Evangeli Ya Yohane 20:1-31
20 Nga ḓuvha ḽa u thoma ḽa vhege, Maria Magdalena a ya vhiḓani nga matsheloni+ hu tshi kha ḓi vha na swiswi, a vhona uri tombo ḽo no bvisiwa vhiḓani.+
2 A gidimela kha Simoni Petro na mufunziwa we Yesu a vha a tshi mu funa,+ a amba navho a ri: “Vho bvisa Murena vhiḓani,+ a ri ḓivhi he vha mu vhea hone.”
3 Ndi hone Petro na onoyo mufunziwa vha tshi ya vhiḓani.
4 Vhuvhili havho vha tou ṱuwa nga u gidima, fhedzi onoyo mufunziwa a sia Petro a swika vhiḓani u thoma.
5 A ṱolela, a vhona malabi a ḽinene henefho,+ fhedzi a si dzhene.
6 Na Simoni Petro a swika, a dzhena vhiḓani. A vhona malabi henefho fhasi.
7 Labi ḽe ḽa vha ḽo pomba ṱhoho ya Yesu ḽo vha ḽi si fhethu huthihi na maṅwe malabi, fhedzi ḽo vha ḽo petiwa ḽo vhetshelwa thungo.
8 Na uḽa mufunziwa we a swika u thoma, a dzhena vhiḓani, a ri a tshi zwi vhona a tenda zwe a vhudzwa.
9 Vho vha vha sa athu u pfesesa luṅwalo lune lwa amba uri u ḓo vuswa vhafuni.+
10 Nga zwenezwo, vhafunziwa vha humela mahayani avho.
11 Maria a sala o ima henefho tsini na vhiḓa, a tshi khou lila. A ṱolela nga ngomu vhiḓani a tshi khou lila,
12 a vhona vharuṅwa vhavhili+ vho ambara zwiambaro zwitshena vho dzula he ha vha hu na tshitumbu tsha Yesu, muṅwe o dzula he ha vha hu na ṱhoho ya Yesu muṅwe o dzula he ha vha hu na milenzhe.
13 Vha amba nae vha ri: “Ndi ngani u tshi khou lila?” Ene a ri: “Vho bvisa Murena wanga vhiḓani, a thi ḓivhi he vha mu vhea hone.”
14 Musi o no amba zwenezwo, a rembuluwa a vhona Yesu o ima, fhedzi ho ngo zwi ṱhogomela uri ndi Yesu.+
15 Yesu a amba nae a ri: “U khou lilela mini? U khou ṱoḓa nnyi?” Ene a vhona u nga u khou amba na muṋe wa tsimu, a amba nae a ri: “Muṋe wanga, arali wo mu dzhia, mmbudze he wa mu vhea hone, ndi ḓo ya nda mu dzhia.”
16 Yesu a ri: “Maria!” Musi Maria a tshi rembuluwa, a amba nae nga Tshihevheru a ri: “Raboni!” (zwine zwa amba uri “Mufunzi!”)
17 Yesu a ri: “U songo nnambatela. Ngauri a thi athu u gonya kha Khotsi. Fhedzi iya kha vharathu+ vhanga u vha vhudze uri, ‘Ndi khou gonya kha Khotsi+ anga ane a vha Khotsi aṋu na kha Mudzimu+ wanga ane a vha Mudzimu waṋu.’”
18 Maria Magdalena a ya a vhudza vhafunziwa a ri: “Ndo vhona Murena!” A vha vhudza zwe Yesu a mu vhudza zwone.+
19 Nga ḽeneḽo ḓuvha ḽa u thoma ḽa vhege musi ḽo no kovhela, vhafunziwa vho vha vho ḓivalela nḓuni vha tshi khou ofha Vhayuda, Yesu a dzhena a ima vhukati havho a amba navho a ri: “Mulalo nga u vhe na inwi.”+
20 O no amba zwenezwo, a vha sumbedza zwanḓa zwawe na lurumbu lwawe.+ Ngauralo, vhafunziwa vha takala nge vha vhona Murena.+
21 Yesu a dovha a amba navho a ri: “Mulalo nga u vhe na inwi.+ Samusi Khotsi o nthuma,+ na nṋe ndi khou ni ruma.”+
22 O no amba zwenezwo a vha vhudzulela muya, a amba navho a ri: “Ṱanganedzani muya mukhethwa.+
23 Vhane na vha hangwela zwivhi, vho no hangwelwa; vhane na sa vha hangwele, a vho ngo hangwelwa.”
24 Fhedzi Thomasi,+ muṅwe wa vhaapostola vha 12, we a vha a tshi pfi Didimo,* o vha e siho musi Yesu a tshi ḓa.
25 Vhaṅwe vhafunziwa vha ri: “Ro vhona Murena!” Fhedzi ene a ri: “Arali nda sa vhona mavhadzi a zwibigiri zwanḓani zwawe, nda dzhenisa munwe wanga khao na u dzhenisa tshanḓa tshanga kha lurumbu lwawe,+ a thi nga ḓo vhuya nda tenda.”
26 Ho no fhela maḓuvha a malo vhafunziwa vha Yesu vha dovha vha ḓivalela nḓuni, vhe na Thomasi. Naho miṋango yo vha yo valiwa, Yesu a ḓa a ima vhukati havho a ri: “Mulalo nga u vhe na inwi.”+
27 A amba na Thomasi a ri: “Dzhenisa munwe wau hafha, u vhone zwanḓa zwanga. U dzhenise tshanḓa tshau kha lurumbu lwanga, u tende u litshe u timatima.”
28 Thomasi a ri: “Murena wanga na Mudzimu wanga!”
29 Yesu a ri: “Naa u khou tenda ngauri wo mmbona? Hu takala vhane vha tenda naho vha songo vhona.”
30 Ngoho ndi ya uri Yesu o dovha a ita vhuṅwe vhuṱolo vhunzhi vhafunziwa vha tshi zwi vhona, vhu songo ṅwaliwaho kha uyu mupombo.+
31 Fhedzi zwenezwi zwo ṅwaliwa uri ni tende uri Yesu ndi ene Kristo Murwa wa Mudzimu, uri nga u tenda honoho ni kone u wana vhutshilo dzinani ḽawe.+
Ṱhaluso dzi re magumoni a siaṱari
^ Kana “Ḽifhaṱa.”
