Yeremia 42:1-22
42 Ndi hone vhalangammbi vhoṱhe, Yohanani+ murwa wa Karea, Yesanya murwa wa Hosaya na vhaṅwe vhathu vhoṱhe, u bva kha muṱuku u swika kha muhulwane, vha tshi ḓa
2 vha amba na muporofita Yeremia vha ri: “Ri humbela uri u thetshelese khumbelo yashu, u ri rabelele kha Yehova Mudzimu wau, u tshi itela eneo masalela oṱhe,+ samusi u tshi khou zwi vhona uri ho sala a si gathi.
3 Ngavhe Yehova Mudzimu wau a tshi ri vhudza nḓila ine ra fanela u tshimbila khayo na zwine ra fanela u zwi ita.”
4 Muporofita Yeremia a vha fhindula a ri: “Ndo ni pfa, ndi ḓo rabela kha Yehova Mudzimu waṋu nda mu vhudza zwe na humbela; zwoṱhe zwine Yehova a zwi amba a tshi ni fhindula, ndi ḓo ni vhudza. A thi nga ni dzumbeli tshithu.”
5 Vha fhindula Yeremia vha ri: “Ngavhe Yehova a tshi vha ṱhanzi ya ngoho na i fhulufhedzeaho kha riṋe arali ra sa ita zwe Yehova Mudzimu wau a ri vhudza zwone a tshi shumisa iwe.
6 Hu sa londwi uri ndi zwavhuḓi kana a si zwavhuḓi, ri ḓo thetshelesa zwine Yehova Mudzimu washu a zwi amba, ane ra khou u ruma khae, uri zwi ri tshimbilele ngauri ri ḓo vha ro thetshelesa zwine Yehova Mudzimu washu a zwi amba.”
7 Nga murahu ha maḓuvha a fumi Yehova a amba na Yeremia.
8 A ita uri hu vhidzwe Yohanani murwa wa Karea na vhalangammbi vhoṱhe vha re nae na vhaṅwe vhathu vhoṱhe u bva kha muṱuku u swika kha muhulwane.+
9 A amba navho a ri: “Yehova Mudzimu wa Isiraele, we na nthuma khae uri ndi ni humbelele thuso, u ri:
10 ‘Arali na dzula kha ḽeneḽi shango, ndi ḓo ni fhaṱa nda si ni thuthe, ndi ḓo ni ṱavha nda si ni tupule, ngauri ndi ḓo ḓisola* nga nṱhani ha khombo ye nda ni ḓisela.+
11 Ni songo tshuwiswa nga khosi ya Babele ine na khou i ofha.’+
“‘Ni songo i ofha,’ u ralo Yehova, ‘ngauri ndi na inwi, uri ndi ni lamulele na u ni tshidza zwanḓani zwayo.
12 Ndi ḓo ni khathutshela,+ na yone i ḓo ni khathutshela ya ni humisela shangoni ḽaṋu.
13 “‘Fhedzi arali na ri, “A ri nga dzuli kha heḽi shango!” na si thetshelese zwine Yehova Mudzimu waṋu a zwi amba
14 nga u amba uri, “Ri ḓo ya shangoni ḽa Egipita,+ hune ha sa ḓo vha na dzinndwa kana u pfa luṋanga lu tshi lila kana u fa nga nḓala nga u sa vha na zwiḽiwa;* ri ḓo dzula henefho,”
15 zwino ipfani zwine Yehova a amba, inwi masalela a Yuda. Yehova wa mavhuthu, Mudzimu wa Isiraele u ri: “Arali no ḓiimisela u ya na dzula* henengei Egipita,
16 banga ḽine na khou ḽi ofha ḽi ḓo ni wana henengei shangoni ḽa Egipita, na nḓala ine na khou i ofha i ḓo ni tevhela henengei Egipita, ni ḓo fela henengei.+
17 Vhanna vhoṱhe vhe vha ḓiimisela u ya Egipita u dzula hone vha ḓo fa nga banga na nga nḓala na nga dwadze. A hu na ane a ḓo tshila kana u ponyoka khombo ine nda ḓo vha ḓisela yone.”’
18 “Ngauri Yehova wa mavhuthu, Mudzimu wa Isiraele, u ri: ‘Vhunga ndo sinyutshela vhadzulapo vha Yerusalema+ na inwi ndi ḓo ni sinyutshela arali na ya Egipita, ni ḓo vha samba, ni ḓo goḓiwa, na welwa nga khombo na u nyadziwa,+ a ni tsha ḓo dovha na vhona hafha fhethu.’
19 “Yehova o amba nga ha inwi masalela a Yuda. Ni songo ya Egipita. Ni zwi ḓivhe uri ṋamusi ndi khou ni ṋea tsevho
20 ya uri vhukhakhi haṋu vhu ḓo ita uri ni fe. Ngauri no nthuma kha Yehova Mudzimu waṋu, na ri, ‘Ri rabelele kha Yehova Mudzimu washu u ri vhudze zwoṱhe zwine Yehova Mudzimu washu a ḓo amba, ri ḓo zwi ita.’+
21 Ndo ni vhudza ṋamusi, fhedzi a ni nga thetshelesi zwe Yehova Mudzimu waṋu a zwi amba kana u ita zwithu zwe a mmbudza uri ndi ni vhudze.+
22 Nga zwenezwo, ḓivhani uri ni ḓo fela fhethu hune na ṱoḓa u ya u dzula hone nga banga, nga nḓala na nga dwadze.”+
Ṱhaluso dzi re magumoni a siaṱari
^ Kana “ndi ḓo pfa vhuṱungu.”
^ Thevhedz., “vhurotho.”
^ Kana “u dzula lwa tshifhinganyana.”
