Evangeli Ya Luka 21:1-38
21 Musi a tshi lavhelesa, a vhona vhapfumi vha tshi khou dzhenisa zwifhiwa zwavho mbulungeloni.+
2 A vhona tshilikadzi i shayaho i tshi dzhenisa zwipeni zwivhili zwi si na ndeme,*+
3 a ri: “Ngoho ndi a ni vhudza ndi ri, heyi tshilikadzi yo bvisa u fhira vhoṱhe.+
4 Ngauri vhoṱhe vho dzhenisa zwifhiwa vha tshi bvisa kha zwinzhi zwine vha vha nazwo, fhedzi naho e mushai, onoyu mufumakadzi o bvisa zwoṱhe zwe a vha e nazwo, zwe a vha a tshi ḓo ḓitshidza ngazwo.”+
5 Nga murahu, musi vhaṅwe vha tshi khou amba nga ha thembele, nga ha nḓila ye ya khavhiswa ngayo nga matombo avhuḓi na nga ha zwifhiwa zwo ṋekedzwaho Mudzimu,+
6 Yesu a ri: “Hu ḓo ḓa maḓuvha ane zwenezwi zwithu zwine na khou zwi vhona zwa ḓo wiselwa fhasi, ha si sale tombo nṱha ha ḽiṅwe.”+
7 Ngauralo, vha mu vhudzisa vha ri: “Mufunzi, izwi zwithu zwi ḓo itea lini, na uri tshiga tshi ḓo vha tshifhio tsha uri zwenezwi zwi ḓo itea?”+
8 Ene a ri: “Ni ṱhogomele uri ni si xedzwe,+ ngauri vhanzhi vha ḓo ḓa nga dzina ḽanga, vha ri, ‘Ndi nṋe,’ vha dovha vha ri, ‘Tshifhinga tsho vhewaho tsho swika.’ Ni songo vha tevhela.+
9 Musi ni tshi pfa nga ha dzinndwa na dzikhakhathi, ni songo tshuwa. Ngauri zwenezwi zwithu zwi fanela u itea u thoma, fhedzi vhufhelo a vhu nga vhi hone nga tshenetsho tshifhinga.”+
10 A dovha a ri: “Lushaka lu ḓo lwa na luṅwe lushaka+ na muvhuso wa lwa na muṅwe muvhuso.+
11 Hu ḓo vha na midzinginyo mihulu na malwadze, ha vha na nḓala fhethu hunzhi,+ vhathu vha ḓo vhona zwi ofhisaho na zwiga zwi bvaho ṱaḓulu.
12 “Musi zwenezwi zwithu zwoṱhe zwi sa athu u itea, vhathu vha ḓo ni fara vha ni tovhola,+ vha ni isa sinagogoni na dzhele. Ni ḓo iswa kha mahosi na kha vhavhusi nga nṱhani ha dzina ḽanga.+
13 Zwi ḓo ita uri ni kone u ṱanziela kha vhaṅwe.
14 Ni songo humbula hu tshee nga phanḓa nga ha nḓila ine na ḓo fhindula ngayo,+
15 ndi ḓo ni ṋea vhuṱali, nda ni thusa uri ni ḓivhe zwine na ḓo zwi amba, vhahanedzi vhaṋu vhoṱhe vha nga si kone u ni pikisa kana u ni hanedza.+
16 Zwiṅwe hafhu, ni ḓo kumedzelwa kha vhavhusi nga vhabebi, vharathu na vhakomana, mashaka na dzikhonani, vha ḓo vhulaya vhaṅwe vhaṋu,+
17 ni ḓo vhengiwa nga vhathu vhoṱhe nga nṱhani ha dzina ḽanga.+
18 Fhedzi a hu nga ṱhukhuwi na luvhudzi na luthihi lu re ṱhohoni dzaṋu.+
19 Nga u konḓelela ni ḓo ḓitshidza.+
20 “Musi ni tshi vhona Yerusalema wo tangwa nga dzimmbi,+ ni ḓivhe uri u fheliswa hawo hu tsini.+
21 Vha re Yudea vha shavhele thavhani,+ vha re nga ngomu ha muḓi vha bve khawo, vha re nnḓa hawo vha songo dzhena nga ngomu,
22 ngauri ndi maḓuvha a uri Mudzimu a lifhedze vhathu uri hu itee zwoṱhe zwo ṅwaliwaho.
23 Khombo kha vho vhifhaho muvhilini na vha mamisaho misini yeneyo!+ Ngauri hu ḓo vha na vhuṱungu vhuhulu kha ḽeneḽo shango, vhane vha dzula henefho vha ḓo pfiswa vhuṱungu.
24 Vha ḓo vhulawa nga banga, vha thubwa nga tshaka dzoṱhe;+ Yerusalema u ḓo kandekanywa nga dzitshaka,* u swikela zwifhinga zwo vhewaho zwa dzitshaka* zwi tshi fhela.+
25 “Hu ḓo vha na zwiga kha ḓuvha, ṅwedzi na ṋaledzi,+ tshaka dzi ḓo pfa vhuṱungu, dzi si ḓivhe uri dzi ite mini nga nṱhani ha u unga ha lwanzhe na u halifha halwo.
26 Vhathu vha ḓo ṋoka nga nyofho na u lindela zwithu zwine zwa ḓo itea kha ḽifhasi, ngauri ḽiṱaḓulu ḽi ḓo dzinginyea.
27 Ndi hone vha tshi ḓo vhona Murwa muthu+ a tshi ḓa e kha gole e na maanḓa na vhugala vhuhulu.+
28 Musi zwenezwi zwithu zwi tshi thoma u itea, ni vhe na maanḓa na tshivhindi, ngauri u vhofhololwa haṋu hu tsini.”
29 A vha vhudza tshifanyiso a ri: “Lavhelesani muhuyu na miri yoṱhe.+
30 Musi i tshi mela maṱari, ni a ḓivha uri tshilimo tshi tsini.
31 Na inwi ni tshi vhona zwenezwi zwithu, ni zwi ḓivhe uri Muvhuso wa Mudzimu u tsini.
32 Ngoho ndi a ni vhudza ndi ri, hoyu murafho u nga si lovhe hezwi zwithu zwoṱhe zwi sa athu u itea.+
33 Ḽiṱaḓulu na ḽifhasi zwi ḓo lovha, fhedzi maipfi anga ha nga lovhi.+
34 “Ni ṱhogomele uri mbilu dzaṋu dzi si lemelwe nga u ḽesa, u nwesa+ na mbilaelo dza vhutshilo,+ ḽeneḽo ḓuvha ḽa ni ḓela nga u ṱavhanya
35 sa tshikwekwe.+ Ngauri ḽi ḓo ḓela vhoṱhe vha re kha ḽifhasi.
36 Ngauralo, dzulani no fhaṱuwa,+ ni tshi rabela tshifhinga tshoṱhe+ uri ni kone u ponyoka zwenezwi zwithu zwoṱhe zwine zwa ḓo itea, ni kone u ima phanḓa ha Murwa muthu.”+
37 O vha a tshi funza thembeleni nga masiari, fhedzi nga madekwana a tshi bva muḓini a ya u eḓela Thavhani ya Miṱwari.
38 Vhathu vhoṱhe vho vha vha tshi ḓa thembeleni nga matsheloni-tsheloni u itela u mu thetshelesa.
Ṱhaluso dzi re magumoni a siaṱari
^ Thevhedz., “lepitoni mbili.” Sedzani Ṱhume. B14.
^ Kana “Vhannḓa.”
^ Kana “Vhannḓa.”
