Mudzimu u amba na riṋe a tshi shumisa Bivhili. Ri fanela u i guda u itela u ḓivha Muṅwali wayo. (Yohane 17:3; 2 Timotheo 3:16) Khayo ri guda nga ha zwipikwa zwa Yehova Mudzimu nga ha vhathu na zwine a ḓo vha itela zwone kha ḽifhasi.​—Genesi 3:15; Nzumbululo 21:3, 4.

A hu na iṅwe bugu ine ya kwama vhathu u fana nayo. Bivhili i ri ṱuṱuwedza uri ri sumbedze lufuno, khathutshelo na u pfela vhuṱungu u fana na Yehova. I ṋea fhulufhelo na u thusa vhathu uri vha konḓelele hu sa londwi vhuimo vhu konḓaho. I bvela phanḓa i tshi sumbedza zwithu zwine zwa itea kha ḽino shango zwi sa tshimbidzani na zwine Mudzimu a zwi funa.​—Phisalema 119:105; Vhahevheru 4:12; 1 Yohane 2:15-17.

Yo thoma u ṅwaliwa nga Tshihevheru, Tshiaramiki na Tshigerika, fhedzi zwino yo ṱalutshedzelwa nga nyambo dzi ṱoḓaho u vha 3 000 yo fhelela kana zwipiḓa zwayo. Ndi yone bugu yo ṱalutshedzelwaho na u phaḓaladzwa u fhira bugu dzoṱhe nahone zwenezwi a zwi ri mangadzi. Bivhili yo porofita uri: “Huno aya mafhungo maḓifha a Muvhuso [ane a vha mulaedza wa ndeme u re Bivhilini] a ḓo ḓivhadzwa ḽifhasini ḽoṱhe uri a pfiwe nga tshaka dzoṱhe, nga murahu ndi hone vhufhelo vhu tshi ḓo ḓa.”​—Mateo 24:14.

Musi ri tshi vhona uri mulaedza u re Bivhilini ndi wa ndeme, ro ṱalutshedzela Bivhili ri na tshipikwa tsha u fhirisa mulaedza wayo nga nḓila ine wa vha ngayo na u ita uri i vhalee na u pfesesea nga ho leluwaho. Kha Ṱhumetshedzo hu na zwiṱoho zwine zwa ri: “Nḓila Ine Bivhili Ya Ṱalutshedzelwa Ngayo,” “Zwine Zwa Wanala Kha Heyi Bivhili” na “Nḓila Ye Bivhili Ya Swika Ngayo Kha Riṋe.” Zwenezwi zwiṱoho zwi haseledza nḓila ye luambo lwa khwiniswa ngayo kha yeneyi Bivhili uri lu pfesesee.

Vhane vha funa Yehova Mudzimu na u mu gwadamela vha ṱoḓa uri mulaedza u re Ipfini ḽawe u ṱalutshedzelwe nga nḓila ine wa vha ngayo na nga nḓila i pfalaho na i pfeseseaho. (1 Timotheo 2:4) Nga nṱhani ha zwenezwo, ro ita uri yeneyi Bivhili i vhe hone nga Tshivenḓa, ri na tshipikwa tsha uri Bivhili ya Ṱhalutshedzelo Ya Shango Ḽiswa ya Tshiisimane i ṱalutshedzelwe nga nyambo nnzhi nga hune zwa nga konadzea ngaho. Ri rabela na u fhufhela uri inwi sa muvhali, ni ḓo vhuyelwa nga u vhala yeneyi Bivhili musi ni tshi khou bvela phanḓa u ‘ṱoḓa Mudzimu uri ni mu wane.’​—Mishumo 17:27.