Vhahaṱuli 20:1-48
-
Hu lwiwa na Vhabenyamini (1-48)
20 Vhaisiraele vhoṱhe vha bvaho Dani+ u swika Beresaba na vha bvaho shangoni ḽa Giḽiada,+ vha kuvhangana nga vhuthihi phanḓa ha Yehova ngei Mitsipa.+
2 Ngauralo, vharangaphanḓa vha vhathu na tshaka dzoṱhe dza Isiraele vha ima phanḓa ha tshivhidzo tsha vhathu vha Mudzimu na maswole a 400 000 o faraho mabanga.+
3 Vhabenyamini vha pfa uri vhanna vha Isiraele vho gonya Mitsipa.
Vhanna vha Isiraele vha ri: “Ri vhudze uri izwi zwithu zwi ofhisaho zwo itea hani?”+
4 Munna wa Mulevi+ ane a vha munna wa mufumakadzi o vhulawaho, a fhindula a ri: “Ndo swika Gibia+ wa Vhabenyamini ndi na mufumakadzi wanga wa vhuimo ha fhasi* u itela u eḓela henefho vhusiku.
5 Vhadzulapo* vha Gibia vha mvutshela, vha tanga nnḓu vhusiku. Vho vha vha tshi khou ṱoḓa u mmbulaya, fhedzi vha tzhipa mufumakadzi wanga wa vhuimo ha fhasi,* a fa.+
6 Ngauralo, nda dzhia tshitumbu tsha mufumakadzi wanga wa vhuimo ha fhasi* nda tshi tumukanya, zwipiḓa zwatsho nda zwi rumela shangoni ḽiṅwe na ḽiṅwe ḽine ḽa vha ifa ḽa Isiraele,+ ngauri vho ita zwithu zwi shonisaho kha ḽa Isiraele.
7 Zwino inwi noṱhe vhathu vha Isiraele ni fanela u nṋea nyeletshedzo+ kha enea mafhungo.”
8 Vhathu vhoṱhe vha amba zwi fanaho vha ri: “A hu na na muthihi washu ane a ḓo humela denndeni ḽawe kana nḓuni yawe.
9 Hezwi ndi zwine ra ḓo zwi ita Vhagibia: Kha ri nange vhanna nga madeṅwa+ uri vha gonye vha lwe navho.
10 Ri ḓo dzhia vhanna vha 10 kha vha 100 kha tshaka dzoṱhe dza Isiraele, ra dzhia vha 100 kha vha 1 000, ra dzhia vha 1 000 kha vha 10 000 uri vha kuvhanganye zwiḽiwa zwa mmbi uri vha kone u lwa na Gibia wa Vhabenyamini, nga nṱhani ha zwithu zwi shonisaho zwe vha zwi ita kha ḽa Isiraele.”
11 Vhanna vhoṱhe vha Isiraele vho vha vho kuvhangana vhe vhathihi u itela u lwa na muḓi wonoyo.
12 Tshaka dza Isiraele dza rumela vhathu kha vhathu vhoṱhe vha tshaka dza Benyamini vha ri: “Ndi zwithu-ḓe zwi ofhisaho zwe zwa itea vhukati haṋu?
13 Zwino bvisani avho vhanna vha sa ḓivhalei vha Gibia+ uri ri vha vhulaye, ri fhelise vhuvhi kha ḽa Isiraele.”+ Fhedzi Vhabenyamini vha si thetshelese vhahavho vha Vhaisiraele.
14 Vhabenyamini vha bva miḓini vha kuvhangana vha ya Gibia u itela u lwa na vhanna vha Isiraele.
15 Nga ḽeneḽo ḓuvha Vhabenyamini vha kuvhanganya vhanna vha 26 000 vha bvaho miḓini yavho vho ḓiṱamaho nga mabanga, nga nnḓa ha vhanna vha 700 vho nangwaho kha vha Gibia.
16 Kha yeneyi mmbi ho vha hu na vhanna vha 700 vho nangwaho vhane vha shumisa tshanḓa tsha monde. Muṅwe na muṅwe wavho o vha a tshi kona u posa tombo nga gatho ḽa swika ḽa rwa luvhudzi luthihi, a si humpe.
17 Vhanna vha Isiraele vha kuvhanganya vhanna vha 400 000 vho ḓiṱamaho nga mabanga+ hu sa vhalwi vha Benyamini, muṅwe na muṅwe o vha e muhali a re na tshenzhelo.
18 Vha takuwa vha gonya Bethele u itela u vhudzisa Mudzimu.+ Vhathu vha Isiraele vha ri: “Ndi nnyi kha riṋe ane a ḓo ri ranga phanḓa musi ri tshi lwa na Vhabenyamini?” Yehova a ri: “Hu ḓo ranga phanḓa Yuda.”
19 Nga murahu ha zwenezwo, Vhaisiraele vha takuwa nga matsheloni vha ya vha atha madennde Gibia.
20 Vhanna vha Isiraele vha ya vha lwa na vha Benyamini; vha ya vha ima Gibia vho ḓilugiselela u lwa navho.
21 Vhabenyamini vha bva Gibia vha vhulaya vhanna vha Isiraele vha 22 000 nga ḽeneḽo ḓuvha.
22 Naho zwo ralo, mmbi ya vhanna vha Isiraele ya vha na tshivhindi ya dovha ya ima yo ḓilugiselela u lwa fhethu he ya vha yo ima hone nga ḓuvha ḽa u thoma.
23 Nga zwenezwo, Vhaisiraele vha gonya vha ya vha lilela Yehova u swika ḽi tshi kovhela, vha vhudzisa Yehova vha ri: “Naa ri fanela u dovha ra ya u lwa na vhathu vhahashu vha Benyamini?”+ Yehova a vha fhindula a ri: “Iyani ni lwe navho.”
24 Vhaisiraele vha sendela tsini na Vhabenyamini nga ḓuvha ḽa vhuvhili.
25 Nga zwenezwo, Vhabenyamini vha bva Gibia u itela u ṱangana navho nga ḓuvha ḽa vhuvhili, vha dovha vha vhulaya vhaṅwe Vhaisiraele vha 18 000,+ vhoṱhe vho vha vho ḓiṱama nga mabanga.
26 Vhanna vhoṱhe vha Isiraele vha gonya Bethele. Vha lila vha dzula henefho phanḓa ha Yehova,+ vha ḓidzima zwiḽiwa+ nga ḽeneḽo ḓuvha u swika ḽi tshi kovhela, vha ṋekedza zwifhiwa zwa u fhiswa+ na zwifhiwa zwa u pfumedzana+ phanḓa ha Yehova.
27 Nga murahu ha zwenezwo, vhanna vha Isiraele vha vhudzisa Yehova,+ ngauri mbulungelo ya mulanga wa Mudzimu wa ngoho yo vha i henefho misini yeneyo.
28 Finiasi+ murwa wa Eliasara, murwa wa Aroni, o vha e ene we a vha a tshi shuma henefho misini yeneyo. Vha vhudzisa vha ri: “Naa ri fanela u dovha ra ya u lwa na vhahashu vhane vha vha Vhabenyamini kana ri fanela u litsha?”+ Yehova a ri: “Gonyani, ngauri matshelo ndi ḓo vha kumedzela zwanḓani zwaṋu.”
29 Vhaisiraele vha vhea vhanna uri vha lalele+ u mona na Gibia.
30 Vhaisiraele vha gonya u itela u lwa na Vhabenyamini nga ḓuvha ḽa vhuraru, vha ima vho ḓilugiselela u lwa na Vhagibia u fana na zwe vha zwi ita zwifhingani zwo fhiraho.+
31 Musi Vhabenyamini vha tshi bva u itela u ṱangana na mmbi, vha kungelwa kule na muḓi.+ Samusi vho zwi ita zwifhingani zwo fhiraho, vha thoma u vha vutshela, vha vhulaya vhaṅwe vhanna dzinḓilani khulwane, iṅwe yadzo i gonyela Bethele, iṅwe i ya Gibia, vha vhulaya Vhaisiraele vha ṱoḓaho u vha 30 ḓakani.+
32 Vhabenyamini vha ri: “Ro vha kunda u fana na u thomani.”+ Fhedzi Vhaisiraele vha ri: “Ri ḓo shavha ra vha kungela kule na muḓi ra vha isa dzinḓilani khulwane.”
33 Ngauralo, vhanna vhoṱhe vha Isiraele vha bva fhethu havho, vha ḓilugiselela u lwa ngei Baali-thamara, ngeno Vhaisiraele vho lalela fhethu havho tsini na Gibia.
34 Vhanna vha 10 000 vho nangwaho kha Vhaisiraele vhoṱhe vha ḓa vha lwa na Vhagibia, nndwa ya vha khulu. Fhedzi Vhabenyamini vho vha vha sa ḓivhi uri vha ḓo welwa nga khombo.
35 Yehova a kumedzela Vhabenyamini+ zwanḓani zwa Vhaisiraele, nga ḽeneḽo ḓuvha Vhaisiraele vha vhulaya vhanna vha Vhabenyamini vha 25 100, vhoṱhe vho vha vho ḓiṱama nga mabanga.+
36 Naho zwo ralo, Vhabenyamini vho vha vha tshi humbula uri vhanna vha Isiraele vha ḓo kundwa musi vha tshi shavha Vhabenyamini,+ fhedzi vho shavha ngauri vho vha vha tshi khou fhulufhela vhe vha vha vhea uri vha lalele ngei Gibia.+
37 Vho lalelaho vha dzhia vhukando nga u ṱavhanya vha gidimela thungo ya Gibia. Vha phaḓalala, vha vhulaya vhoṱhe vha re muḓini nga banga.
38 Vhanna vha Isiraele vho vha vho dzudzanya uri vhanna vho lalelaho vha dubise mutsi henefho muḓini.
39 Musi Vhaisiraele vha tshi shavha nndwani, Vhabenyamini vha thoma u vutshela na u vhulaya vhanna Vhaisiraele vha ṱoḓaho u vha 30,+ vha ri: “Ro vha kunda u fana na u thomani.”+
40 Fhedzi mutsi muhulu wa thoma u dubela nṱha muḓini sa tshiga. Musi Vhabenyamini vha tshi rembuluwa vha vhona buluvhutsi muḓini woṱhe ḽi tshi khou dubela makoleni.
41 Ngauralo, vhanna vha Isiraele vha vha rembulutshela, Vhabenyamini vha kulea nungo, nge vha vhona khombo ye ya vha wela.
42 Vha litsha vhanna vha Isiraele vha shavhela sogani, fhedzi vha vha pandamedza, vhanna vha bvaho miḓini vha ṱanganela kha u vha vhulaya.
43 Vha tanga Vhabenyamini vha vha pandamedza vha sa neti. Vha enda vha tshi vha vhulaya u swika phanḓa ha muḓi wa Gibia thungo ya vhubvaḓuvha.
44 Vha vhulaya Vhabenyamini vha 18 000, vhoṱhe vho vha vhe vhahali.+
45 Vhabenyamini vha rembuluwa vha shavhela sogani luwani lwa Rimoni,+ Vhaisiraele vha vhulaya vhaṅwe vha 5 000 dzinḓilani khulwane, vha vha pandamedza u swika Gidomo; vha vhulaya vhaṅwe vhanna vha 2 000.
46 Vhabenyamini vhoṱhe vhe vha vhulawa nga ḽeneḽo ḓuvha vho vha vhe 25 000, vhanna vho ḓiṱamaho nga mabanga,+ vhoṱhe vho vha vhe vhahali.
47 Fhedzi vha 600 vha shavhela sogani luwani lwa Rimoni, vha dzula henefho luwani lwa Rimoni miṅwedzi miṋa.
48 Vhaisiraele vha rembuluwa vha ya vha lwa na Vhabenyamini, vha vhulaya vha re muḓini nga banga, vha vhulaya vhathu na zwifuwo zwoṱhe zwo salaho. Vha fhisa na miḓi yoṱhe yo salaho.
Ṱhaluso dzi re magumoni a siaṱari
^ Sedzani Mutevhe Wa Ṱhalutshedzo Ya Maipfi.
^ Kana khamusi, “Vhaṋe vha shango.”
^ Sedzani Mutevhe Wa Ṱhalutshedzo Ya Maipfi.
^ Sedzani Mutevhe Wa Ṱhalutshedzo Ya Maipfi.
