Evangeli Ya Luka 2:1-52
2 Misini yeneyo Kesare Augusto o vhea mulayo wa uri vhathu vhoṱhe vha ṅwaliswe.
2 (U ṅwaliswa ho thoma musi Kirenio e muvhusi wa Siria.)
3 Vhathu vhoṱhe vho ya u ḓiṅwalisa miḓini ya havho.
4 Na Yosefa+ a ṱuwa Galilea, muḓini wa Nazaretha, a gonya Yudea muḓini wa Davida, u vhidzwaho Betlehema,+ ngauri o vha e muraḓo wa lushaka lwa Davida.
5 O ya a ḓiṅwalisa na Maria, we a mu vhinga,+ we a vha e tsini na u beba.+
6 Musi vhe henefho, ha swika tshifhinga tsha uri a bebe.
7 A beba ṅwana wa mutukana wa tanzhe,+ a mu putela nga labi a mu ladza mukungwani+ ngauri ho vha hu si na vhudzulo kamarani ya vhaeni.
8 Kha ḽeneḽo shango ho vha hu na vhalisa vhane vha khou lisa masambi avho vhusiku.
9 Nga u ṱavhanya, muruṅwa wa Yehova* a ima vhukati havho, vhugala ha Yehova* ha vha vhonetshela, vha tshuwa.
10 Muruṅwa a amba navho a ri: “Ni songo ofha, ngauri ndi khou ni ḓivhadza mafhungo maḓifha ane a ḓo takadza vhathu vhoṱhe.
11 Ngauri ṋamusi no bebelwa mutshidzi,+ Kristo Murena,+ muḓini wa Davida.+
12 Hezwi ndi zwine na ḓo mu ḓivha ngazwo: Ni ḓo wana ṅwana o putelwa nga labi o eḓela mukungwani.”
13 Nga u ṱavhanya ha ḓa mavhuthu a vharuṅwa vha ṱaḓulu,*+ vha tshi khou khoḓa Mudzimu vha tshi ri:
14 “Nga hu rendwe Mudzimu wa ṱaḓulu-ṱaḓulu na kha ḽifhasi hu vhe na mulalo vhukati ha vhathu vhane a vha takalela.”
15 Musi vharuṅwa vho no vhuyelela ṱaḓulu, vhalisa vha amba nga tshavho vha ri: “Kha ri ye Betlehema ri ye u vhona zwithu zwo iteaho zwe Yehova* a ri ḓivhadza zwone.”
16 Vha ṱuwa nga u ṱavhanya vha wana Maria na Yosefa, na ṅwana o eḓela mukungwani.
17 Musi vho no vhona ṅwana, vha vha vhudza zwe vha vhudzwa zwone nga hae.
18 Vhoṱhe vhe vha pfa zwe zwa ambiwa nga vhalisa vha mangala,
19 Maria a vhulunga zwenezwi zwithu zwoṱhe mbiluni,+ a dzula a tshi elekanya nga ha zwine zwenezwi zwa amba zwone.
20 Vhalisa vha humela murahu, vha tshi renda na u khoḓa Mudzimu nga nṱhani ha zwoṱhe zwe vha zwi pfa na u zwi vhona, u ya nga nḓila ye vha vhudzwa ngayo.
21 Nga murahu ha maḓuvha a malo, nga tshifhinga tsha u mu fumbisa,+ vha mu ira dzina ḽa Yesu, ḽe a ṋewa nga muruṅwa musi mme awe a sa athu u vhifha muvhilini.+
22 Zwiṅwe hafhu, musi tshifhinga tsho swika tsha uri vha kunakiswe u ya nga Mulayo wa Mushe,+ vha mu isa Yerusalema uri vha mu ṋekedze kha Yehova,*
23 samusi zwo vha zwo ṅwaliwa kha Mulayo wa Yehova:* “Tanzhe ḽiṅwe na ḽiṅwe ḽa mutukana ḽi ḓo vha ḽikhethwa phanḓa ha Yehova.”*+
24 Vha ṋekedza tshiṱhavhelo u ya nga zwe zwa ambiwa nga Mulayo wa Yehova:* “Maivha-muronzhe mavhili kana mafhondo mavhili a maivha.”+
25 Ho vha hu na muṅwe munna ngei Yerusalema ane a pfi Simioni, o vha o luga a tshi ofha Mudzimu, o vha o lindela Mudzimu a tshi khuthadza Isiraele,+ muya mukhethwa wo vha u khae.
26 Zwiṅwe hafhu, o vha o no dzumbululelwa nga muya mukhethwa uri ha nga fi a sa athu u vhona Kristo wa Yehova.*
27 A ya thembeleni a tshi livhiswa nga muya mukhethwa. Musi vhabebi vha tshi ḓisa Yesu uri vha tevhedze zwine Mulayo wa amba,+
28 a takula ṅwana, a renda Mudzimu a ri:
29 “Murena Muvhusahoṱhe, zwino mulanda wau a nga fa o rudza mbilu+ samusi wo vha wo zwi amba
30 ngauri ndo vhona nḓila ine wa ḓo ri tshidza ngayo,+
31 ye wa i lugiselela phanḓa ha vhathu vhoṱhe,+
32 tshedza+ tsha u bvisa dzitshaka swiswini+ na vhugala ha vhathu vhau vha Isiraele.”
33 Khotsi awe na mme awe vha tshi pfa zwe Simioni a zwi amba nga ha ṅwana, vha mangala.
34 Simioni a vha fhaṱutshedza, a amba na Maria mme a ṅwana a ri: “Onoyu ṅwana u ḓo ita uri kha ḽa Isiraele vhanzhi vha ime,+ vhaṅwe vha we,+ a nyadziwa+
35 u itela u dzumbulula zwi re mbiluni dza vhathu vhanzhi (a vha iwe u ḓo ṱhavhiwa nga banga).”+
36 Ho vha hu na muporofita we a vha a tshi pfi Ana, ṅwana wa Fanuele, wa lushaka lwa Ashere. Onoyu mufumakadzi o vha o no kegula, o dzula na munna wawe miṅwaha ya sumbe fhedzi,
37 o vha e tshilikadzi i re na miṅwaha ya 84. O vha a tshi dzula e hone thembeleni, a tshi ita mushumo mukhethwa vhusiku na masiari, a tshi ḓidzima zwiḽiwa na u rabela.
38 Nga tshenetsho tshifhinga, a sendela tsini a livhuwa Mudzimu, a vhudza vhoṱhe vho lindelaho Yerusalema u tshi vhofhololwa nga ha onoyo ṅwana.+
39 Musi vho no ita zwithu zwoṱhe u ya nga Mulayo wa Yehova,*+ vha humela Galilea muḓini wa havho wa Nazaretha.+
40 Ṅwana a bvela phanḓa a tshi aluwa, a vha na maanḓa, a ṱalifha, a dzula a tshi takalelwa nga Mudzimu.+
41 Vhabebi vhawe vho vha vha tshi ya Yerusalema ṅwaha muṅwe na muṅwe vhuṱamboni ha Paseka.+
42 Musi e na miṅwaha ya 12, vha ya vhuṱamboni sa nga misi.+
43 Musi vhuṱambo ho no fhela vha tshi khou humela murahu, Yesu a sala Yerusalema, fhedzi vhabebi vhawe vha si zwi ṱhogomele.
44 Vha tshimbila ḓuvha ḽoṱhe vha tshi humbula u nga u na vhaṅwe, vha thoma u mu ṱoḓa kha mashaka na dzikhonani.
45 Vha humela Yerusalema samusi vho vha vha sa mu wani, vha mu ṱoḓa hoṱhe.
46 Vha mu wana thembeleni nga murahu ha maḓuvha mararu, o dzula vhukati ha vhane vha funza a tshi khou vha thetshelesa na u vha vhudzisa.
47 Vhoṱhe vho mu thetshelesaho, vho mangadzwa nga nḓila ine a pfesesa na u fhindula ngayo.+
48 Musi vhabebi vhawe vha tshi mu vhona vha mangala, mme awe a ri: “Ṅwananga, u ri ita mini? Nṋe na khotsi au ro vha ri tshi khou vhilaela nga maanḓa ri tshi khou u ṱoḓa.”
49 Ene a ri: “No vha ni tshi khou nṱoḓelani? Naa a ni zwi ḓivhi uri ndi fanela u vha nḓuni ya Khotsi anga?”+
50 Fhedzi a vho ngo pfesesa zwe a vha a tshi khou zwi amba.
51 A humela Nazaretha navho, a dzula a tshi ḓiṱukufhadza khavho.*+ Mme awe a vhulunga zwenezwi zwithu zwoṱhe mbiluni.+
52 Yesu a bvela phanḓa a tshi ṱalifha na u aluwa, a tshi takalelwa nga Mudzimu na nga vhathu.
Ṱhaluso dzi re magumoni a siaṱari
^ Thevhedz., “mavhuthu a mmbi ya ṱaḓulu.”
^ Kana “a tshi vha thetshelesa.”
