Genesi 17:1-27
17 Musi Abramu e na miṅwaha ya 99, Yehova a ḓa khae a ri: “Ndi nṋe Mudzimu Ramaanḓaoṱhe. Tshila nga u fhulufhedzea phanḓa hanga, u sa solisei.*
2 Ndi ḓo vhofha mulanga na iwe,+ vhana vhau ndi ḓo vha andisa zwihulu.”+
3 Abramu a tshi pfa zwenezwo a gwadama, Mudzimu a bvela phanḓa a tshi amba nae a ri:
4 “Ndi vhofha mulanga na iwe,+ u ḓo vha khotsi a tshaka nnzhi.+
5 Dzina ḽau a ḽi tsha ḓo pfi Abramu;* u ḓo pfi Abrahamu,* ngauri ndi ḓo u ita khotsi a tshaka nnzhi.
6 Ndi ḓo ita uri u vhe na vhana vhanzhi-vhanzhi, hu ḓo bva tshaka nnzhi kha iwe, mahosi a ḓo bva kha iwe.+
7 “Ndi ḓo vhofha mulanga wa lini na lini na iwe+ na vhana* vhau kha mirafho i ḓaho, uri ndi vhe Mudzimu wau na wa ṅwana* wau.
8 Ndi ḓo ṋea iwe na vhana* vhau shango ḽoṱhe ḽa Kanana ḽe wa vha u mutsinda khaḽo+ uri ḽi vhe ḽau lwa tshoṱhe, huno ndi ḓo vha Mudzimu wavho.”+
9 Mudzimu a dovha a amba na Abrahamu a ri: “Tevhedza mulanga wanga, iwe na vhana* vhau kha mirafho i ḓaho.
10 Hoyu ndi mulanga wanga we nda u vhofha na iwe une wa tea u u tevhedza na vhana* vhau: Vhanna* vhoṱhe vha tea u fumba.+
11 Ni tea u fumba, zwi ḓo vha tshiga tsha mulanga wanga na inwi.+
12 Vhana vhoṱhe vha vhatukana vha re na maḓuvha a malo vha tea u fumba,+ kha mirafho yaṋu yoṱhe, vhoṱhe vho bebwaho muṱani wau na vho rengwaho nga tshelede kha mutsinda ane a si vhe muṅwe wa vhana* vhau.
13 Vhanna vhoṱhe vha re nḓuni yau na vhanna vhoṱhe vho rengwaho nga tshelede vha tea u fumba;+ tshenetshi tshiga tshi re kha ṋama yau tshi tea u shuma sa vhuṱanzi ha mulanga wa lini na lini we nda u vhofha na iwe.
14 Ane a sa fumbe, u tea u vhulawa. O pfuka mulanga wanga.”
15 Mudzimu a amba na Abrahamu a ri: “Sarai*+ mufumakadzi wau, u songo tsha mu vhidza Sarai, ngauri dzina ḽawe ndi Sara.*
16 Ndi ḓo mu fhaṱutshedza, a u bebela murwa;+ ndi ḓo mu fhaṱutshedza, ha bva tshaka nnzhi khae; mahosi a ḓo bva khae.”
17 Abrahamu a tshi pfa zwenezwo a gwadama a thoma u sea, a ambela mbiluni+ yawe a ri: “Naa munna a re na miṅwaha ya 100 a nga beba ṅwana, Sara mufumakadzi a re na miṅwaha ya 90 a nga beba?”+
18 Nga murahu Abrahamu a amba na Mudzimu wa ngoho a ri: “Ngavhe u tshi fhaṱutshedza na Ishimaele!”+
19 Mudzimu a ri: “Sara mufumakadzi wau u ḓo u bebela murwa, u tea u mu ira dzina ḽa Isaka.*+ Ndi ḓo vhofha mulanga nae wa lini na lini na vhana* vhawe vhane vha ḓo bebwa.+
20 Fhedzi ndo zwi pfa zwe wa amba nga ha Ishimaele. Ndi ḓo mu fhaṱutshedza nda ita uri a vhe na vhana vhanzhi, a ande zwihulu. U ḓo beba vharangaphanḓa vha 12, ndi ḓo mu ita lushaka luhulu.+
21 Naho zwo ralo, ndi ḓo vhofha mulanga wanga na Isaka,+ ane a ḓo bebwa nga Sara nga tshenetshi tshifhinga ṅwaha u ḓaho.”+
22 Musi Mudzimu o no fhedza u amba na Abrahamu, a ṱuwa.
23 Abrahamu a dzhia murwa wawe Ishimaele na vhanna vhoṱhe vho bebwaho muṱani wawe na vhoṱhe vho rengwaho nga tshelede, vhanna vhoṱhe vha nnḓu ya Abrahamu, a vha fumbisa nga ḽeneḽo ḓuvha, sa zwe Mudzimu a mu vhudza.+
24 Abrahamu o fumba+ e na miṅwaha ya 99.
25 Ishimaele murwa wawe o fumba e na miṅwaha ya 13.+
26 Nga ḽeneḽo ḓuvha Abrahamu a fumba, ha fumbiswa na Ishimaele murwa wawe.
27 Vhanna vhoṱhe vha muḓini wawe, vhoṱhe vho bebwaho muṱani wawe na vhoṱhe vho rengwaho nga tshelede kha mutsinda vha fumbiswa nae.
Ṱhaluso dzi re magumoni a siaṱari
^ Kana “u si na mulandu.”
^ Zwine zwa amba uri “Khotsi Ndi Muhulwane (O Huliswa).”
^ Zwine zwa amba uri “Khotsi A Gogo (Mavhuthu); Khotsi A Vhanzhi.”
^ Thevhedz., “mbeu.”
^ Thevhedz., “mbeu.”
^ Thevhedz., “mbeu.”
^ Thevhedz., “mbeu.”
^ Thevhedz., “mbeu.”
^ Thevhedz., “Vhanna u katela na vhatukana.”
^ Kana “ṅwana” Thevhedz., “mbeu.”
^ Khamusi zwi amba uri “Muthu A Re Na Khani.”
^ Zwine zwa amba uri “Mukololo.”
^ Kana “ṅwana” Thevhedz., “mbeu.”
^ Zwine zwa amba uri “Tshiseo.”
