Esera 6:1-22
6 Nga tshenetsho tshifhinga Khosi Dario a ṋea ndaela ya uri vha ite ṱhoḓisiso fhethu he ha vha hu tshi vhulungwa mafhungo a kale* he lupfumo lwa Babele lwa vha lu tshi vhewa hone.
2 Ha wanala mupombo pfamoni ya ngei Ekhebathana, vunduni* ḽa Meda, wo ṅwaliwa mafhungo a tevhelaho:
3 “Nga ṅwaha wa u thoma hu tshi khou vhusa Khosi Korese, o ṋea ndaela nga ha nnḓu ya Mudzimu ngei Yerusalema+ a ri: ‘Nnḓu nga i fhaṱululwe i vhe fhethu hune vha ḓo ṋekedza zwiṱhavhelo, mitheo yayo i vhewe; vhulapfu hayo vhu tea u vha khubithi dza 60,* vhuphara hayo vhu vhe khubithi dza 60,+
4 hu vhe na miduba miraru ya matombo na muthihi wa matanda;+ tshinyalelo dzi badelwe nga tshelede i bvaho nḓuni ya khosi.+
5 Zwiṅwe hafhu, midzio ya musuku na ya siḽiva ya nḓuni ya Mudzimu ye ya dzhiiwa nga Nebukadanetsara thembeleni ye ya vha i ngei Yerusalema, a i ḓisa Babele,+ nga i humiselwe vhudzuloni hayo ngei thembeleni ya Yerusalema, i vhewe nḓuni ya Mudzimu.’+
6 “Zwino iwe Thathanai muvhusi wa dzinguni ḽa Seli ha Mulambo,* Shethara-bosonai na vhashumisani na iwe na vhavhusi vhaṱuku vha dzinguni ḽa Seli ha Mulambo,+ ni songo sendela henefho fhethu.
7 Ni songo dzhenelela kha mushumo wa yeneyo nnḓu ya Mudzimu. Muvhusi wa Vhayuda na vhahulwane vha Vhayuda vha ḓo fhaṱulula yeneyo nnḓu ya Mudzimu fhethu hayo ha kale.
8 Zwiṅwe hafhu, ndi khou ni laedza zwine na fanela u zwi itela vhenevho vhahulwane vha Vhayuda nga ha u fhaṱulula yeneyo nnḓu ya Mudzimu: Vhenevho vhanna vha lifhelwe tshinyalelo dzavho nga u ṱavhanya nga zwine zwa bva kha mbulungelo ya musanda,+ kha muthelo wo kuvhanganywaho dzinguni ḽa Seli ha Mulambo, uri vha bvele phanḓa vha sa thithiswi.+
9 Zwoṱhe zwine zwa ṱoḓea, mbohwana,+ thutha+ na ngwana+ dza zwifhiwa zwi fhiselwaho Mudzimu wa ṱaḓulu, goroi,+ muṋo,+ waini+ na mapfura,+ ni pfe zwine vhotshifhe vha Yerusalema vha zwi amba, vha tea u ṋewa zwone ḓuvha ḽiṅwe na ḽiṅwe misi yoṱhe,
10 uri vha bvele phanḓa vha tshi ṋekedza zwifhiwa zwi takadzaho Mudzimu wa ṱaḓulu, vha rabelele khosi na vharwa vhayo uri vha lalame.+
11 Ndo dovha nda laedza uri arali muthu a pfuka yeneyi ndaela, hu ṱomolwe thanda kha nnḓu yawe a takulelwe nṱha, a fhahewe* khayo, nnḓu yawe i ḓo vha bunga* ḽa vhomuthumunzhi nga nṱhani ha wonoyo mulandu.
12 Ngavhe Mudzimu we a ita uri dzina ḽawe ḽi dzule henefho fhethu+ a tshi wisa khosi iṅwe na iṅwe na vhathu vhane vha isa tshanḓa vha pfuka yeneyi ndaela vha tshinyadza nnḓu ya Mudzimu, ine ya vha Yerusalema. Ndi nṋe Dario ane a khou ṋea yeneyi ndaela. Nga zwi itwe nga u ṱavhanya.”
13 Nga murahu Thathanai muvhusi wa dzinguni ḽa Seli ha Mulambo, Shethara-bosonai+ na vhane vha shumisana navho vha ṱavhanya vha ita zwoṱhe zwe Khosi Dario a laedza.
14 Vhahulwane vha Vhayuda vha bvela phanḓa na u fhaṱa,+ mushumo wa ya phanḓa, vha tshi ṱuṱuwedzwa nga vhuporofita ha muporofita Hagai+ na Sakaria+ muḓuhulu wa Ido; vha fhedza u i fhaṱa u ya nga ndaela ya Mudzimu wa Isiraele+ na nga ndaela ya Korese+ na ya Dario+ na ya Arithasasitha+ khosi ya Peresia.
15 Vha fhedza u fhaṱa nnḓu nga ḓuvha ḽa vhuraru ḽa ṅwedzi wa Adari,* nga ṅwaha wa vhurathi hu tshi khou vhusa Khosi Dario.
16 Vhaisiraele, vhotshifhe, Vhalevi+ na vhoṱhe vha bvaho vhuthubwani vha vula* yeneyi nnḓu ya Mudzimu vho takala.
17 Musi hu tshi vulwa nnḓu ya Mudzimu, vha ṋekedza mboho dza 100, thutha dza 200, ngwana dza 400 na zwibokoṱo zwa 12 uri zwi vhe tshifhiwa tsha u pfumelela tshivhi tsha Vhaisiraele vhoṱhe, tshi tshimbidzanaho na tshivhalo tsha tshaka dza Isiraele.+
18 Vha vhea vhotshifhe u ya nga zwigwada zwavho na Vhalevi u ya nga zwigwada zwavho uri vha shumele Mudzimu ngei Yerusalema,+ u ya nga zwe zwa ṅwaliwa buguni ya Mushe.+
19 Vha bvaho vhuthubwani vha ita Paseka nga ḓuvha ḽa vhu 14 ḽa ṅwedzi wa u thoma.+
20 Vhotshifhe na Vhalevi vhoṱhe vha ḓikunakisa,+ vhoṱhe vho vha vho kuna; vha ṱhavhela vhoṱhe vha bvaho vhuthubwani tshiṱhavhelo tsha Paseka, na vhotshifhe ngavho na vhone vhaṋe.
21 Vhaisiraele vhe vha vhuya vhuthubwani vha tshi ḽa, khathihi na muṅwe na muṅwe we a ḓiṱanganya navho na vhoṱhe vhe vha si ḓidzhenise kha tshika dza tshaka dza shango uri vha rabele Yehova Mudzimu wa Isiraele.+
22 Vha dovha vha ita Vhuṱambo ha Vhurotho vhu si na Mbiliso+ lwa maḓuvha a sumbe vho takala, ngauri Yehova o ita uri vha takale, o ita uri khosi ya Asuri i vha takalele,+ i vha tikedze* kha mushumo wa nnḓu ya Mudzimu wa ngoho, Mudzimu wa Isiraele.
Ṱhaluso dzi re magumoni a siaṱari
^ Thevhedz., “nḓuni ya mafhungo a kale.”
^ Kana “tshiṱirikini tshi re na maanḓa.”
^ Hu ṱoḓaho u vha mithara dza 26,7. Sedzani Ṱhume. B14.
^ Kana “Yufuratha.”
^ Kana “ombelwe.”
^ Kana khamusi, “hune ha laṱwa hone mathukhwi; thulwi ya vhutoko.”
^ Sedzani Ṱhume. B15.
^ Kana “ṋekedza.”
^ Thevhedz., “i khwaṱhise zwanḓa zwavho.”
