Bugu Ya Vhuvhili Ya Koronika 6:1-42
6 Nga tshenetsho tshifhinga, Salomo a ri: “Yehova o amba uri u ḓo dzula swiswini ḽihulu.+
2 Ndo u fhaṱela nnḓu yavhuḓi, fhethu hune wa ḓo dzula hone lini na lini.”+
3 Khosi ya rembuluwa ya lavhelesa tshivhidzo tshoṱhe tsha Isiraele tsho imaho henefho, ya tshi fhaṱutshedza.+
4 Ya ri: “Nga hu rendwe Yehova Mudzimu wa Isiraele, we a fhulufhedzisa khotsi anga Davida nga mulomo wawe, a ita nga tshanḓa tshawe zwe a amba a tshi ri:
5 ‘U bva nga ḓuvha ḽe nda bvisa vhathu vhanga shangoni ḽa Egipita, a tho ngo nanga muḓi kha tshaka dzoṱhe dza Isiraele, une nda ḓo fhaṱa khawo nnḓu uri dzina ḽanga ḽi dzule henefho,+ a tho ngo nanga muthu ane a ḓo vha murangaphanḓa wa vhathu vhanga vha Isiraele.
6 Fhedzi ndo nanga Yerusalema+ uri dzina ḽanga ḽi dzule henefho, ndo nanga Davida uri a vhuse vhathu vhanga vha Isiraele.’+
7 Khotsi anga Davida o vha o tama u fhaṱela dzina ḽa Yehova Mudzimu wa Isiraele nnḓu.+
8 Fhedzi Yehova a amba na khotsi anga Davida a ri: ‘Samusi lwo vha lu lutamo lwau uri u fhaṱele dzina ḽanga nnḓu, wo ita zwone u tshi tama u ita nga u ralo.
9 Naho zwo ralo, a u nga mphaṱeli nnḓu, fhedzi ndi murwa wau ane wa ḓo mu beba, ane a ḓo fhaṱela dzina ḽanga nnḓu.’+
10 Yehova o ita zwe a fhulufhedzisa, ngauri ndo vha khosi vhudzuloni ha khotsi anga Davida, ndo dzula kha khuluṋoni ya Isiraele,+ sa zwe Yehova a fhulufhedzisa.+ Ndo fhaṱela na dzina ḽa Yehova Mudzimu wa Isiraele nnḓu,
11 henefho ndo vhea Mbulungelo i re na mulanga+ we Yehova a u vhofha na vhathu vha Isiraele.”
12 A ima phanḓa ha aḽeṱare ya Yehova phanḓa ha tshivhidzo tshoṱhe tsha Isiraele, a imisa zwanḓa zwawe.+
13 (Ngauri Salomo o vha o ita pulatifomo ya koporo, a i vhea vhukati ha muṱa.+ Yo vha i vhulapfu ha khubithi* ṱhanu, vhuphara ha khubithi ṱhanu, u ya nṱha i khubithi tharu; a ima khayo.) A gwadama phanḓa ha tshivhidzo tshoṱhe tsha Isiraele a imisela zwanḓa zwawe ṱaḓulu,+
14 a ri: “Iwe Yehova Mudzimu wa Isiraele, a hu na muṅwe Mudzimu ane a nga iwe ṱaḓulu kana kha ḽifhasi, ane a khwaṱhisa mulanga na u sumbedza lufuno lu sa shanduki kha vhashumeli vhawe vhane vha tshimbila phanḓa hau nga mbilu dzavho dzoṱhe.+
15 Wo ita zwe wa fhulufhedzisa mushumeli wau Davida khotsi anga.+ Wo fhulufhedzisa nga mulomo wau nahone ṋamusi wo ita nga tshanḓa tshau zwe wa fhulufhedzisa.+
16 Iwe Yehova Mudzimu wa Isiraele, wo ita zwe wa fhulufhedzisa mushumeli wau Davida khotsi anga musi u tshi ri: ‘Hu ḓo dzula hu na munna wa lushaka lwau ane a ḓo dzula phanḓa hanga kha khuluṋoni ya Isiraele, arali vharwa vhau vha tevhedza mulayo wanga,+ sa zwe wa ita.’+
17 Zwino Yehova Mudzimu wa Isiraele, ita uri zwe wa fhulufhedzisa Davida mushumeli wau, zwi itee.
18 “Naa Mudzimu a nga dzula na vhathu kha ḽifhasi?+ Huufha u sa fheleli kha maṱaḓulu a ḽiṱaḓulu;+ zwino u ḓo fhelela hani kha ino nnḓu ye nda fhaṱa!+
19 Iwe Yehova Mudzimu wanga, thetshelesa thabelo ya mushumeli wau na zwine a zwi humbela, u thetshelese tshililo tsha u ṱoḓa thuso na thabelo ine mushumeli wau a i rabela phanḓa hau.
20 Ngavhe maṱo au a tshi lavhelesa yeneyi nnḓu masiari na vhusiku, fhethu he wa amba uri u ḓo vhea dzina ḽau+ na u thetshelesa musi mushumeli wau a tshi rabela o lavhelesa henefha fhethu.
21 U thetshelese zwine mushumeli wau na vhathu vhau vha Isiraele vha zwi humbela musi vha tshi rabela vho lavhelesa henefha fhethu,+ ngavhe u tshi vha pfa u hune wa dzula hone ngei ṱaḓulu;+ u vha pfe, u vha hangwele.+
22 “Arali muthu a pomokwa uri o khakhela muṅwe muthu, o khakhelwaho a nga mu anisa. Arali o khakhaho a ḓa phanḓa ha aḽeṱare yau kha yeneyi nnḓu nga nṱhani ha zwe a ana,+
23 u pfe u ngei ṱaḓulu, u dzhie vhukando u haṱule vhashumeli vhau nga u lifhedza muvhi, u mu hwese mulandu nṱha ha ṱhoho yawe,+ muvhuya u si mu vhone mulandu, u mu lambedze u ya nga zwivhuya zwawe.+
24 “Arali vhathu vhau vha Isiraele vha kundwa nga swina nge vha u khakhela,+ vha vhuyelela kha iwe vha hulisa dzina ḽau,+ vha rabela+ vha humbela u khathutshelwa vhe phanḓa hau kha yeneyi nnḓu,+
25 u vha pfe u ṱaḓulu,+ u hangwele vhathu vhau vha Isiraele zwivhi zwavho, u vha humisele kha shango ḽe wa ṋea vhone na vhomakhulukuku wavho.+
26 “Musi ḽiṱaḓulu ḽo valea hu si na mvula+ nge vha u khakhela,+ vha rabela vho sedza henefha fhethu, vha hulisa dzina ḽau, vha rembuluwa kha zwivhi zwavho nge wa vha ṱukufhadza,*+
27 ngavhe u tshi vha pfa u ṱaḓulu, wa hangwela vhashumeli vhau zwivhi zwavho, vhathu vhau vha Isiraele, ngauri ndi hone u tshi ḓo vha funza nḓila yavhuḓi ine vha fanela u tshimbila ngayo;+ wa nisa mvula+ shangoni ḽau ḽe wa ṋea vhathu vhau sa ifa.
28 “Arali ha vha na nḓala shangoni+ kana malwadze,+ mufhiso muhulu, muunda,+ guma* ḽa nzie+ kana nzie dzi sa furi kana arali maswina avho a vha vutshela miḓini+ kana ha vha na iṅwe ṱhamu kana ḽiṅwe dwadze,+
29 thabelo naho i ifhio,+ khumbelo naho i ifhio+ ya u khathutshelwa ine ya itwa nga muthu muthihi kana nga vhathu vhau vhoṱhe vha Isiraele (ngauri muṅwe na muṅwe u a ḓivha thaidzo dzawe na vhuṱungu hawe)+ musi vha tshi imisela zwanḓa zwavho nṱha zwo livhana na yeneyi nnḓu,+
30 ngavhe u tshi vha pfa u ṱaḓulu, hune wa dzula hone,+ ngavhe u tshi vha hangwela;+ wa lambedza muṅwe na muṅwe zwo mu fanelaho u ya nga nḓila dzawe, ngauri u a ḓivha mbilu yawe (ngauri ndi iwe u woṱhe ane a ḓivha mbilu ya muthu),+
31 uri vha u ofhe vha tshimbile nḓilani dzau tshifhinga tshoṱhe musi vha tshi khou dzula shangoni ḽe wa ḽi ṋea vhomakhulukuku washu.
32 “Arali mutsinda ane a si vhe muṅwe wa vhathu vhau vha Isiraele, we a bva shangoni ḽa kule nga nṱhani ha dzina* ḽau ḽihulu+ na tshanḓa tshau tsha maanḓa, a ḓa a rabela o lavhelesa yeneyi nnḓu,+
33 ngavhe u tshi mu thetshelesa u ṱaḓulu, hune wa dzula hone, u ite zwoṱhe zwine mutsinda a u humbela, uri vhathu vhoṱhe vha kha ḽifhasi vha ḓivhe dzina ḽau+ vha u ofhe, sa zwine vhathu vhau vha Isiraele vha zwi ita, vha ḓivhe uri dzina ḽau ḽi vhidzwa kha yeneyi nnḓu ye nda i fhaṱa.
34 “Arali vhathu vhau vha ya u lwa na maswina avho nga nḓila ye wa vha ruma ngayo,+ vha u rabela+ vho lavhelesa thungo ya muḓi we wa u nanga, vho lavhelesa nnḓu ye nda i fhaṱela dzina ḽau,+
35 u pfe thabelo dzavho u ngeo ṱaḓulu vha tshi humbela u khathutshelwa, u vha haṱulele.+
36 “Arali vha u khakhela (ngauri a hu na a sa khakhi),+ wa vha sinyutshela, wa vha kumedzela maswina avho, vhathubi vhavho vha vha isa vhuthubwani shangoni ḽa kule kana ḽa tsini,+
37 vha rembuluwa musi vhe vhuthubwani, vha vhuyelela kha iwe, vha humbela u khathutshelwa musi vhe shangoni ḽa vhe vha vha thuba, vha ri: ‘Ro khakha, ro tshinya; ro ita zwivhi,’+
38 vha vhuyelela kha iwe nga mbilu dzavho dzoṱhe+ na nga zwoṱhe zwine vha vha zwone musi vhe shangoni ḽa vhe vha vha thuba,+ vha u rabela vho lavhelesa thungo ya shango ḽavho ḽe wa ḽi ṋea vhomakhulukuku wavho na muḓi we wa u nanga+ na nnḓu ye nda i fhaṱela dzina ḽau,
39 u pfe thabelo dzavho u ngeo ṱaḓulu, hune wa dzula hone, vha tshi humbela u khathutshelwa, u vha haṱulele,+ u hangwele vhathu vhau vho u khakhelaho.
40 “Iwe Mudzimu wanga, ngavhe u tshi lavhelesa, wa pfa thabelo dzine dza rabelwa afha fhethu.+
41 Zwino gonya Iwe Yehova Mudzimu, u ye fhethu hau ha vhuawelo,+ iwe na Mbulungelo ine ya sumbedza uri u na maanḓa. Iwe Yehova Mudzimu, tendela vhotshifhe vhau vha tshi sumbedza uri u tshidzwa hu bva ha iwe, u tendele vha fhulufhedzeaho vha tshi takalela vhuḓi hau.+
42 Iwe Yehova Mudzimu, u songo laṱa muḓodzwa wau.+ Ngavhe u tshi humbula lufuno lwau lu sa shanduki lwe wa lu sumbedza Davida mushumeli wau.”+
Ṱhaluso dzi re magumoni a siaṱari
^ Khubithi nthihi i lingana na senthimithara dza 44,5. Sedzani Ṱhume. B14.
^ Kana “tambudza.”
^ Kana “murivha.”
^ Kana “bvumo.”
