.—Yakobo 2:19; Ndzumbululo 12:9.

Naa zwino ni a zwi vhona uri zwo ḓa hani uri muruṅwa wavhuḓi o sikwaho nga Mudzimu a mbo ḓi vha muvhi?— Ndi nga ṅwambo wa uri o thoma u humbula zwithu zwivhi. O vha a tshi ṱoḓa u vha wa U Thoma. O vha a tshi zwi ḓivha uri Mudzimu o vhudza Adamu na Eva uri vha vhe na vhana, nahone o vha a tshi ṱoḓa uri vhoṱhe vha mu gwadamele. Diabolo u ṱoḓa uri muṅwe na muṅwe a sa thetshelese Yehova. Nga zwenezwo u lingedza u dzhenisa mihumbulo yo khakheaho ngeleloni dzashu.—Yakobo 1:13-15.

Diabolo u amba uri a hu na muthu ane ngangoho a funa Yehova. U amba uri nṋe na inwi a ri funi Mudzimu na uri a ri ṱoḓi u ita zwine Mudzimu a zwi amba. U amba uri ri thetshelesa Yehova musi fhedzi zwithu zwoṱhe zwi tshi ri tshimbilela zwavhuḓi. Naa Diabolo u khou amba ngoho? Naa ro tou ralo?

Mufunzi Muhulu o amba uri Diabolo ndi muzwifhi! Yesu o sumbedza uri ngangoho u funa Yehova nga u Mu thetshelesa. Nahone Yesu ho ngo thetshelesa Mudzimu musi zwithu zwi tshi mu tshimbilela zwavhuḓi. O mu thetshelesa tshifhinga tshoṱhe, na musi vhaṅwe vhathu vha tshi ita uri zwi mu konḓele uri a thetshelese. O fulufhedzea kha Yehova u swika a tshi fa. Ndi ngazwo Mudzimu o mu vusa uri a tshile tshoṱhe.

Nga zwenezwo-ha, ni nga ri swina ḽashu ḽihulwanesa ndi nnyi?— Ndi Sathane Diabolo. Ni nga mu vhona?— Hai! Fhedzi ri a zwi ḓivha uri u hone na uri ndi muhulwane nahone u na maanḓa mahulwane kha riṋe. Naho zwo ralo, ndi nnyi ane a vha muhulwane kha Diabolo?— Ndi Yehova Mudzimu. Nga zwenezwo ri a zwi ḓivha uri Mudzimu a nga ri tsireledza.