Dotoronomio 21:1-23
21 “Arali ha wanwa muthu o vhulawa ḓakani kha shango ḽine Yehova Mudzimu wau a khou u ṋea ḽone uri ḽi vhe ḽau, zwi sa ḓivhei uri ndi nnyi we a mu vhulaya,
2 vhahulwane vhau na vhahaṱuli+ vha fanela u ya vha kala tshikhala u bva kha tshitumbu u ya kha miḓi ine ya vha tsini natsho.
3 Vhahulwane vha wonoyo muḓi u re tsini na tshitumbu vha dzhie ṋamana i sa athu u hwala dzhogo,
4 vhahulwane vha wonoyo muḓi vha khadele yeneyo ṋamana govhani* ḽi elelaho maḓi fhethu hu sa athu u limiwaho kana hu sa athu u zwalwaho mbeu, vha i vunḓe mutsinga henefho govhani.+
5 “Vhotshifhe vhane vha vha Vhalevi vha ḓo sendela, ngauri Yehova Mudzimu wau o vha nanga uri vha mu shumele,+ vha ḓivhadze phaṱhutshedzo dzinani ḽa Yehova.+ Vha ḓivhadze nḓila ine wa fanela u tandulula ngayo phambano dzoṱhe dzine ha lwiwa khadzo.+
6 Vhahulwane vhoṱhe vha wonoyo muḓi u re tsini na tshenetsho tshitumbu vha ṱambele zwanḓa zwavho+ nṱha ha ṋamana ye ya vunḓwa mutsinga govhani,
7 vha ḓivhadze uri: ‘A si zwanḓa zwashu zwo shululaho haya malofha, na maṱo ashu ho ngo zwi vhona musi a tshi shululwa.
8 Iwe Yehova, hangwela vhathu vhau vha Isiraele vhe wa vha rengulula,+ u songo vhila mulandu wa u shulula malofha a si na mulandu kha vhathu vhau vha Isiraele.’+ Ngauralo, a vha nga ḓo vha na mulandu wa malofha.
9 Nga yeneyi nḓila a u tsha ḓo vha na mulandu wa u shulula malofha a si na mulandu vhukati hau nga u ita zwo lugaho phanḓa ha Yehova.
10 “Musi u tshi ya u lwa na maswina au, Yehova Mudzimu wau a ita uri u a kunde wa a thuba,+
11 kha vhe wa vha thuba wa vhona mufumakadzi o nakaho, wa vha na dzangalelo khae u tshi ṱoḓa u mu vhinga,
12 u nga mu isa nḓuni yau. A vheule ṱhoho yawe, a tumulele ṋala dzawe,
13 a bvule zwiambaro zwe a vha o ambara musi a tshi thubiwa a dzule nḓuni yau. Onoyo u ḓo lilela khotsi awe na mme awe ṅwedzi woṱhe,+ nga murahu u nga ita zwa vhudzekani nae; u vhe munna wawe, ene a vhe mufumakadzi wau.
14 Fhedzi arali u si tsha mu takalela, u mu tendele a tshi ya+ hune a ṱoḓa u ya hone. Fhedzi u nga si mu rengise nga tshelede kana u mu fara nga nḓila ya tshiṱuhu, samusi wo mu nyadzisa.
15 “Arali munna a vha na vhafumakadzi vhavhili, a tshi funa muṅwe u fhira muṅwe, vhoṱhe vha mu bebela vhana vha vhatukana, wa tanzhe a vha wa mufumakadzi a sa funwi,+
16 musi a tshi kovhela vhana vhawe ifa, a songo vhenga ṅwana wa tanzhe wa mufumakadzi a sa funwi, a ṋea vhutanzhe ṅwana wa mufumakadzi ane a funwa.
17 A zwi ḓivhe uri ṅwana wa mufumakadzi a sa funwi ndi tanzhe ḽawe, a mu ṋee mikovhe mivhili kha zwoṱhe zwine a vha nazwo, ngauri onoyo ndi ene wa u ranga kha mbebo yawe. Ndugelo ya u vha tanzhe ndi yawe.+
18 “Arali muthu e na murwa wa ḽishandukwa a re na swili, a sa thetshelesi khotsi awe kana mme awe,+ vho lingedza u mu laya fhedzi a hana u vha thetshelesa,+
19 khotsi awe na mme awe vha fanela u mu fara vha mu isa kha vhahulwane khoroni ya muḓi wavho,
20 vha ambe na vhahulwane vha muḓi vha ri: ‘Hoyu murwa washu u na swili ndi ḽishandukwa, ha ri thetshelesi. U a ḽesa,+ ndi tshidakwa.’+
21 Vhanna vhoṱhe vha wonoyo muḓi vha fanela u mu kanḓa nga matombo u swika a tshi fa. Ngauralo, u bvise muthu muvhi vhukati hau, Vhaisiraele vhoṱhe vha ḓo zwi pfa vha ofha.+
22 “Arali muthu o ita tshivhi tsho eḓanwaho nga lufu, nga a vhulawe,+ a fhahewe kha danda,+
23 tshitumbu tshawe a tsho ngo tea u dzula kha danda vhusiku hoṱhe.+ Nṱhani hazwo, u mu vhulunge nga ḽeneḽo ḓuvha, ngauri o fhahewaho o semiwa nga Mudzimu,+ u songo tshikafhadza shango ḽau ḽine Yehova Mudzimu wau a khou u ṋea ḽone sa ifa.+
Ṱhaluso dzi re magumoni a siaṱari
^ Kana “muedzini.”
