Vhahaṱuli 3:1-31
3 Dzenedzi ndi tshaka dze Yehova a dzi litsha uri dzi linge vhoṱhe kha ḽa Isiraele vhe vha si lwe na Vhakanana+
2 (ho vha hu u itela uri mirafho ye ya tevhela ya Vhaisiraele na yone i lwe, u itela u gudisa vhe vha si lwe kha dzenedzo nndwa):
3 Marena maṱanu a Vhafilisita,+ Vhakanana vhoṱhe, Vhasidoni+ na Vhahevi+ vhe vha dzula Thavhani ya Libanoni+ u bva Thavhani ya Baali-herimoni u swika Lebo-hamathi.*+
4 Tshaka dzenedzo dzo linga Vhaisiraele u itela u vhona arali vha tshi ḓo thetshelesa ndaela dza Yehova dze a dzi ṋea vhokhotsi avho a tshi shumisa Mushe.+
5 Vhaisiraele vha dzula na Vhakanana,+ Vhahethe, Vhaamori, Vhapheresi, Vhahevi na Vhayebusi.
6 Vhaisiraele vha vhinga vhananyana vha dzenedzo tshaka na vhananyana vhavho vha vhingwa nga vharwa vha dzenedzo tshaka, vha thoma u shumela midzimu yadzo.+
7 Vhaisiraele vha ita zwi sa takadzi Yehova, vha hangwa Yehova Mudzimu wavho vha shumela Vhobaali+ na thanda khethwa.*+
8 Yehova a sinyutshela Vhaisiraele, a vha kumedzela zwanḓani zwa Kushani-rishataimi khosi ya Mesopotamia.* Vhaisiraele vha shumela Kushani-rishataimi miṅwaha ya malo.
9 Musi Vhaisiraele vha tshi humbela Yehova uri a vha thuse,+ Yehova a ṋea Vhaisiraele mutshidzi we a vha a tshi ḓo vha lamulela,+ onoyo o vha e Othiniele+ murwa wa Kenasi, murathu wa Kalebe.
10 Muya wa Yehova wa ḓa khae,+ a vha muhaṱuli kha ḽa Isiraele. Musi a tshi ya u lwa, Yehova o kumedzela Kushani-rishataimi khosi ya Mesopotamia* zwanḓani zwawe a kunda Kushani-rishataimi.
11 Nga murahu ha zwenezwo, shango ḽa lala lwa miṅwaha ya 40. Mafheleloni Othiniele murwa wa Kenasi a fa.
12 Fhedzi Vhaisiraele vha dovha vha ita zwi sa takadzi Yehova.+ Nga zwenezwo, Yehova a tendela Egiloni khosi ya Moaba+ i tshi kunda Vhaisiraele, ngauri vho ita zwo vhifhaho phanḓa ha Yehova.
13 Zwiṅwe hafhu, Egiloni a vha rambela Vhaamoni+ na Vhaamaleke.+ Vha lwa na Vhaisiraele, vha thuba muḓi wa miri ya mitshevho.+
14 Vhaisiraele vha shumela Egiloni khosi ya Moaba miṅwaha ya 18.+
15 Vhaisiraele vha humbela Yehova uri a vha thuse.+ Huno Yehova a vha ṋea mutshidzi+ ane a vha Ehudu+ murwa wa Gera wa Mubenyamini,+ we a vha a tshi shumisa tshanḓa tsha monde.+ Nga u ya ha tshifhinga, Vhaisiraele vha ruma Ehudu uri a ise nduvho ha Egiloni khosi ya Moaba.
16 Nga tshenetsho tshifhinga, Ehudu o vha o ḓiitela banga ḽa mutshea-hoṱhe ḽa vhulapfu ha khubithi* nthihi, o vha o ḽi vhofhelela fhasi ha tshiambaro tshawe nga thungo ya tsha u ḽa.
17 A ṋea Egiloni khosi ya Moaba nduvho. Egiloni o vha e munna o khwaṱhaho.
18 Musi Ehudu o no fhedza u ṋekedza nduvho, a litsha vhathu vho hwalaho nduvho vha ṱuwa.
19 Fhedzi musi vho no swika fhethu hu re na zwifanyiso zwo vhaḓwaho nga matombo* ngei Giligala,+ Ehudu a humela murahu a swika a ri: “Khosi, ndo u farela mulaedza wa tshiphiri.” Khosi ya ri: “Fhumula!” Musi vhaḓinḓa vha tshi pfa zwenezwo vha bvela nnḓa.
20 Ehudu a ya kha khosi ye ya vha yo dzula i yoṱhe kamarani ya nṱha i rotholelaho. Ehudu a ri: “Ndo u farela mulaedza u bvaho ha Mudzimu.” Egiloni a takuwa kha khuluṋoni* yawe.
21 Ehudu a ṱomola banga ḽe ḽa vha ḽi kha khundu dzawe thungo ya tsha u ḽa nga tshanḓa tshawe tsha monde a mu phula thumbu ngaḽo.
22 Banga ḽa dzhena na khaḓa yaḽo, mapfura a ḽi thivha, ngauri Ehudu ho ngo ḽi ṱomola kha thumbu ya Egiloni, malaṱwa a bva.
23 Ehudu a bva nga fasiṱere, a vala miṋango ya kamara ya nṱha, a i khia.
24 Musi o no ṱuwa, vhaḓinḓa vha ḓa vha wana miṋango ya kamara ya nṱha yo khiiwa. Vha ri: “A nga vha a tshi khou ḓithusa pfamoni yawe i rotholelaho.”
25 Vha lindela u swika vha tshi farwa nga ṱhoni, fhedzi musi vha tshi vhona uri ha khou vula kamara ya nṱha, vha dzhia khii vha vula, vha vhona muṋe wavho o wela fhasi o fa!
26 Ehudu o shavha vha tshi kha ḓi mona-mona, a pfuka fhethu hu re na zwifanyiso zwo vhaḓwaho nga matombo,*+ a shavhela Seira.
27 Musi a tshi swika, a lidza luṋanga+ e thavhani dza Efuraimi;+ Vhaisiraele vha tsa dzinguni ḽa dzithavhani, vho rangwa phanḓa nga Ehudu.
28 A amba navho a ri: “Ntevheleni, ngauri Yehova o kumedzela Vhamoaba vhane vha vha maswina aṋu zwanḓani zwaṋu.” Vha mu tevhela vha tanga miratho ya Mulambo wa Yorodane ye ya vha yo livhana na Vhamoaba, vha si tendele muthu na muthihi a tshi wetshela seli.
29 Nga tshenetsho tshifhinga vha vhulaya Vhamoaba vha ṱoḓaho u vha 10 000,+ vhanna vhoṱhe vha re na maanḓa na vhahali; a hu na na muthihi we a ponyoka.+
30 Vhamoaba vha kundwa nga Vhaisiraele nga ḽeneḽo ḓuvha; shango ḽa lala lwa miṅwaha ya 80.+
31 A tevhelwa nga Shamugara+ murwa wa Anatha, we a vhulaya vhanna vha Vhafilisita vha 600+ nga thanda i re na ṱhodzi ya tsimbi* ya u khada kholomo;+ na ene o tshidza Vhaisiraele.
Ṱhaluso dzi re magumoni a siaṱari
^ Kana “khoroni ya Hamathi.”
^ Sedzani Mutevhe Wa Ṱhalutshedzo Ya Maipfi.
^ Thevhedz., “Aramu-naharaimi.”
^ Thevhedz., “Aramu.”
^ Khamusi ndi khubithi pfufhi i ṱodaho u lingana na senthimithara dza 38. Sedzani Ṱhume. B14.
^ Kana khamusi, “fhethu hune ha bwiwa hone matombo.”
^ Kana “tshidulo.”
^ Kana khamusi, “fhethu hune ha bwiwa hone matombo.”
^ Sedzani Mutevhe Wa Ṱhalutshedzo Ya Maipfi.
