Levitiko 20:1-27
20 Yehova a amba na Mushe a ri:
2 “U vhudze Vhaisiraele u ri: ‘Muthu muṅwe na muṅwe wa Isiraele na mutsinda ane a dzula Isiraele ane a ṋekedza Molexo muṅwe wa vhana vhawe a vhulawe.+ Vhathu vha mu kanḓe nga matombo u swika a tshi fa.
3 Ndi ḓo lwa na onoyo muthu, ndi ḓo mu vhulaya, ngauri o ṋekedza Molexo muṅwe wa vhana vhawe, o tshikafhadza fhethu hanga hukhethwa+ khathihi na dzina ḽanga ḽikhethwa.
4 Arali vhathu vha dzumba zwe onoyo muthu a zwi ita musi a tshi ṋekedza ṅwana wawe kha Molexo, vha si mu vhulaye,+
5 nṋe ndi ḓo lwa na onoyo muthu na muṱa wawe.+ Ndi ḓo vhulaya onoyo muthu u katela na vhoṱhe vhe vha ṱanganela nae kha u ita vhupombwe na Molexo.
6 “‘Arali muthu a sa fhulufhedzea kha nṋe* nga u ya kha mingome+ na vhabvumbi,+ ndi ḓo lwa na onoyo muthu nda mu vhulaya.+
7 “‘Ni tea u ḓikhetha uri ni vhe vhakhethwa,+ ngauri ndi nṋe Yehova Mudzimu waṋu.
8 Ni tea u tevhedza maitele anga.+ Ndi nṋe Yehova, ane a khou ni ita vhakhethwa.+
9 “‘Arali ha vha na muthu ane a sema khotsi awe kana mme awe, a vhulawe.+ Samusi o sema khotsi awe kana mme awe, u na mulandu wa malofha.
10 “‘Arali munna a ita vhupombwe na mufumakadzi wa muṅwe munna: A ita vhupombwe na mufumakadzi wa muṅwe muthu, vhuvhili havho vha vhulawe.+
11 Munna ane a ita zwa vhudzekani na mufumakadzi wa khotsi awe u nyadzisa khotsi awe.+ Vhuvhili havho vha vhulawe. Vha ḓo vha na mulandu wa malofha.
12 Arali munna a ita zwa vhudzekani na mazwale wawe, vhuvhili havho vha vhulawe. Vho ita vhuṱudzi. Vha ḓo vha na mulandu wa malofha.+
13 “‘Arali munna a tshi ita zwa vhudzekani na muṅwe munna, a mu ita vhunga mufumakadzi, vhuvhili havho vho ita zwithu zwi nengisaho.+ Vhuvhili havho vha vhulawe. Vha ḓo vha na mulandu wa malofha.
14 “‘Arali munna a ita zwa vhudzekani na mufumakadzi na mme a onoyo mufumakadzi, ndi vhuḓifari vhu shonisaho.*+ Ene na vhenevho vhafumakadzi vhavhili nga vha fhiswe nga mulilo,+ uri vhuḓifari vhu shonisaho vhu si phaḓalale vhukati haṋu.
15 “‘Arali munna a ita zwa vhudzekani na tshifuwo, a vhulawe, ni vhulaye na tshenetsho tshifuwo.+
16 Arali mufumakadzi a ita zwa vhudzekani na tshifuwo,+ ni tea u vhulaya onoyo mufumakadzi na tshifuwo. Onoyo munna na onoyo mufumakadzi vha vhulawe. Vha ḓo vha na mulandu wa malofha.
17 “‘Arali munna a ita zwa vhudzekani na khaladzi awe, ṅwananyana wa khotsi awe kana ṅwananyana wa mme awe, zwi a shonisa.+ Vha vhulawe phanḓa ha tshitshavha. O nyadzisa khaladzi awe. Onoyo munna u ḓo ḓifhindulela kha vhukhakhi hawe.
18 “‘Arali munna a ita zwa vhudzekani na mufumakadzi musi e maḓuvhani, vhuvhili havho vho sumbedza uri malofha a si makhethwa khavho.+ Vha tea u vhulawa.
19 “‘U songo ita zwa vhudzekani na mmane wau kana mme-muhulu wau kana makhadzi wau, ngauri zwenezwo ndi u nyadzisa shaka ḽa malofhani.+ Vha ḓo ḓifhindulela kha vhukhakhi havho.
20 Arali munna a ita zwa vhudzekani na mufumakadzi wa khotsimuhulu kana wa khotsimunene kana wa malume u khou vha nyadzisa.+ Vha ḓo ḓifhindulela kha tshivhi tshavho. Vha ḓo fa vha si na vhana.
21 Arali munna a ita zwa vhudzekani na mufumakadzi wa mukomana wawe kana wa murathu wawe, ndi zwithu zwi nengisaho.+ O nyadzisa mukomana wawe kana murathu wawe. Vha ḓo fa vha si na vhana.
22 “‘Ni vhulunge maitele anga oṱhe na mahaṱulele+ anga oṱhe, ni zwi tevhele+ uri shango ḽine nda khou ni isa uri ni ye u dzula khaḽo ḽi si ni ṱanze.+
23 Ni songo tevhedza mikhuvha ya tshaka dzine nda khou dzi pandela phanḓa haṋu;+ vha a nnengisa ngauri vho ita zwenezwi zwithu.+
24 Ndi ngazwo ndo amba uri: “Ni ḓo dzhia shango ḽavho, ndi ḓo ni ṋea ḽone ḽa vha ḽaṋu, shango ḽi elelaho mafhi na mutoli.+ Ndi nṋe Yehova Mudzimu waṋu, we a ni nanga kha dzitshaka.”+
25 Ni khethekanye tshipuka tsho kunaho na tshine tsha vha na tshika na tshiṋoni tsho kunaho na tshine tsha vha na tshika;+ ni songo ḓishata tshika nga tshipuka kana tshiṋoni kana tshiṅwe na tshiṅwe tshine tsha kokovha fhasi tshe nda tshi nanga uri ni tshi dzhie sa tshine tsha vha na tshika.+
26 Ni vhe vhakhethwa kha nṋe, ngauri nṋe Yehova ndi mukhethwa,+ ndi khou ni nanga kha dzitshaka uri ni vhe vhanga.+
27 “‘Munna kana mufumakadzi ane a vha mungome kana mubvumbi a vhulawe.+ Vha kanḓwe nga matombo u swika vha tshi fa. Vha ḓo vha na mulandu wa malofha.’”
Ṱhaluso dzi re magumoni a siaṱari
^ Kana “a ita vhupombwe ha lwa muya.”
^ Kana “vhuḓifari vhu songo teaho.”
