Bugu Ya Vhuvhili Ya Koronika 28:1-27
28 Ahasi+ o vha e na miṅwaha ya 20 musi a tshi vha khosi, o vhusa miṅwaha ya 16 Yerusalema. Ho ngo ita zwo lugaho phanḓa ha Yehova, ho ngo edzisa Davida makhulukuku wawe.+
2 Nṱhani hazwo, o tevhedza zwe zwa itwa nga mahosi a Isiraele,+ a ita na zwifanyiso+ zwa Vhobaali zwa tsimbi.
3 Zwiṅwe hafhu, o dubisa zwiṱhavhelo ngei Govhani ḽa Murwa wa Hinomi,* a fhisa vharwa vhawe muliloni,+ a tshi tevhedza maitele a nengisaho a tshaka+ dze Yehova a dzi pandela phanḓa ha Vhaisiraele.
4 O dzula a tshi ṋekedza zwiṱhavhelo na u dubisa zwiṱhavhelo fhethu ha vhurabeli,+ zwikwarani na nga fhasi ha miri yoṱhe mihulu.+
5 Yehova Mudzimu wawe a mu kumedzela zwanḓani zwa khosi ya Siria,+ vha mu kunda vha thuba vhathu vhanzhi nga maanḓa, vha vha isa Damaseko.+ O dovha a kumedzwa zwanḓani zwa khosi ya Isiraele, ye ya vhulaya vhathu vhanzhi nga maanḓa.
6 Peka+ murwa wa Remalia o vhulaya vhanna vhoṱhe vha vhahali vha Yuda vha 120 000 nga ḓuvha ḽithihi, nge vha ṱutshela Yehova Mudzimu wa vhomakhulukuku wavho.+
7 Sikiri muhali wa Muefuraimi, o vhulaya Maaseya murwa wa khosi na Asirikamu, we a vha a tshi langa pfamo,* na Elikana tshanḓa tsha khosi.
8 Zwiṅwe hafhu, Vhaisiraele vha thuba vhahavho vha 200 000, vhafumakadzi, vharwa na vhananyana; vha dovha vha thuba na thundu nnzhi, vha isa dzenedzo thundu Samaria.+
9 Fhedzi henefho ho vha hu na muporofita wa Yehova we a vha a tshi pfi Odede. A bva a ima phanḓa ha mmbi ye ya vha i tshi khou ḓa Samaria, a amba nayo a ri: “Yehova Mudzimu wa vhomakhulukuku waṋu o vha o sinyutshela Vhayuda, ndi ngazwo o vha kumedzela zwanḓani zwaṋu,+ fhedzi no vha vhulaya lwa tshiṱuhu lwe zwa swika na ṱaḓulu.
10 Zwino no ḓiimisela u ita uri vhathu vha Yuda na vha Yerusalema vha vhe vhashumeli vhaṋu vha vhanna na vha vhafumakadzi.+ Naho zwo ralo, naa na inwi a ni na mulandu phanḓa ha Yehova Mudzimu waṋu?
11 Zwino nthetsheleseni, ni humise mathubwa e na a dzhia kha vhahaṋu ngauri Yehova o ni sinyutshela.”
12 Nga zwenezwo, vhaṅwe vharangaphanḓa vha Vhaefuraimi, Asaria murwa wa Yehohanani, Berekia murwa wa Mesilemothe, Yehiskia murwa wa Shalumu na Amasa murwa wa Hadalai, vha lwa na vhane vha bva nndwani,
13 vha amba navho vha ri: “Ni songo ḓisa mathubwa fhano, ngauri zwi ḓo ita uri ri vhe na mulandu phanḓa ha Yehova. Zwe na ḓiimisela u zwi ita zwi ḓo engedza zwivhi zwashu na milandu yashu ngauri milandu yashu ndi mihulu, Mudzimu o sinyutshela Isiraele.”
14 Maswole o ḓiṱamaho a kumedzela mathubwa na thundu yo dzhiiwaho+ kha vhakololo na tshivhidzo tshoṱhe.
15 Vhanna vho nangiwaho u ya nga madzina vha takuwa vha dzhia mathubwa, vha dzhia zwiambaro kha thundu yo thubiwaho vha zwi ṋea vhoṱhe vha re fhedzi. Vha vha ambadza na u vha ṋea dzithovho,* zwiḽiwa, zwinwiwa na mapfura a u ḓola. Zwiṅwe hafhu, vha ṋamedza vha si na nungo kha donngi, vha vha isa kha vhahavho ngei Yeriko, muḓini wa miri ya mitshevho. Nga murahu vha humela Samaria.
16 Nga tshenetsho tshifhinga, Khosi Ahasi a humbela thuso kha mahosi a Asuri.+
17 Vhaedomo vha dovha vha vutshela Vhayuda vha thuba vhathu.
18 Na Vhafilisita+ vha ḓa vha ṱhasela miḓi ya Shefela+ na ya Negebe ngei Yuda vha thuba Bethe-semesi,+ Ayaloni,+ Gederothe, Soko na miḓana ya nga tsini,* Thimine+ na miḓana ya nga tsini, Gimiso na miḓana ya nga tsini; vha dzula henefho.
19 Yehova a ṱukufhadza Yuda nga nṱhani ha Khosi Ahasi wa Isiraele, nge a litsha Vhayuda vha tshi ḓifara luvhi, zwa ita uri vha si tsha fhulufhedzea kha Yehova.
20 Mafheleloni Thiligatha-pilesere+ khosi ya Asuri a lwa nae, a mu tsikeledza+ nṱhani ha uri a mu khwaṱhise.
21 Ngauri Ahasi o vha o dzhia zwithu zwa nḓuni ya Yehova na zwa nḓuni* ya khosi+ na zwa nḓuni dza vhakololo a zwi ṋea khosi ya Asuri sa tshifhiwa; fhedzi a zwo ngo mu thusa.
22 Musi Khosi Ahasi o tsikeledzea, o bvela phanḓa a sa fhulufhedzei kha Yehova.
23 O thoma u itela zwiṱhavhelo midzimu ya Damaseko+ ye ya mu kunda,+ a ri: “Ngauri midzimu ya mahosi a Siria i khou vha thusa, ndi ḓo i itela zwiṱhavhelo uri i nthuse.”+ Fhedzi yo khukhulisa ene na Vhaisiraele vhoṱhe.
24 Ahasi a dovha a kuvhanganya thundu nḓuni ya Mudzimu wa ngoho; a kwashekanya dzenedzo thundu dza nḓuni ya Mudzimu wa ngoho,+ a vala mavothi a nnḓu ya Yehova,+ a ḓifhaṱela aḽeṱare thungo dzoṱhe dza Yerusalema.
25 Miḓini yoṱhe ya Yuda, a ita fhethu ha vhurabeli ha u dubisela miṅwe midzimu zwiṱhavhelo,+ a sinyusa Yehova Mudzimu wa vhomakhulukuku wawe.
26 Mafhungo awe oṱhe na mishumo yawe yoṱhe u bva mathomoni u swika magumoni, zwo ṅwaliwa Buguni ya Mahosi a Yuda na a Isiraele.+
27 Ahasi a vhulungwa na vhomakhulukuku wawe muḓini wa Yerusalema, a vho ngo mu vhulunga mavhiḓani a mahosi a Isiraele.+ Murwa wawe Hiskia a vha khosi vhudzuloni hawe.
Ṱhaluso dzi re magumoni a siaṱari
^ Thevhedz., “nnḓu.”
^ Kana “dziphashane, dzinavhula.”
^ Kana “yo u tangaho.”
^ Kana “pfamoni.”
