Evangeli Ya Yohane 8:12-59
8 12 Yesu a dovha a ri: “Ndi nṋe tshedza tsha shango.+ Ane a ntevhela ha nga ḓo tshimbila swiswini, fhedzi u ḓo vha na tshedza+ tsha vhutshilo.”
13 Vhafarisei vha ri: “Iwe u ṱanziela nga ha iwe muṋe; vhuṱanzi hau a si ha ngoho.”
14 Yesu a ri: “Naho ndi tshi ṱanziela nga ha nṋe muṋe, vhuṱanzi hanga ndi ha ngoho, ngauri ndi a ḓivha hune nda bva hone na hune nda khou ya hone.+ Fhedzi inwi a ni ḓivhi hune nda bva hone na hune nda khou ya hone.
15 Inwi ni haṱula u ya nga nḓila ine vhathu vha humbula ngayo;+ nṋe a thi haṱuli muthu.
16 Naho nda haṱula, khaṱhulo yanga ndi ya ngoho, ngauri a thi ndoṱhe, Khotsi o nthumaho u na nṋe.+
17 Zwiṅwe hafhu, kha Mulayo waṋu ho ṅwaliwa u pfi: ‘Vhuṱanzi ha vhathu vhavhili ndi ha ngoho.’+
18 Ndi ṱanziela nga ha nṋe muṋe, na Khotsi anga o nthumaho u a ṱanziela nga ha nṋe.”+
19 Vhone vha ri: “Khotsi au u ngafhi?” Yesu a ri: “Nṋe a ni nḓivhi na Khotsi anga a ni mu ḓivhi.+ Arali no vha ni tshi nḓivha, no vha ni tshi ḓo ḓivha na Khotsi anga.”+
20 O amba zwenezwo e fhethu hune ha dzula mbulungelo ya tshelede+ musi a tshi khou funza thembeleni. Fhedzi a hu na we a mu fara, ngauri tshifhinga tshawe tsho vha tshi sa athu u swika.+
21 A dovha a ri: “Ndi khou ṱuwa, ni ḓo nṱoḓa, hone ni ḓo fela zwivhini zwaṋu.+ Hune nda khou ya hone ni nga si kone u ḓa.”+
22 Vhayuda vha ri: “Naa uyu munna u khou ṱoḓa u ḓivhulaya? Ngauri u ri, ‘Hune nda khou ya hone ni nga si kone u ḓa.’”
23 Ene a ri: “Inwi ni vha fhano fhasi; nṋe ndi bva ngei nṱha;+ inwi ni bva kha ḽino shango; nṋe a thi bvi kha ḽino shango.
24 Ndi ngazwo ndo ri: Ni ḓo fela zwivhini zwaṋu. Arali ni sa tendi uri ndi nṋe, ni ḓo fela zwivhini zwaṋu.”
25 Vhone vha ri: “Ndi iwe nnyi?” Yesu a ri: “Ndi khou ḓidinelani nga u amba na inwi?
26 Ndi na zwithu zwinzhi zwine nda nga zwi amba nga ha inwi na zwine nda ḓo zwi haṱula. Zwi re zwone ndi uri, we a nthuma ndi wa vhukuma. Zwithu zwe nda zwi pfa khae ndi khou zwi amba shangoni.”+
27 A vho ngo zwi pfesesa uri o vha a tshi khou amba navho nga ha Khotsi.
28 Yesu a ri: “Musi no no imisela nṱha Murwa muthu,+ ndi hone ni tshi ḓo ḓivha uri ndi nṋe,+ na uri a hu na tshine nda tshi ita nga ndoṱhe;+ ndi amba zwe nda funzwa nga Khotsi.
29 Hone O nthumaho u na nṋe; ho ngo nndaṱedza, ngauri ndi dzula ndi tshi ita zwi mu takadzaho.”+
30 Musi a tshi amba zwenezwo, vhanzhi vha mu tenda.
31 Yesu a amba na Vhayuda vho mu tendaho a ri: “Arali na tevhedza zwine nda amba, ni vhafunziwa vhanga zwa vhukuma,
32 ni ḓo ḓivha ngoho,+ hone ngoho i ḓo ni vhofholola.”+
33 Vhone vha ri: “Ri vhana vha Abrahamu, a ri athu u vhuya ra vha vhalanda vha muthu. Ndi ngani u tshi ri, ‘Ni ḓo vhofhololwa’?”
34 Yesu a ri: “Ngoho ndi a ni vhudza ndi ri, ane a ita tshivhi ndi phuli ya tshivhi.+
35 Naho zwo ralo, phuli a i dzuli nḓuni ya muṋe wayo lwa tshoṱhe; a dzulaho lwa tshoṱhe ndi murwa.
36 Arali Murwa a ni vhofholola, ni ḓo vha no vhofhololwa zwa vhukuma.
37 Ndi a zwi ḓivha uri ni vhana vha Abrahamu. Fhedzi ni khou ṱoḓa u mmbulaya, ngauri a ni ṱanganedzi zwine nda amba.
38 Ndi amba zwithu zwe nda zwi vhona musi ndi na Khotsi anga,+ fhedzi inwi itani zwithu zwe na zwi pfa kha khotsi aṋu.”
39 Vhone vha ri: “Khotsi ashu ndi Abrahamu.” Yesu a ri: “Arali ni vhe ni vhana vha Abrahamu,+ no vha ni tshi ḓo ita mishumo ya Abrahamu.
40 Fhedzi ni khou ṱoḓa u mmbulaya, nṋe we nda ni vhudza ngoho ye nda i pfa nga Mudzimu.+ Abrahamu ho ngo ita zwenezwo.
41 Ni ita mishumo ya khotsi aṋu.” Vhone vha ri: “A ro ngo bebwa nga vhupombwe;* Khotsi ashu ndi muthihi, ndi Mudzimu.”
42 Yesu a ri: “Arali Mudzimu a vhe e Khotsi aṋu, no vha ni tshi ḓo mpfuna,+ ngauri ndo ḓa fhano ndi tshi bva kha Mudzimu. A tho ngo tou ḓiḓisa, fhedzi ndo rumiwa nga Mudzimu.+
43 A ni ṱanganedzi zwine nda zwi funza, ndi ngazwo ni sa pfesesi zwine nda zwi amba.
44 Ni bva kha khotsi aṋu Diabolo, ni tama u ita zwine zwa funwa nga khotsi aṋu.+ Onoyo o vha e muvhulayi u bva mathomoni,+ ho ngo ima kha ngoho, ngauri ha na ngoho. Musi a tshi zwifha, u amba zwine a vha zwone, ngauri ndi muzwifhi na khotsi a vhane vha zwifha.+
45 Nṋe a ni ntendi ngauri ndi ni vhudza ngoho.
46 Ndi nnyi kha inwi ane a nga amba uri ndi na tshivhi? Arali ndi tshi amba ngoho, ndi ngani ni sa ntendi?
47 Ane a bva kha Mudzimu u thetshelesa zwine Mudzimu a zwi amba.+ Ndi ngazwo ni sa nthetshelesi, ngauri a ni bvi kha Mudzimu.”+
48 Vhayuda vha ri: “Naa a ri khou amba zwone musi ri tshi ri, ‘U Musamaria,+ u na dimoni’?”+
49 Yesu a ri: “A thi na dimoni, fhedzi ndi hulisa Khotsi anga, hone inwi ni a nnyadza.
50 A thi khou ṱoḓa u huliswa;+ fhedzi ndi Mudzimu ane a ṱoḓa ndi tshi huliswa, ndi Ene ane a haṱula.
51 Ngoho ndi a ni vhudza ndi ri, ane a ita zwine nda zwi amba, a nga si fe.”+
52 Vhayuda vha ri: “Zwino ri khou zwi vhona uri u na dimoni. Abrahamu o fa, na vhaporofita vho fa, fhedzi iwe u ri, ‘Ane a ita zwine nda zwi amba, a nga si fe.’
53 Naa u fhira khotsi ashu Abrahamu we a fa? Huufha na vhaporofita vho fa. Iwe u khou ḓiita nnyi?”
54 Yesu a ri: “Arali nda ḓihulisa, u ḓihulisa hanga ndi ha fhedzi. Ndi Khotsi anga ane a nkhulisa,+ onoyo ane na amba uri ndi Mudzimu waṋu.
55 Naho zwo ralo, a ni mu ḓivhi,+ fhedzi nṋe ndi a mu ḓivha.+ Arali ndi vhe ndo ri a thi mu ḓivhi, ndo vha ndi tshi ḓo vha ndi tshi khou zwifha u fana na inwi. Fhedzi ndi a mu ḓivha ndi ngazwo ndi tshi ita zwine a amba.
56 Abrahamu khotsi aṋu o vha o takala vhukuma musi o lavhelela u vhona ḓuvha ḽanga. O ḽi vhona a takala.”+
57 Vhayuda vha ri: “A u athu u vha na miṅwaha ya 50, fhedzi iwe u ri wo no vhona Abrahamu.”
58 Yesu a ri: “Ngoho ndi a ni vhudza ndi ri, musi Abrahamu a sa athu u vha hone, ndo vha ndo no vha hone.”+
59 Vha doba matombo vha mu posa ngao, fhedzi Yesu a dzumbama, a bva thembeleni.
Ṱhaluso dzi re magumoni a siaṱari
^ Kana “u ḓifara luvhi nga zwa vhudzekani.” Nga Tshigerika ndi porneia. Sedzani maipfi “U ḓifara luvhi nga zwa vhudzekani” kha Mutevhe Wa Ṱhalutshedzo Ya Maipfi.
