Genesi 11:1-32
11 Ḽifhasi ḽoṱhe ḽa bvela phanḓa ḽi tshi amba luambo luthihi na nga nḓila i fanaho.
2 Musi vha tshi ya thungo ya vhubvaḓuvha, vha wana mudavhi shangoni ḽa Shinari,+ vha dzula henefho.
3 Vha amba nga tshavho vha ri: “Iḓani ri forome zwidina ri zwi fhise nga mulilo.” Ngauralo, vha shumisa zwidina nṱhani ha matombo, vha shumisa tshigonṱiri sa tshone daka.
4 Vha ri: “Iḓani ri ḓifhaṱele muḓi na mutsheṱo une wa guma ṱaḓulu, ri ḓiitele dzina uri ri si balangane na ḽifhasi ḽoṱhe.”+
5 Yehova a tsa u itela u vhona wonoyo muḓi na mutsheṱo we vhana vha vhathu vha u fhaṱa.
6 Nga murahu ha zwenezwo, Yehova a ri: “Havha vhathu vha na vhuthihi ngauri vha amba luambo luthihi,+ ndi ngazwo vho thoma zwenezwi. Zwoṱhe zwine vha humbula u zwi ita, vha ḓo zwi swikelela.
7 Iḓani! Ri+ ye henengei ri piringanye luambo lwavho uri vha si pfane musi vha tshi amba.”
8 Ngauralo, Yehova a vha balanganya na ḽifhasi ḽoṱhe,+ vha ṱuwa henefho, vha litsha u fhaṱa wonoyo muḓi.
9 Ndi ngazwo wonoyo muḓi u tshi pfi Babele*+ ngauri ndi henefho he Yehova a piringanya luambo lwa ḽifhasi ḽoṱhe, Yehova a vha balanganya na ḽifhasi ḽoṱhe.
10 Haya ndi mafhungo a Semu.+
Semu o vha e na miṅwaha ya 100 musi a tshi beba Arapahashada,+ musi ho no fhela miṅwaha mivhili nga murahu ha Maḓi Mahulu.
11 Musi o no beba Arapahashada, Semu a dovha a fhedza miṅwaha ya 500. Nga tshenetsho tshifhinga o beba vharwa na vhananyana.+
12 Arapahashada o fhedza miṅwaha ya 35, a beba Shela.+
13 Musi o no beba Shela, Arapahashada a dovha a fhedza miṅwaha ya 403. A beba vharwa na vhananyana.
14 Shela o fhedza miṅwaha ya 30, a beba Ebere.+
15 Musi o no beba Ebere, Shela a dovha a fhedza miṅwaha ya 403. A beba vharwa na vhananyana.
16 Ebere o fhedza miṅwaha ya 34, a beba Phelege.+
17 Musi o no beba Phelege, Ebere a dovha a fhedza miṅwaha ya 430. A beba vharwa na vhananyana.
18 Phelege o fhedza miṅwaha ya 30, a beba Reu.+
19 Musi o no beba Reu, Phelege a dovha a fhedza miṅwaha ya 209. A beba vharwa na vhananyana.
20 Reu a fhedza miṅwaha ya 32, a beba Seruga.
21 Musi o no beba Seruga, Reu a dovha a fhedza miṅwaha ya 207. A beba vharwa na vhananyana.
22 Seruga o fhedza miṅwaha ya 30, a beba Nahoro.
23 Musi o no beba Nahoro, Seruga a dovha a fhedza miṅwaha ya 200. A beba vharwa na vhananyana.
24 Nahoro o fhedza miṅwaha ya 29, a beba Thera.+
25 Musi o no beba Thera, Nahoro a dovha a fhedza miṅwaha ya 119. A beba vharwa na vhananyana.
26 Thera o fhedza miṅwaha ya 70, nga murahu a beba Abramu,+ Nahoro+ na Harani.
27 Haya ndi mafhungo a Thera.
Thera o beba Abramu, Nahoro na Harani; Harani a beba Loto.+
28 Harani a fela shangoni ḽe a bebelwa khaḽo, ḽa Uri+ ḽa Vhakaladea+ musi khotsi awe Thera a tshi kha ḓi tshila.
29 Abramu na Nahoro vha vhinga vhafumakadzi. Mufumakadzi wa Abramu o vha a tshi pfi Sarai,+ mufumakadzi wa Nahoro o vha a tshi pfi Milika,+ ṅwananyana wa Harani, khotsi a Milika na Yisika.
30 Fhedzi Sarai o vha a sa bebi;+ o vha a si na vhana.
31 Nga murahu Thera a dzhia Abramu murwa wawe na Loto muḓuhulu wawe,+ murwa wa Harani na Sarai mazwale wawe, mufumakadzi wa Abramu murwa wawe, vha pfuluwa kha ḽa Uri ḽa Vhakaladea vha ya shangoni ḽa Kanana.+ Vha swika Harani+ vha dzula henefho.
32 Thera o tshila miṅwaha ya 205. Thera a fela henefho Harani.
Ṱhaluso dzi re magumoni a siaṱari
^ Zwine zwa amba uri “Phiringanyo.”
