Genesi 31:1-55
31 Nga u ya ha tshifhinga, Yakobo a pfa zwe vharwa vha Labani vha zwi amba, vha tshi ri: “Yakobo o dzhia zwoṱhe zwe zwa vha zwi zwa khotsi ashu; lupfumo lwoṱhe+ lwe lwa vha lu lwa khotsi ashu lwo no vha lwawe.”
2 Musi Yakobo a tshi lavhelesa tshifhaṱuwo tsha Labani, a vhona uri ha tsha mu sedza u fana na u thomani.+
3 Mafheleloni Yehova a amba na Yakobo a ri: “Humela shangoni ḽa vhokhotsi au na mashaka au,+ ndi ḓo bvela phanḓa ndi na iwe.”
4 Yakobo a laedza uri Rahele na Lea vha ḓe pfuloni hune ha vha na sambi ḽawe,
5 a amba navho a ri:
“Ndo vhona uri khotsi aṋu ha tsha ntsedza u fana na u thomani;+ fhedzi Mudzimu wa khotsi anga u na nṋe.+
6 Inwi ni a zwi ḓivha zwavhuḓi uri khotsi aṋu ndo mu shumela nga maanḓa anga oṱhe.+
7 Khotsi aṋu o mphura a shandula malamba anga lwa fumi; fhedzi Mudzimu ho ngo mu tendela a tshi nkhuvhadza.
8 Arali khotsi aṋu a ri: ‘Dzine dza vha dza mivhala-vhala dzi ḓo vha malamba au,’ sambi ḽoṱhe ḽo vha ḽi tshi dzwala dza mivhala-vhala; fhedzi arali a ri: ‘Dza mitalo-talo dzi ḓo vha malamba au,’ dzo vha dzi tshi dzwala dza mitalo-talo.+
9 Huno Mudzimu a bvela phanḓa a tshi dzhiela khotsi aṋu sambi a ḽi ṋea nṋe.
10 Musi ndi tshi khou ḽora, nda vhona mbudzi dza tsadzi dzi tshi hwelwa,* zwibokoṱo zwine zwa khou dia* dza tsadzi hu zwa mitalo-talo, mivhala-vhala na zwa zwithoma-thoma.+
11 Ngauralo, muruṅwa wa Mudzimu wa ngoho a amba na nṋe muḽoroni a ri: ‘Yakobo!’ Nṋe nda ri: ‘Ndi fhano.’
12 Muruṅwa a bvela phanḓa a ri: ‘Ndi humbela uri u lavhelese u vhone uri zwibokoṱo zwoṱhe zwine zwa khou dia* sambi ndi zwa mitalo-talo, mivhala-vhala na zwa zwithoma-thoma, ngauri ndo vhona zwoṱhe zwine Labani a khou u ita zwone.+
13 Ndi nṋe Mudzimu wa ngoho we a ḓivhonadza kha iwe ngei Bethele,+ he wa shela mapfura kha phuphu wa nnyanela hone.+ Zwino takuwa u bve kha ḽino shango u vhuyelele shangoni ḽe wa bebelwa khaḽo.’”+
14 Nga zwenezwo, Rahele na Lea vha mu fhindula vha ri: “Naa a ri tshee na mukovhe kha ifa nḓuni ya khotsi ashu?
15 Naa khotsi ashu ha ri dzhii sa vhatsinda, samusi o ri rengisa a tshi khou shumisa tshelede ye ra bviselwa yone?+
16 Lupfumo lwoṱhe lwe Mudzimu a lu dzhiela khotsi ashu ndi lwashu na vhana vhashu.+ Ngauralo, iwe u fanela u ita zwoṱhe zwe Mudzimu a u vhudza uri u zwi ite.”+
17 Yakobo a takuwa a ṋamedza vhana vhawe na vhafumakadzi vhawe kha gamela;+
18 a khada sambi ḽawe ḽoṱhe na thundu yoṱhe ye a i kuvhanganya,+ zwifuwo zwe a vha e nazwo zwe a zwi wana Phadani-aramu, a ya ha Isaka khotsi awe ngei shangoni ḽa Kanana.+
19 Musi Labani o ya u vheula nngu dzawe, Rahele a tswa zwifanyiso zwa terafimi*+ zwa khotsi awe.+
20 Zwiṅwe hafhu, Yakobo o fhura Labani wa Muaramu ngauri ho ngo mu vhudza uri u khou shavha.
21 A shavha a pfuka Mulambo*+ na zwoṱhe zwe a vha e nazwo. Nga murahu ha zwenezwo, a livha thungo ya dzinguni ḽa thavhani dza Giḽiada.+
22 Nga murahu ha maḓuvha mararu, Labani a vhudzwa uri Yakobo o shavha.
23 Nga zwenezwo, a dzhia mashaka awe a pandamedza Yakobo maḓuvha a sumbe a mu fara dzinguni ḽa thavhani dza Giḽiada.
24 Mudzimu a ḓa ha Labani wa Muaramu+ muḽoroni vhusiku+ a amba nae a ri: “U ṱhogomele nga maanḓa zwine wa ḓo zwi vhudza Yakobo.”*+
25 Labani a ya kha Yakobo, samusi Yakobo o vha o atha dennde dzinguni ḽa thavhani na Labani o athela mashaka awe dennde thavhani dza Giḽiada.
26 Labani a amba na Yakobo a ri: “Ndi zwithu-ḓe zwe wa ita? Ndi ngani wo mphura wa dzhia vhananyana vhanga sa mathubwa a tshi dzhiiwa nndwani?
27 Ndi ngani wo tou ṋenga wa mphura, u sa mmbudze? Arali u vhe wo mmbudza ndo vha ndi tshi ḓo u fhelekedza nga dakalo na nga dzinyimbo, murumba na haripa.
28 Fhedzi a wo ngo nṋea tshibuli tsha u khisa vhaḓuhulu* vhanga na vhananyana vhanga. Zwe wa zwi ita ndi vhutsilu.
29 Ndi na maanḓa a u u huvhadza, fhedzi Mudzimu wa khotsi au o amba na nṋe madekwe a ri: ‘U ṱhogomele nga maanḓa zwine wa ḓo zwi vhudza Yakobo.’+
30 Samusi wo ṱuwa ngauri wo vha u tshi khou tama u vhuyelela nḓuni ya khotsi au, ndi ngani wo tswa midzimu yanga?”+
31 Yakobo a fhindula Labani a ri: “Ndo vha ndi tshi khou ofha. Nda humbula uri: ‘U nga ndzhiela vhananyana vhau nga khani.’
32 Ane wa ḓo mu wana e na midzimu yau u fanela u fa. Sedza kha zwine nda vha nazwo mashaka anga a tshi zwi vhona, u dzhie zwi re zwau.” Fhedzi Yakobo o vha a sa ḓivhi uri Rahele o i tswa.
33 Ngauralo, Labani a dzhena denndeni ḽa Yakobo na ḽa Lea na denndeni ḽa vhafumakadzi vhavhili vha dziphuli,+ fhedzi a si i wane. Mafheleloni a bva denndeni ḽa Lea a dzhena denndeni ḽa Rahele.
34 Nga tshenetsho tshifhinga, Rahele o vha o dzhia zwifanyiso zwa terafimi a zwi vhea nga fhasi ha sale kha gamela, a dzula nṱha hayo. Ngauralo, Labani a guduba denndeni ḽoṱhe, fhedzi a si i wane.
35 Rahele a amba na khotsi awe a ri: “U songo sinyuwa muṋe wanga ndi sa khou takuwa nda u lumelisa, ndi nga uri ndi maḓuvhani.”+ Labani a guduba hoṱhe, fhedzi a si wane zwifanyiso zwa terafimi.+
36 Yakobo a sinyuwa, a kaidza Labani. Yakobo a amba na Labani a ri: “Ndo tshinya mini, ndi tshivhi tshifhio tshe nda ita tshine tsha ita uri u mpandamedze?
37 Vhunga wo guduba thundu yanga yoṱhe, wo wana mini zwine zwa vha zwa nnḓu yau? Zwi vhee phanḓa ha mashaka au na mashaka anga, hu vhe vhone vhane vha haṱula riṋe vhavhili.
38 Ndo fhedza miṅwaha ya 20 ndi tshi khou dzula na iwe, fhedzi nngu dzau na mbudzi dzau a dzo ngo fholodza,+ a tho ngo vhuya nda ḽa thutha dza sambi ḽau.
39 A tho ngo u ḓisela tshifuwo tsho vhulawaho nga zwivhanda.+ Fhedzi ndo vha ndi tshi tshi lifha nga tshanga. Naho arali tshifuwo tsho tswiwa masiari kana vhusiku, wo vha u tshi nndifhisa.
40 Nga masiari ndo vha ndi tshi swa nga ḓuvha, vhusiku ndi tshi pfa phepho, ndi sa farwi nga khofhe.+
41 Ndo fhedza miṅwaha ya 20 ndi nḓuni yau. Ndo u shumela miṅwaha ya 14 uri ndi wane vhananyana vhau vhavhili, miṅwaha ya 6 uri ndi wane sambi ḽau, wo shandula malamba anga lwa fumi.+
42 Arali Mudzimu wa khotsi anga,+ Mudzimu wa Abrahamu Ane Isaka a mu ofha,+ a vhe a songo ima na nṋe, wo vha u tshi ḓo vha wo nṱuwisa ndi si na tshithu. Mudzimu o vhona u tambudzwa hanga na u ḓinetisa hanga, ndi ngazwo o u kaidza madekwe.”+
43 Labani a fhindula Yakobo a ri: “Havha vhafumakadzi ndi vhananyana vhanga na havha vhana ndi vhaḓuhulu vhanga na heḽi sambi ndi sambi ḽanga, zwoṱhe zwine wa khou zwi vhona ndi zwanga na vhananyana vhanga. Ṋamusi ndi ḓo vha ndi tshi lwela mini navho kana u lwa na vhana vhe vha vha beba?
44 Zwino nṋe na iwe kha ri vhofhe mulanga, une wa ḓo shuma sa ṱhanzi vhukati hanga na iwe.”
45 Ngauralo, Yakobo a dzhia tombo a ḽi imisa sa phuphu.+
46 Yakobo a amba na mashaka awe a ri: “Dobani matombo!” Vha doba matombo vha ita tshiṱhopho. Nga murahu vha ḽela henefho kha tshiṱhopho tsha matombo.
47 Labani a ri tshi pfi Yegara-sahadutha,* fhedzi Yakobo a ri tshi pfi Galede.*
48 Nga zwenezwo, Labani a ri: “Hetshi tshiṱhopho tsha matombo ndi ṱhanzi vhukati hanga na iwe ṋamusi.” Ndi ngazwo o ri tshi pfi Galede+
49 na Tshiingamo, ngauri Labani o ri: “Yehova kha dzule o sedza nṋe na iwe musi ri sa vhonani.
50 Arali wa tambudza vhananyana vhanga wa vhinga vhaṅwe vhafumakadzi, naho hu tshi ḓo vha hu si na muṅwe a re na riṋe, u humbule uri Mudzimu u ḓo vha ṱhanzi vhukati hanga na iwe.”
51 Labani a dovha a amba na Yakobo a ri: “Ndo imisa hetshi tshiṱhopho tsha matombo na phuphu sa tshiga tsha mulanga vhukati hanga na iwe.
52 Hetshi tshiṱhopho tsha matombo ndi ṱhanzi na heyi phuphu na yone ndi ṱhanzi+ uri a thi nga ḓo fhira hetshi tshiṱhopho tsha matombo u itela u u huvhadza na uri iwe a u nga fhiri hetshi tshiṱhopho tsha matombo na heyi phuphu u itela u nkhuvhadza.
53 Ngavhe Mudzimu wa Abrahamu+ na Mudzimu wa Nahoro, Mudzimu wa khotsi avho, a tshi haṱula vhukati hashu.” Fhedzi Yakobo a ana nga Mudzimu ane khotsi awe Isaka a mu ofha.+
54 Nga murahu ha zwenezwo, Yakobo a ita tshiṱhavhelo henefho thavhani, a vhidza mashaka awe uri a ḓe a ḽe vhurotho. Vha ḓa vha ḽa, vha eḓela henefho thavhani.
55 Naho zwo ralo, Labani a vuwa nga matsheloni-tsheloni a khisa vhaḓuhulu vhawe+ na vhananyana vhawe, a vha fhaṱutshedza.+ Labani a ṱuwa a humela hayani.+
Ṱhaluso dzi re magumoni a siaṱari
^ Kana “ṱoḓa u ita vhana.”
^ Kana “ṋamela.”
^ Kana “ṋamela.”
^ Kana “midzimu ya muṱani; midzimu ya zwifanyiso.”
^ Ndi Yufuratha.
^ Thevhedz., “U ḓiṱhogomele uri u si ambe zwivhuya kana zwivhi na Yakobo.”
^ Thevhedz., “vharwa.”
^ Ndi mubulo wa Tshiaramiki une wa amba “Tshiṱhopho Tsha Vhuṱanzi.”
^ Ndi mubulo wa Tshihevheru une wa amba “Tshiṱhopho Tsha Vhuṱanzi.”
